അഹമ്മദാബാദ്: പ്രധാനമന്ത്രിയുടെ തട്ടകമായ ഗുജറാത്തില്‍ പ്രതിപക്ഷ സഖ്യത്തിന് തുടക്കം കുറിച്ച് കോൺഗ്രസ് ഉപാധ്യക്ഷൻ രാഹുല്‍ ഗാന്ധിയുടെ നേതൃത്വത്തിൽ ഇന്ന് റാലി നടക്കും. ഗാന്ധിനഗറിലാണ് "നവ്സര്‍ജന്‍ ജനാദേശ് മഹാസമ്മേളന്‍" റാലി നടക്കുക.
രാഹുല്‍ ഗാന്ധി ഇന്ന് പാട്ടിദാര്‍ നേതാവ് ഹാര്‍ദിക് പട്ടേലുമായി കൂടിക്കാഴ്ച നടത്തും. ഒബിസി നേതാവ് അൽപേഷ് താകോര്, ഒബിസി യൂനിറ്റി ഫ്രണ്ട് റാലിയ്ക്ക് ശേഷം ഔദ്യോഗികമായി കോണ്‍ഗ്രസ് പാര്‍ട്ടിയില്‍ ചേരും.
അൽപേഷിന് പുറമെ കോൺഗ്രസ് സഖ്യസാധ്യതയുമായി സമീപിച്ച ദലിത് നേതാവ് ജിഗ്നേഷ് മേവാനിയും പാട്ടീദാർ നേതാവ് ഹർദിക് പട്ടേലും തങ്ങളുടെ അന്തിമതീരുമാനം അറിയിച്ചിട്ടില്ല. കോൺഗ്രസ് നേതാവ് ഭാരത് സിങ് സോളങ്കിയാണ് രാഹുലിന്‍റെ നിർദേശപ്രകാരം ചർച്ചകൾക്ക് നേതൃത്വം കൊടുക്കുന്നത്. കോൺഗ്രസ് നേതാക്കള്‍ തങ്ങളുമായി ചർച്ചയിലാണെന്ന് ഇരുവരും സമ്മതിച്ചിട്ടുമുണ്ട്.
അതേസമയം, ഹർദിക് പട്ടേലിന്‍റെ അനുയായികളായ വരുൺ പട്ടേൽ, രേഷ്മ പട്ടേൽ എന്നിവർ ബിജെപിയിൽ ചേർന്നു.
കൂടാതെ രാഹുല്‍ ഗാന്ധി ജനതാദള്‍ (യു) നേതാവ് ചോട്ടു വസവയേയും സന്ദര്‍ശിക്കും.
