റിയോ :ഒളിംപിക്സ് വനിതാ ബാഡ്മിന്റണ്‍ സിംഗിള്‍സില്‍ ഇന്ത്യയുടെ പി.വി സിന്ധുവിന് വെള്ളി. ഇന്നലെ നടന്ന ഫൈനല്‍ പോരാട്ടത്തില്‍ ലോക ഒന്നാം നമ്പര്‍ താരമായ സ്പെയിനിന്‍റെ കരോലിന മരിനോട്‌ പൊരുതിയാണ് സിന്ധു കീഴടങ്ങിയത്. സ്കോര്‍: 21-19, 12-21, 15-21.
ആദ്യ സെറ്റ് സ്വന്തമാക്കിയ സിന്ധുവിന് പിന്നീടുള്ള രണ്ടുസെറ്റുകളും നഷ്ടമാവുകയായിരുന്നു.ഇന്ത്യയുടെ ചരിത്രത്തില്‍ ആദ്യമായാണ് ഒരു വനിതാ താരം ഒളിംപിക്സ് ബാഡ്മിന്റണില്‍ വെള്ളി മെഡല്‍ നേടുന്നത്.16-19 പിന്നിട്ടു നിന്ന ശേഷം ശക്തമായ തിരിച്ചു വരവ് നടത്തിയ സിന്ധു തുടരെ അഞ്ചു പോയിന്റ്‌ നേടി 21-19 ന് ആദ്യ സെറ്റ് സ്വന്തമാക്കി. എന്നാല്‍, രണ്ടാം സെറ്റില്‍ സിന്ധുവിന് കഠിനമായിരുന്നു. അത്മവിശ്വാസത്തോടെ കളിച്ച കരോലിനയുടെ സ്മാഷുകള്‍ക്ക് മുന്നില്‍ സിന്ധുവിന് കാലിടറുകയായിരുന്നു.
മൂന്നാം സെറ്റിലും 10-10 എന്ന സ്കോറില്‍ ഒപ്പത്തിനൊപ്പമായിരുന്നു സിന്ധു. പിന്നീടങ്ങോട്ട് കരോലിന മികച്ച മുന്നേറ്റം നടത്തി കളിയും സെറ്റും സ്വന്തമാക്കുകയായിരുന്നു. ഇതോടെ, റിയോ ഒളിംപിക്സില്‍ ഇന്ത്യയ്ക്ക് രണ്ടു മെഡലുകളായി. നേരത്തെ ഗുസ്തിയില്‍ സാക്ഷി മാലിക്ക് വെങ്കലം സ്വന്തമാക്കിയിരുന്നു. മെഡല്‍ പട്ടികയില്‍ ഇന്ത്യ 61 ആം സ്ഥാനത്താണ്.
