નાણાવાળા નેતા પાસેથી ભાજપના સાંસદના નાણાં તો ન નીકળ્યા પણ સાંસદ ભરાયા, હવે સાંસદપદ જવાનો ફફડાટ

Rajkot News : ગુજરાતના સૌરાષ્ટ્રમાં સારી ઓળખ ધરાવતા ભાજપના રાજ્યસભાના સાંસદ રામ મોકરિયા હવે ફસાતા જોવા મળી રહ્યા છે. થોડા દિવસો પહેલાં સોશિયલ મીડિયા પર એક પોસ્ટ આવી હતી. જેમાં તેમણે લખ્યું છે કે બહુ જૂના નેતા મને મારા પૈસા પાછા નથી આપી રહ્યા. તે અબજોપતિ છે. મોકરિયાની આ પોસ્ટને લઈને સૌરાષ્ટ્રના રાજકારણમાં ચર્ચાનો દોર શરૂ થયો હતો અને મોકરિયા કયા નેતાને ટાર્ગેટ કરી રહ્યા છે તેની અટકળો શરૂ થઈ હતી. રાજકોટમાં માત્ર પૂર્વ મુખ્યમંત્રી વિજય રૂપાણી અને કર્ણાટકના પૂર્વ રાજ્યપાલ વજુભાઈ વાળાએ જ લાંબી ઈનિંગ્સ રમી છે. સૌરાષ્ટ્રમાં ચાલી રહેલી ચર્ચાઓમાં હવે આ બંને નેતાઓના નામ લેવાઈ રહ્યા છે એવા પણ આક્ષેપો થઈ રહ્યાં છે કે આ વરિષ્ઠ નેતાઓ ટાર્ગેટ થઈ રહ્યાં છે. હવે આ સમગ્ર મામલે નવો વળાંક આવ્યો છે. રાજ્યસભાના સાંસદ રામભાઈ મોકરિયાની પૈસા ન આપવાવાળી પોસ્ટ પર કોંગ્રેસના નેતા મહેશ રાજપૂતે સવાલો ઉઠાવ્યા છે. મહેશ રાજપૂતે આક્ષેપ કર્યો છે કે રામભાઈ મોકરિયાએ સોગંદનામામાં 2008 અને 2011ના હિસાબો દર્શાવ્યા નથી. આવી સ્થિતિમાં હવે તે આખો મામલો ચૂંટણી પંચ સમક્ષ લઈ જવામાં આવશે.

'હવે મારે કંઈ પણ નથી કહેવું'
ફેસબુક પોસ્ટથી શરૂ થયેલા વિવાદમાં કોંગ્રેસ નેતા મહેશ રાજપૂતની એન્ટ્રી બાદ મોકરિયા બેકફૂટ પર આવી ગયા છે. કોંગ્રેસ નેતાની પ્રેસ કોન્ફરન્સ બાદ તેમણે કહ્યું કે હવે મારે કંઈ કહેવાનું નથી, પાર્ટી જ્યારે પૂછશે ત્યારે હું સાબિતી રાખીશ. મોકરિયાએ જણાવ્યું હતું કે, જો સોગંદનામું ખોટું હોય તો તેઓ ફરિયાદ કરી શકે છે. કોંગ્રેસના નેતા મહેશ રાજપૂતે રાજ્યસભા સાંસદ રામભાઈ મોકરિયાની પોસ્ટ પર સવાલ ઉઠાવ્યા છે. મહેશ રાજપૂતે આક્ષેપ કર્યો છે કે રામભાઈ મોકરિયાએ સોગંદનામામાં 2008 અને 2011ના હિસાબો દર્શાવ્યા નથી. મહેશ રાજપૂતના આરોપ પર સાંસદ રામભાઈ મોકરિયાનું નિવેદન સામે આવ્યું છે. તેમણે કહ્યું છે કે, 'મારે અત્યારે કંઈ કહેવું નથી. હું મારી વાત યોગ્ય જગ્યાએ મૂકીશ.

'કોઈનું નામ નથી લીધું'
મહેશ રાજપૂતના આક્ષેપ અંગે રામભાઈ મોકરિયાએ જણાવ્યું હતું કે, હું આ અંગે કંઈ કહેવા માંગતો નથી, હું આ બાબતે મૌન સેવી રહ્યો છું. જો એફિડેવિટ ખોટી હોય તો તમે ફરિયાદ કરી શકો છો, જો મારો પક્ષ સ્પષ્ટતા માંગે તો હું પક્ષને જવાબ આપવા તૈયાર છું. મેં કોઈનું નામ લીધું નથી અને કોઈ પૈસા લેવા પણ માંગતો નથી. હું યોગ્ય સમયે અને સ્થળ પર રજૂઆત કરીશ. મહેશ રાજપૂતે દલીલ કરી હતી કે મોકરિયાએ ચૂંટણી એફિડેવિટમાં આ રૂપિયાનો ઉલ્લેખ કેમ કર્યો નથી? અમે ચૂંટણી પંચને મોકરિયાને ગેરલાયક ઠેરવવાની માંગ કરીશું. કોંગ્રેસ નેતા મહેશ રાજપૂત સંપૂર્ણ તૈયારી સાથે પ્રેસ સામે આવ્યા હતા. તેઓ રાજકોટના દિગ્ગજ નેતા વજુભાઈ વાળાના સમુદાયમાંથી આવે છે.

શું છે સમગ્ર મામલો?
રાજકોટમાં રહેતા મારુતિ કુરિયરના માલિક રામભાઈ મોકરિયા રાજ્યસભાના સભ્ય છે. તેમણે થોડા દિવસ પહેલા એક ફેસબુક પોસ્ટમાં લખ્યું હતું કે એક બહુ જૂના નેતા મને મારા પૈસા પાછા નથી આપી રહ્યા. તે અબજોપતિ છે પણ તેમના ઈરાદા બહુ ખરાબ છે. તેઓ 1980થી રાજકારણમાં સક્રિય હતા અને તાજેતરમાં ગુજરાતમાંથી નિવૃત્ત થયા હતા. રામભાઈ મોકરિયાની પોસ્ટે સમગ્ર સૌરાષ્ટ્રમાં ખળભળાટ મચાવી દીધો હતો, જોકે રામભાઈએ તેમાં કોઈનું નામ લીધું ન હતું, જેથી રામભાઈ મોકરિયાની પોસ્ટ વાઈરલ થતાં જ રાજકીય ચર્ચા શરૂ થઈ ગઈ હતી. હવે કોંગ્રેસ નેતાની એન્ટ્રી સાથે તેમાં નવો મોડ આવ્યો છે.