દેવબંદમાં અમિત શાહના ચૂંટણી કેમ્પેનમાં ઉમટી ભારે ભીડ, કોરોના ગાઇડલાઇન્સના લીધે રદ કર્યો પ્રવાસ

નવી દિલ્હીઃ ઉત્તર પ્રદેશમાં ચૂંટણીની તૈયારીઓ પૂરજોશમાં ચાલી રહી છે. આવી સ્થિતિમાં અમિત શાહ શનિવારે દેવબંદમાં પ્રચાર કરી રહ્યા હતા. પરંતુ આ દરમિયાન અમિત શાહને જોનારાઓની ભીડ ઘણી વધી ગઈ હતી, જેના કારણે તેમણે તેમનો પ્રવાસ રદ્દ કરવો પડ્યો હતો. તેમણે પોતાનો કાર્યક્રમ શરૂ કરી દીધો હતો, પરંતુ લોકોની ભીડ જોઈને અને કોરોના ગાઈડલાઈન્સનું ઉલ્લંઘન જોઈને તેણે પોતાનો પ્રવાસ અધવચ્ચે જ રદ્દ કરવાનો નિર્ણય લીધો અને સહારનપુર જવા રવાના થઈ ગયા.

ડોર ટુ ડોર અભિયાન
તમને જણાવી દઈએ કે ગૃહમંત્રી અમિત શાહ ડોર ટુ ડોર પ્રચાર કરી રહ્યા છે. તેઓ અત્યાર સુધી યુપીના અનેક જિલ્લાઓમાં ફરી ચૂક્યા છે અને અહીં પણ તે પ્રકારનું કેમ્પેન કરવા આવ્યા છે. ચૂંટણી પંચ દ્વારા બહાર પાડવામાં આવેલી માર્ગદર્શિકા મુજબ નેતાઓ મોટી જાહેર સભાઓને સંબોધિત કરી શકતા નથી, તેથી ભાજપના લોકોએ ડોર ટુ ડોર પ્રચાર શરૂ કર્યો છે. જેમાં તે લોકોને ઘરે ઘરે જઈને ભાજપને મત આપવા અપીલ કરે છે.

#WATCH | Uttar Pradesh: Union Home Minister and BJP leader Amit Shah holds door-to-door campaign in Deoband, Saharanpur pic.twitter.com/K5e04c2V8B

— ANI UP/Uttarakhand (@ANINewsUP) January 29, 2022

મુઝફ્ફરનગરની પણ લીધી મુલાકાત
દેવબંદ પહેલા, ગૃહ પ્રધાન અમિત શાહે યુપીના મુઝફ્ફરનગરમાં અસરકારક મતદાર સંવાદ કાર્યક્રમને સંબોધિત કર્યો હતો. તેમણે કહ્યું કે 2017માં અહીં યોગી આદિત્યનાથજીની સરકાર બન્યા બાદ તમામ ગુંડાઓ ઉત્તર પ્રદેશની સરહદની બહાર નીકળી ગયા છે. તેમણે કહ્યું કે આ એજ મુઝફ્ફરનગર છે જેણે 2014, 2017 અને 2019માં ઉત્તર પ્રદેશમાં ભાજપની જંગી જીતનો પાયો નાખ્યો છે. અહીંથી લહેર ઉઠે છે જે કાશી સુધી જાય છે અને આપણા વિરોધીઓના સૂપડા સાફ કરે છે.