Highcourt Staff Suspension: നാടകത്തിൽ രാജ്യത്തിനും പ്രധാനമന്ത്രിക്കും അപമാനം; ഹൈക്കോടതി ജീവനക്കാർക്ക് സസ്പെൻഷൻ

കൊച്ചി: ഹൈക്കോടതിയിലെ റിപ്പബ്ലിക് ദിനാഘോഷങ്ങളുടെ ഭാഗമായി നടന്ന നാടകത്തിൽ  രാജ്യത്തെയും പ്രധാനമന്ത്രിയെയും അപമാനിച്ചെന്ന പരാതിയിൽ  ഹൈക്കോടതി ജീവനക്കാർക്ക് സസ്പെൻഷൻ. അസി രജിസ്ട്രാർ  ടിഎ സുധീഷ്, കോർട്ട് കീപ്പർ പിഎം സുധീഷ് എന്നിവരെയാണ് അന്വേഷണ വിധേയമായി ഹൈക്കോടതി ചീഫ് ജസ്റ്റിസ് സസ്പെൻഡ് ചെയ്തത്.

അസി. റജിസ്ട്രാർ ടിഎ സുധീഷ് തന്നെയാണ് നാടകം രചിച്ചതും. ലീഗൽ സെല്ല്, ഭാരതീയ അഭിഭാഷക പരിഷത്ത് എന്നിവരുടെ പരാതിയിലാണ് സസ്പെൻഷൻ. സംഭവം ഹൈക്കോടതിയുടെ വിജിലൻസ് റജിസ്ട്രാറും അന്വേഷിക്കും. 'വണ്‍ നേഷൻ, വണ്‍ വിഷൻ, വണ്‍ ഇന്ത്യ' എന്ന പേരിട്ട ഒരു മണിക്കൂർ ദൈർഘ്യമുള്ള നാടകത്തില്‍ ഒൻപതു മിനിറ്റ് രാജ്യത്തെയും പ്രധാനമന്ത്രിയെയും അപമാനിച്ചുവെന്നാണ് ചീഫ് ജസ്റ്റിസിന് ലഭിച്ച പരാതി.

പ്രധാനമന്ത്രി നരേന്ദ്ര മോദിയുടെ വാക്കുകളുടെ പ്രയോഗ രീതി, കേന്ദ്രപദ്ധതികൾ, സ്വാതന്ത്ര്യത്തിന്റെ അമൃത വർഷാഘോഷം എന്നിവയെല്ലാം നാടകത്തില്‍ അധിക്ഷേപിച്ചതായും പരാതിയില്‍ പറയുന്നു. കേരള ഹൈക്കോടതിയിലെ ജീവനക്കാരും അഡ്വ.ജനറല്‍ ഓഫിസിലെ ജീവനക്കാരും ചേർന്നാണ് നാടകം അവതരിപ്പിച്ചത്. വിശദമായ അന്വേഷണത്തിന് ശേഷം മാത്രമെ ഇത് സംബന്ധിച്ച് കൂടുതൽ നടപടികളിലേക്ക് കടക്കൂ എന്നാണ് സൂചന.