Mohanlal: മോഹൻലാലിന് മൂന്നാമൂഴം; അമ്മ പ്രസിഡന്റാകുന്നത് എതിരില്ലാതെ, ജനറല്‍ സെക്രട്ടറിയ്ക്കായി കടുത്ത മത്സരം

മലയാള താരസംഘടനയായ അമ്മയുടെ പ്രസിഡന്റായി മോഹൻലാലിനെ വീണ്ടും തിരഞ്ഞെടുത്തു. എതിരില്ലാതെയാണ് മോഹൻലാൽ തിരഞ്ഞെടുക്കപ്പെട്ടത്. മൂന്നാം തവണയാണ് മോഹൻലാൽ അമ്മയുടെ പ്രസിഡന്റാകുന്നത്. പ്രസിഡന്റ് സ്ഥാനത്ത് നിന്ന് മാറി നിൽക്കാൻ മോഹന്‍ലാൽ സന്നദ്ധത അറിയിച്ചിരുന്നു. എന്നാല്‍ താരം തുടരണമെന്ന് മറ്റുള്ളവര്‍ ആവശ്യപ്പെടുകയായിരുന്നു.

അതേസമയം അമ്മ ജനറല്‍ സെക്രട്ടറി സ്ഥാനത്തേക്ക് കടുത്ത മത്സരം നടക്കും. സിദ്ദിഖ് , കുക്കു പരമേശ്വരൻ , ഉണ്ണി ശിവപാൽ  എന്നിവരാണ് ജനറല്‍ സെക്രട്ടറി സ്ഥാനത്തേക്ക് മത്സരിക്കുന്നത്. അമ്മ വൈസ് പ്രസിഡന്‍റ് സ്ഥാനത്തേക്ക് ജഗദീഷ്, മഞ്ജുപ്പിള്ള, ജയൻ ചേർത്തല എന്നിവരും മത്സരിക്കുന്നുണ്ട്.

വിവിധ സ്ഥാനങ്ങളിലേക്ക് 40 ഓളം പേര്‍ നോമിനേഷന്‍ സമര്‍പ്പിച്ചിട്ടുണ്ടന്നാണ് വിവരം. ജൂണ്‍ 3 മുതലാണ് നോമിനേഷൻ സ്വീകരിക്കാന്‍ ആരംഭിച്ചത്.  ജൂണ്‍ 30 നാണ് അമ്മയുടെ വാര്‍ഷിക ജനറല്‍ ബോഡി യോഗം. അമ്മയുടെ ജനറൽ സെക്രട്ടറി സ്ഥാനത്ത് ഇത്രയും നാൾ ഇടവേള ബാബു ആയിരുന്നു ഉണ്ടായിരുന്നത്. 25 വര്‍ഷത്തിന് ശേഷമാണ് അമ്മ ഭാരവാഹിത്വത്തില്‍ നിന്ന് ഇടവേള ബാബു മാറുന്നത്.