അഹമ്മദാബാദ്: കേന്ദ്രനിയമം കാറ്റില്‍പ്പറത്തി ഗുജറാത്ത് സര്ക്കാര്...
നഗരങ്ങളില്‍ യാത്രക്കാര്‍ക്ക് താത്പര്യമുണ്ടെങ്കില്‍ മാത്രം ഹെല്‍മെറ്റ് ധരിച്ചാല്‍ മതിയെന്ന്‍ ഗുജറാത്ത് സര്ക്കാര്...
സംസ്ഥാനത്തെ കോര്‍പ്പറേഷന്‍, മുനിസിപ്പാലിറ്റി പരിധികളില്‍ ഇരുചക്രവാഹനം ഓടിക്കുന്നവര്‍ക്ക് ഹെല്‍മെറ്റ് നിര്‍ബന്ധമാക്കേണ്ടെന്നാണ് മന്ത്രിസഭായോഗം തീരുമാനമെടുത്തിരിക്കുന്നത്. കേന്ദ്ര ഗതാഗതനിയമത്തെ മറികടന്നാണ് ഗുജറാത്തിലെ ബിജെപി സര്‍ക്കാരിന്‍റെ ഈ തീരുമാനം.
ജനങ്ങളില്‍ നിന്നുണ്ടായ എതിര്‍പ്പും ബുദ്ധിമുട്ടുകളും മാനിച്ചാണ് സര്ക്കാര് ഈ തീരുമാനം കൈക്കൊണ്ടിരിക്കുന്നത്.
നഗരത്തിലുള്ളവര്‍ അധികം ദൂരം ഇരുചക്രവാഹനങ്ങളില്‍ സഞ്ചരിക്കുന്നവരല്ലെന്നാണ് നിയമ ഭേദഗതിയ്ക്ക്‌ കാരണമായി ഗതാഗതമന്ത്രി ആര്‍.സി. ഫല്‍ദു ചൂണ്ടിക്കാട്ടിയത്.
അതേസമയം, പഞ്ചായത്ത് പ്രദേശങ്ങളിലും ദേശീയ, സംസ്ഥാന പാതകളിലും ഹെല്‍മെറ്റ് ധരിക്കാതെ ഇരുചക്ര വാഹനമോടിച്ചാല്‍ പിഴ ഇടാക്കും.
സെപ്റ്റംബര്‍ 1 മുതലാണ് രാജ്യത്ത് ഗതാഗതനിയമം കര്‍ശനമാക്കിയത്. എന്നാല്‍, ഗതാഗതനിയമങ്ങള്‍ക്ക് കേന്ദ്രം ഏര്‍പ്പെടുത്തിയ കനത്തപിഴ ആദ്യം വെട്ടിക്കുറച്ചത് ഗുജറാത്ത് സര്‍ക്കാരാണ്. ഇതിനു പിന്നാലെയാണ് ഇപ്പോള്‍ നഗരപരിധിയില്‍ ഹെല്‍മെറ്റും നിര്‍ബന്ധമല്ലാതാക്കുന്നത്.
