સુરતને પણ ટક્કર મારે તેવો મેગા ટેક્સટાઈલ પાર્ક ગુજરાતના આ શહેરમાં બનશે

Navsari News : એક સમયે મફતલાલ ગૃપના કારણે નવસારીનું નામ કાપડ ઉદ્યોગ ક્ષેત્રે રાષ્ટ્રીય ફલક પર આવતું હતું. બાદમાં, નવસારીને પાછળ છોડીને, સુરતે તે સ્થાન હાંસલ કર્યું. સુરતે તે નામને માત્ર રાષ્ટ્રીય જ નહીં પરંતુ આંતરરાષ્ટ્રીય સ્તરે પહોંચાડ્યું.
સુરતને ટેક્સટાઈલ સિટી, સિલ્ક સિટી તરીકે ઓળખવામાં આવે છે. પરંતુ હવે વર્ષો પછી ફરી એકવાર નવસારીનું નામ ટેક્સટાઈલ ઉદ્યોગને લઈને ચર્ચામાં છે. કેન્દ્ર સરકારે છેલ્લા બજેટમાં દેશભરમાં નિર્માણ થનારા 7 પીએમ મિત્ર પાર્કમાં નવસારીને પણ સમાવી લીધું છે. તાજેતરમાં, તેની સૂચના જાહેર થતાં, તેને તૈયાર કરવાની પ્રક્રિયા શરૂ કરવામાં આવી છે. પીએમ મિત્ર યોજના હેઠળ નવસારી નજીક વાંસી બોરસી ખાતે 1142 એકર જમીનમાં મેગા ટેક્સટાઈલ પાર્ક બનાવવામાં આવશે.

અહીં કાપડના વેપારને લગતી તમામ પ્રવૃત્તિઓ એક બાઉન્ડ્રીની અંદર હાજર રહેશે. તેમાં સ્પિનિંગથી લઈને વણાટ, ડાઈંગ, પ્રિન્ટિંગ, ટેક્સચરાઈઝિંગ, પેકેજિંગ, વેલ્યુ એડિશન, ટેક્નિકલ ટેક્સટાઈલ, મશીનરી મેન્યુફેક્ચરિંગ વગેરેનો સમાવેશ થશે. આના પરિણામે લગભગ રૂ. 15,000 કરોડનું રોકાણ થશે અને 50,000થી વધુ લોકો માટે રોજગારીની તકો ઊભી થશે. કેન્દ્ર સરકાર દ્વારા 300 કરોડ રૂપિયા CIS તરીકે આપવામાં આવશે. 

સુરતના કાપડ ઉદ્યોગોને પ્રોત્સાહન મળશે
સુરતમાં દરરોજ 50 મિલિયન મીટર કાપડનું ઉત્પાદન થાય છે. અહીં વાર્ષિક 50 હજારથી 60 હજાર કરોડ રૂપિયાના તૈયાર માલનો બિઝનેસ થાય છે. જો વણાટ અને કાંતણનું વાર્ષિક ટર્નઓવર ઉમેરવામાં આવે તો તે એક લાખ કરોડ રૂપિયાને પાર કરી જશે. નવસારીમાં પીએમ મિત્રા પાર્કના આગમનથી તેમના કાપડના વ્યવસાયને વિસ્તારવા ઈચ્છુક વેપારીઓ માટે આ એક સુવર્ણ તક હશે. એક કેમ્પસમાં સમગ્ર ઉદ્યોગો હશે. સુરતના વ્યવસાયની મુખ્ય સમસ્યા દરેક સિઝનમાં મજૂરોની ઉપલબ્ધતા છે. આ સમસ્યા પણ દૂર થઈ જશે. અહીં કામદારો માટે ઘર પણ બનાવવામાં આવશે.

ટેક્સટાઇલ ઉદ્યોગ માટે પ્રોત્સાહક નીતિ
કેન્દ્રીય કાપડ રાજ્ય મંત્રી દર્શના જરદોષ કહે છે કે દેશના સર્વાંગી વિકાસ માટે સરકારે તમામ ઉદ્યોગો માટે પ્રોત્સાહક નીતિ ઘડી છે. પ્રધાનમંત્રી નરેન્દ્ર મોદીનું ફાઈબર ટુ ફેક્ટરી ટુ ફેશન ટુ ફોરેનનું વિઝન સાકાર થશે. કેન્દ્ર અને રાજ્ય સરકારની દીર્ઘદ્રષ્ટિને કારણે રોકાણ અને રોજગારમાં પણ મોટા પાયે વધારો થશે. 

દક્ષિણ ગુજરાત ટેક્સટાઈલ ટ્રેડર્સ એસોસિએશન (SGTTA)ના સ્થાપક પ્રમુખ સાંવર પ્રસાદ બુધિયા કહે છે કે સુરતના ટેક્સટાઈલ ઉદ્યોગ માટે ખૂબ જ સારી યોજના છે. માનવ નિર્મિત કાપડ અહીં વધુ લોકપ્રિય છે. સરકારે આ પીએમ મિત્ર પાર્કમાં એક સામાન્ય સુવિધા માટે પ્લાન રાખ્યો છે. એટલે કોમન બોઈલર, કોમન ટ્રીટમેન્ટ પ્લાન્ટ, ડ્રેનેજ વગેરે બધું કોમન હશે. સાથે વીજળી સસ્તી કરવાની યોજના છે, જેથી ઉત્પાદન ખર્ચ ઓછો કરી શકાય. નિકાસની વિશાળ તકો હશે.

સાઉથ ગુજરાત ચેમ્બર ઓફ કોમર્સ એન્ડ ઈન્ડસ્ટ્રીઝ (SGCCI), સુરતના એડવાઈઝર (ટેક્ષટાઈલ ટ્રેડ કમિટી) દેવકિશન મંઘાણી કહે છે કે પીએમ મિત્ર પાર્કના કારણે દક્ષિણ ગુજરાત ટેક્સટાઈલ બિઝનેસનું મોટું કેન્દ્ર બનશે. તમામ એકમો એક જગ્યાએ રાખવાથી નિકાસને વેગ મળશે. હાલ દેશભરમાંથી વેપારીઓ સુરત આવે છે, પરંતુ જ્યારે પાર્ક કાર્યરત થશે ત્યારે તે આંતરરાષ્ટ્રીય વેપારનું કેન્દ્ર બનશે. આ પછી સુરત એરપોર્ટને આંતરરાષ્ટ્રીય કક્ષાનું બનાવવાની જરૂર પડશે.