DC vs RCB: ફિલ સોલ્ટની શાનદાર ઈનિંગ, દિલ્હી કેપિટલ્સે આરસીબીને 7 વિકેટે કારમો પરાજય આપ્યો

નવી દિલ્હીઃ ફિલ સોલ્ટની આક્રમક 87 રનની ઈનિંગની મદદથી દિલ્હી કેપિટલ્સે આઈપીએલ-2023ની 50મી લીગ મેચમાં રોયલ ચેલેન્જર્સ બેંગલોરને સાત વિકેટે કારમો પરાજય આપ્યો છે. દિલ્હીએ સીઝનની ચોથી જીત મેળવી છે અને પોતાની પ્લેઓફની આશા જીવંત રાખી છે. પ્રથમ બેટિંગ કરતા આરસીબીએ 20 ઓવરમાં 4 વિકેટે 181 રન બનાવ્યા હતા. જેના જવાબમાં દિલ્હી કેપિટલ્સે 16.4 ઓવરમાં 3 વિકેટે 187 રન બનાવી મેચ પોતાના નામે કરી હતી. 

ફિલ સોલ્ટનું વાવાઝોડું
લક્ષ્યનો પીછો કરવા ઉતરેલી દિલ્હી કેપિટલ્સે પાવરપ્લેમાં ધમાકેદાર શરૂઆત કરી હતી. ડેવિડ વોર્નર અને સોલ્ટે પાવરપ્લેમાં 70 રન જોડી દીધા હતા. વોર્નર 22 રન બનાવી હેઝલવુડનો શિકાર બન્યો હતો. દિલ્હીના અન્ય ઓપનર ફિલ સોલ્ટે 45 બોલમાં 8 ફોર અને 6 સિક્સ સાથે 87 રન ફટકાર્યા હતા. મિચેલ માર્શ 17 બોલમાં 26 રન બનાવી આઉટ થયો હતો. 

આ પણ વાંચોઃ IPL 2023: વિરાટ કોહલીએ રચ્યો ઈતિહાસ, આઈપીએલમાં પૂરા કર્યા 7 હજાર રન

રિલી રોસોએ 22 બોલમાં 3 સિક્સ અને એક ફોર સાથે અણનમ 35 રન ફટકાર્યા હતા. અક્ષર પટેલ 8 રન બનાવી અણનમ રહ્યો હતો. આરસીબી તરફથી હેઝલવુડ, હર્ષલ પટેલ અને કર્ણ શર્માએ એક-એક વિકેટ લીધી હતી. 

આરસીબીની શાનદાર શરૂઆત
પ્રથમ બેટિંગ કરવા ઉતરેલી રોયલ ચેલેન્જર્સ બેંગલોરને ફાફ ડુ પ્લેસિસ અને વિરાટ કોહલીએ શાનદાર શરૂઆત અપાવી હતી. બંનેએ પાવરપ્લેમાં 51 રન ફટકારી દીધા હતા. આરબીસીને પ્રથમ ઝટકો 82 રનના સ્કોર પર લાગ્યો હતો. ફાફ 45 રન બનાવી આઉટ થયો હતો. તેણે 32 બોલમાં પાંચ ચોગ્ગા અને એક સિક્સ ફટકારી હતી. ગ્લેન મેક્સવેલ શૂન્ય રન બનાવી આઉટ થયો હતો. 

આ પણ વાંચોઃ મુંબઈ ઈન્ડિયન્સે મને નથી બનાવ્યો... જસપ્રિત બુમરાહનું છલકાયું દર્દ

વિરાટ કોહલી અન લોમરોરની અડધી સદી
વિરાટ કોહલીએ 46 બોલમાં 5 બાઉન્ડ્રી સાથે 55 રન બનાવ્યા હતા. આરસીબી તરફથી લોમરોરે આક્રમક બેટિંગ કરી હતી. લોમરોરે 29 બોલમાં 6 ફોર અને ત્રણ સિક્સ સાથે અણનમ 54 રન ફટકાર્યા હતા. દિનેશ કાર્તિકે 9 બોલમાં 11 રન બનાવ્યા હતા. અનુજ રાવત 8 રન બનાવી અણનમ રહ્યો હતો. દિલ્હી તરફથી મિચેલ માર્શે બે, મુકેશ કુમાર અને ખલીલ અહમદે એક-એક વિકેટ ઝડપી હતી.