લાંચમાં લીધેલા રૂપિયા વિજિલન્સ ટીમ જોતા જ ગળી ગયો પોલીસકર્મી!, કેવી રીતે કઢાવ્યા તેના માટે જુઓ Video

ફરીદાબાદ: વિજિલન્સની ટીમે હરિયાણાના ફરિદાબાદમાં એક સબ ઈન્સ્પેક્ટરને 4000 રૂપિયા લાંચ લેવાના આરોપસર દબોચી લીધો. સેક્ટર-3 પોલીસ મથકમાં તૈનાત આ પોલીસ ઓફિસર લાંચ લેતા રંગે હાથે પકડાયો. પકડાયો ત્યારબાદ સબ ઈન્સ્પેક્ટરે રૂપિયા મોઢામાં નાખીને ગળી જવાનો પ્રયત્ન કર્યો પરંતુ તે બચી શક્યો નહીં. ટીમે તેની જમીન પર સૂવાડીને મોઢામાં રૂપિયા ઓકાવ્યા. ધરપકડ એક કમ્યુનિટી સેન્ટરથી કરવામાં આવી. જ્યાં પરિવાર સાથે તે લગ્ન સમારોહમાં સામેલ થવા આવ્યો હતો. એવું જાણવા મળ્યું છે કે લાંચ લેવા માટે તેણે પીડિતને લગ્ન સમારોહમાં બોલાવ્યો હતો. આ ધરપકડથી સમારોહ સ્થળ પર અફરાતફરી મચી ગઈ. કોર્ટમાં રજૂ કરાયા બાદ આરોપીને જેલમાં મોકલી દેવાયો છે. 

મળતી માહિતી મુજબ સેક્ટર 3ના રહિશ શંભુનાથ યાદવે આપેલી ફરિયાદમાં જણાવ્યું છે કે તેઓ પશુપાલન કરે છે. હાલમાં તેમણે પોતાના પરિચિત દેશરાજને 40 હજાર રૂપિયામાં ભેંસ વેચી હતી. દેશરાજે ભેંસ લઈ જતી વખતે શંભુનાથને 30 હજાર રૂપિયા આપ્યા. બાકીના 10 હજાર રૂપિયા પછીથી આપવાનું કહ્યું. 

એવો આરોપ છે કે દેશરાજ રૂપિયા આપવામાં આનાકાની કરી રહ્યો હતો. રૂપિયા ન મળતા શંભુનાથે દેશરાજ વિરુદ્ધ સેક્ટર-3 પોલીસ મથકમાં ફરિયાદ કરી. આ કેસની તપાસ સબ ઈન્સ્પેક્ટર મહેન્દ્રપાલને સોંપવામાં આવી. બીજી બાજુ રૂપિયા ન મળતા શંભુનાથનો પૌત્ર દેશરાજના ઘરેથી તેની ગાય લઈ આવ્યો. ગાય ગાયબ થવા પર દેશરાજે પણ પોલીસ ફરિયાદ કરી. 

ફરિયાદ પર મહેન્દ્રપાલે શંભુનાથને જેલમાં નાખી દેવાની ધમકી આપી. શંભુનાથે કેસ રફેદફે કરવા માટે સબ ઈન્સ્પેક્ટર મહેન્દ્ર પાલ સાથે વાત કરી તો તેણે 10 હજાર રૂપિયા માંગ્યા. જેના પર શંભુનાથે 4000 રૂપિયા શનિવારે આપ્યા. 2000 રૂપિયા રવિવારે આપ્યા તો મહેન્દ્ર પાલે વધુ પૈસા માંગ્યા. જેના પર શંભુનાથે સ્ટેટ વિજિલન્સ બ્યૂરોમાં તેની ફરિયાદ કરી. 

સોમવારે સ્ટેટ વિજિલન્સ બ્યૂરોના ઈન્સ્પેક્ટર સ્વર્ણલાલ અને ડ્યૂટી મેજિસ્ટ્રેટ વિનય અત્રી ટીમ સાથે સેક્ટર 3 પોલીસ ચોકી પાસે પહોંચ્યા. ત્યાં શંભુનાથે મહેન્દ્રપાલ સાથે ફોન પર વાત કરી તો તેણે તને કમ્યુનિટી સેન્ટર બોલાવ્યો. મહેન્દ્રપાલ ત્યાં પરિવાર સાથે લગ્ન સમારોહમાં સામેલ થવા આવ્યો હતો. 

જુઓ Video

શંભુનાથે ટીમ તરફથી અપાયેલા ચાર હજાર રૂપિયા મહેન્દ્ર પાલને કમ્યુનિટી સેન્ટરમાં જઈને આપતી વખતે ટીમને ઈશારો કરી દીધો. ટીમે આરોપી સબ ઈન્સ્પેક્ટરને રંગે હાથ પકડી લીધો. આ દરમિયાન આરોપીએ રૂપિયાને ગળી જવાનો પણ પ્રયત્ન કર્યો. જેવા તેણે રૂપિયા મોઢામાં નાખ્યા ટીમે તેના મોઢામાંથી બહાર કઢાવી લીધા. આ દરમિયાન ટીમે ખુબ મહેનત કરવી પડી. તેને જમીન પર સૂવાડીને દબાવવામાં આ્યો અને મોંઢામાં હાથ નાખીને રૂપિયા કાઢવામાં આવ્યા. આરોપીને સ્ટેટ વિજિલન્સ બ્યૂરો ફરીદાબાદમાં લાવવામાં આવ્યો. કોર્ટમાં હાજર કરાયા બાદ જેલમાં મોકલી દેવાયો છે.