മക്കളെ ഉപേക്ഷിച്ച് കാമുകനൊപ്പം പോയ സ്ത്രീയെയും സുഹൃത്തിനെയും പോലീസ് അറസ്റ്റ് ചെയ്തു

വിളപ്പിൽശാല: മക്കളെ ഉപേക്ഷിച്ച് കാമുകനൊപ്പം പോയ സ്ത്രീയെയും സുഹൃത്തിനെയും പോലീസ് അറസ്റ്റ് ചെയ്തു.  ഉറിയാക്കോട് അരശുംമൂട് സ്വദേശി  ശ്രീജ (28) ഇവരുടെ ആൺ സുഹൃത്ത് കോട്ടൂർ ആതിരാ ഭവനിൽ വിഷ്ണു (34) എന്നിവരെയാണ് പോലീസ് അറസ്റ്റ് ചെയ്തത്. 8 ഉം 3ഉം വയസ്സുള്ള കുട്ടികളെ രാവിലെ അരശുംമൂട്  ജംഗ്ഷനിൽ നിന്നും സ്കൂൾ ബസ്സിൽ കയറ്റി വിട്ട ശേഷം ശ്രീജ വിഷ്ണുവിനൊപ്പം കടന്നു കളയുകയായിരുന്നു. തുടർന്ന് ഇരുവരും കന്യാകുമാരി അടക്കമുള്ള സ്ഥലങ്ങളിൽ കറങ്ങുകയായിരുന്നെന്ന് പോലീസ് പറയുന്നു.

മൂന്ന് വയസ്സുകാരിയായ കുട്ടി സ്കൂൾ ബസ്സിറങ്ങുന്ന സ്ഥലത്ത് അമ്മയെ കാണാതെ കരയാൻ ആരംഭിച്ചതാണ് സംഭവത്തിലേക്ക് പോലീസിനെ എത്തച്ചത്.  സ്കൂളിലെ ജീവനക്കാരിയാണ് കരഞ്ഞ് വഴിയിൽ നിന്ന കുഞ്ഞിനെ വീട്ടിൽ എത്തിച്ചത്. കുഞ്ഞിനെ വഴിയിൽ ഉപേക്ഷിച്ച ശ്രീജയെയും ആൺ സുഹൃത്ത് വിഷ്ണുവിനെയും ജുവനയിൽ ജസ്റ്റിസ് ആക്ട് പ്രകാരം വിളപ്പിൽശാല പോലീസ് അറസ്റ്റ് ചെയ്തു. കാട്ടാക്കട കോടതിയിൽ ഹാജരാക്കിയ ഇരുവരെയും കോടതി റിമാൻഡ് ചെയ്തു.