Breaking: હવે જલદી આવશે બાળકો માટેની કોરોના રસી, DCGI એ કોવેક્સીનની બાળકો પર ટ્રાયલને આપી મંજૂરી

નવી દિલ્હી: કોરોના (Coronavirus) વધતા પ્રકોપ વચ્ચે સારા સમાચાર આવ્યા છે. ડ્રગ કંટ્રોલર જનરલ ઓફ ઈન્ડિયા (DCGI) એ ભારત બાયોટેકની કોરોના રસી કોવેક્સીન (COVAXIN)ની 2થી 18 વર્ષની ઉંમરના બાળકો પર બીજા/ત્રીજા ફેઝની ટ્રાયલ માટે મંજૂરી આપી દીધી છે. ભારત બાયોટેક 525 વોલેન્ટિયર્સ પર રસીની ટ્રાયલ કરશે. 

મળતી માહિતી મુજબ ભારત  બાયોટેક (Bharat Biotech) તરફથી આ ટ્રાયલ 525 વોલેન્ટિયર્સ પર કરવામાં આવશે. આ ટ્રાયલ 2થી લઈને 18 વર્ષ સુધીના બાળકો પર ફેઝ 2 અને 3 હેઠળ કરાશે. ટ્રાયલ દરમિયાન પહેલો અને બીજો વેક્સીન ડોઝ 28 દિવસના અંતરે આપવામાં આવશે. આ જોતા હવે વર્ષના અંત સુધીમાં બાળકો માટે કોરોના રસી ઉપલબ્ધ થાય તેવી સંભાવના જોવા મળી રહી છે. 

Drugs Controller General of India (DCGI) approves Phase II/III clinical trial of COVAXIN in the age group of 2 to 18 years. Bharat Biotech to conduct trials in 525 healthy volunteers pic.twitter.com/ibxAW97bAc

— ANI (@ANI) May 13, 2021

ત્રીજી લહેરમાં બાળકો પર તોળાઈ રહ્યું છે જોખમ
અત્રે જણાવવાનું કે ભારતમાં હાલ કોરોનાની બીજી લહેરનો પ્રકોપ છે. આ લહેરે દેશની સ્વાસ્થ્ય સિસ્ટમને હચમચાવી નાખી છે. ચારેબાજુ તબાહી જોવા મળી રહી છે. આવામાં એક્સપર્ટ્સે ચેતવણી આપી છે કે ભારતમાં હજુ કોરોનાની ત્રીજી લહેર પણ આવશે અને આ લહેરમાં બાળકો પર સૌથી વધુ અસર જોવા મળી શકે છે. 

વૈજ્ઞાનિકોની આ ચેતવણી બાદ સુપ્રીમ કોર્ટે પણ કેન્દ્ર સરકારને ત્રીજી લહેરની તૈયારીઓ અંગે સવાલ કર્યો હતો. અનેક રાજ્ય સરકારોએ અત્યારથી જ બાળકો માટે અલગથી હોસ્પિટલો બનાવવા પર કામ શરૂ કરી દીધુ છે. જો કે રસી પર જ બધી આશાઓ ટકેલી છે.