ગુજરાતના વાતાવરણમાં મોટો પલટો : પંમચહાલ, વલસાડ, છોટાઉદેપુરમાં ગાજવીજ સાથે વરસાદ આવ્યો

વલસાડ જિલ્લામાં વહેલી સવારે વાપી ઉમરગામ અને સંઘ પ્રદેશ સેલવાસ દમણમાં ગાજવીજ સાથે ભારે વરસાદનું આગમન થયું છે. વરસાદ પડતાંની સાથે જ કેટલાક વિસ્તારોમાં વીજળી ડુલ થઈ ગઈ હતી. તો કેટલાક વિસ્તારમાં રસ્તા પર પાણી ભરાયા. જોકે, રસ્તાઓ પાણી પાણી થતા લોકો હરખાયા છે. વલસાડ જિલ્લાના અન્ય તાલુકામાં પણ વરસાદ પડવાની શક્યતા છે. વહેલી સવારથી જિલ્લામાં વાદળછાયુ વાતાવરણ છવાયુઁ છે. વરસાદના આગમનથી લોકોને ગરમીમાંથી રાહત મળી છે.   

આજે સવારથી છોટાઉદેપુર જિલ્લાના વાતાવરણમાં પલટો આવ્યો છે. બોડેલીના ચલામલીમાં ઝરમર ઝરમર વરસાદ શરૂ થયો છે. વહેલી સવારથી જ વાતાવરણમાં પલટા બાદ ઝરમર વરસાદ શરૂ થયો છે. જેથી વાતાવરણ ખુશ્નુમા બની ગયું છે. 

મોડી રાત્રે સુરતના અલગ અલગ વિસ્તારમાં વરસાદ જોવા મળ્યો હતો. વરસાદ પડતાં વાતાવરણમાં ઠંડક પ્રસરી છે. ક્યાંક ધીમી ધારે તો ક્યાંક ભારે વરસાદ જોવા મળ્યો હતો. ભારે પવન અને વીજળીના કડાકા સાથે વરસાદનું આગમન થયું છે.   

પંચમહાલ જિલ્લામાં પણ મેઘરાજાનું આગમન થયું છે. કાલોલ તાલુકામાં અચાનક વાતાવરણમાં મોટો પલટો આવ્યો છે. સવારથી જ મલાવ, મધવાસ, સણસોલી, દેલોલ જેવા અનેક વિસ્તારોમાં વરસાદનું આગમન થયું છે. વહેલી સવારથી અહીં ધીમીધારે વરસાદ શરૂ થયો છે. ત્યારે નગરજનોને ગરમીમાં આંશિક રાહત થતા તેઓ હરખાયા છે. આમ, ચોમાસાની વિધિવત શરૂઆત થતી હોય તેવા દ્રશ્યો અહીં જોવા મળ્યા.