ഖത്തർ ലോകകപ്പിലെ ഗ്രൂപ്പ് ഘട്ടത്തിൽ എല്ലാ ടീമുകൾക്കും ഓരോ കളി കൂടി മാത്രം ബാക്കി നിൽക്കെ പ്രീ ക്വാർട്ടർ ഉറപ്പിച്ചത് മൂന്ന് ടീമുകൾ മാത്രം . അതായത് കളിച്ച രണ്ട് മത്സരവും ജയിച്ചത് ബ്രസീലും ഫ്രാൻസും പോർച്ചുഗലും മാത്രം . അവസാന മത്സരത്തിന് പോകുന്നതിന് മുൻപ് പ്രീ ക്വാർ്ടറിലെ എതിരാളി ആരെന്നേ നിലവിലെ ചാമ്പ്യൻമാരായ ഫ്രാൻസിനും കൂടുതൽ തവണ കപ്പ് നേടിയ ബ്രസീലിനും റോണാൾഡോയുടെ പോർച്ചുഗലിനും അറിയേണ്ടതുള്ളൂ . പ്രീ ക്വാർട്ടറിലേക്കുള്ള മത്സരത്തിന് ഇനി സാധ്യത ഇല്ലാത്തത് ഖത്തർ, കാനഡ എന്നിവർക്കാണ് . പ്രീ ക്വാർട്ടറിലെ ബാക്കിയുള്ള 13 സ്ഥാനങ്ങളിലേക്ക് ശേഷിക്കുന്ന 27 ടീമുകൾക്കും നേരിയ സാധ്യതയെങ്കിലും ഇനിയുമുണ്ട് .
ഗ്രൂപ്പ് A
ഇക്വഡോർ vs സെനഗൽ
നെതർലൻഡ്സ് vs ഖത്തർ
4 പോയിന്റുമായി നെതർലൻഡ്സും ഇക്വഡോറുമാണ് മുന്നിലെങ്കിലും ഇക്വഡോറിനെ തോൽപ്പിച്ചാൽ സെനഗലിന് പ്രീ ക്വാർട്ടറിൽ ഇടം കിട്ടും .പുറത്തായെങ്കിലും ഖത്തറിന് മറ്റ് മൂന്ന് ടീമുകളുടെ വഴി മുടക്കാനാവും .
നെതർലൻഡ്സിനെ ഖത്തർ തോൽപ്പിക്കുകയോ സമനിലയിൽ പിടിക്കുകയോ ചെയ്താൽ കാര്യങ്ങൾ തകിടം മറിയും .
ഗ്രൂപ്പ് B
ഇംഗ്ളണ്ട് vs വെയിൽസ്
ഇറാൻ vs അമേരിക്ക
വെയിൽസിനോട് വലിയ മാർജിനിൽ തോറ്റാൽ മാത്രമേ പോയിംന്റിലും ഗോൾ ശരാശരിയിലും മുന്നിലുള്ള ഇംഗ്ളണ്ട് പുറത്താവൂ . സമനില മതി ഇംഗ്ളണ്ടിന് .ഇറാൻ-അമേരിക്ക മത്സരത്തിൽ ജയിക്കുന്നവർക്ക് പ്രീ ക്വാർട്ടർ ഉറപ്പാണ് .
ഗ്രൂപ്പ് C
അർജന്റീന vs പോളണ്ട്
സൗദി അറേബ്യ vs മെക്സിക്കോ
ആദ്യ കളിയിൽ സൗദിയോട് തോറ്റ അർജന്റീനക്ക് പോളണ്ടിനെ തോൽപ്പിച്ചാൽ പ്രീ ക്വാർട്ടർ ഉറപ്പാണ് . തോറ്റാൽ അർജന്റീന പുറത്താവും .പോളണ്ടുമായി സമനില പാലിച്ചാൽ സൗദി-മെക്സിക്കോ മത്സരമാവും മെസിയുടേയും കൂട്ടരുടേയും വിധി നിർണയിക്കുക. രണ്ട് കളികളും സമനില ആയാൽ അർജന്റീനക്ക് മുന്നോട്ടുള്ള യാത്രക്ക് തടസം കുറവാണ് .
ഗ്രൂപ്പ് D
ഫ്രാൻസ് vs ടുണീഷ്യ
ഡെന്മാർക്ക് vs ഓസ്ട്രേലിയ
ഫ്രാൻസ് ഉറപ്പിച്ചതിനാൽ ഒരാൾക്ക് മാത്രമേ ഇനി പ്രീ ക്വാർട്ടറിലേക്ക് അവസരം ഉള്ളൂ. ഡെന്മാർക്ക്-ഓസ്ട്രേലിയ മത്സരത്തിലെ വിജയിക്കാവും അവസരം . കളി സമനില ആയാൽ ഓസ്ട്രേലിയ പ്രീ ക്വാർട്ടറിൽ എത്തും. ഫ്രാൻസിനെ തോൽപ്പിച്ചാൽ പോലും ടുണീഷ്യയുടെ കാര്യം ഉറപ്പില്ല.
ഗ്രൂപ്പ് E
സ്പെയിൻ vs ജപ്പാൻ
ജർമനിvs കോസ്റ്ററിക്ക
ആർക്കു വേണമെങ്കിലും പ്രീ ക്വാർട്ടറിൽ എത്താം . സ്പെയിൻ-ജപ്പാൻ മത്സരത്തിലെ വിജയിക്കും ,ജർമ്മനി-കോസ്റ്ററിക്ക കളിയിൽ ജയിക്കുന്നവർക്കും പ്രീ-ക്വാർട്ടർ ഉറപ്പാണ് . എന്നാൽ സമനില കാര്യങ്ങൾ മാറ്റി മറിക്കും .സ്പെയിന് ഒരു സമനില മതി മുന്നേറാൻ.എന്നാൽ ജയിച്ചില്ലെങ്കിൽ ജർമ്മനി പുറത്താണ് .രണ്ട് മത്സരവും സമനില ആയാൽ സ്പെയിനും ജപ്പാനും മുന്നേറാം.
ഗ്രൂപ്പ് F
ക്രൊയേഷ്യvs ബെൽജിയം
മൊറോക്കോ vs കാനഡ
ക്രൊയേഷ്യക്കും മൊറോക്കോക്കും സമനില മതി പ്രീ ക്വാർട്ടറിൽ എത്താൻ. എന്നാൽ ബെൽജിയത്തിന് ക്രൊയേഷ്യയെ തോൽപ്പിക്കേണ്ടിവരും .അതല്ലെങ്കിൽ കാനഡ വലിയ മാർജിനിൽ മൊറോക്കോയെ തോൽപ്പിക്കണം .
ഗ്രൂപ്പ് G
ബ്രസീൽ vs കാമറൂൺ
സെർബിയ vs സ്വിറ്റ്സർലണ്ട്
സെർബിയ-സ്വിറ്റ്സർലണ്ട് മത്സര വിജയി ബ്രസീലിനൊപ്പം പ്രീ ക്വാർട്ടറിൽ എത്തും . ബ്രസീലിനെ തോൽപ്പിച്ചാൽ പോലും കാമറൂണിന്റെ മുന്നേറ്റം ഉറപ്പല്ല. ബ്രസീൽ കാമറൂണിനോട് തോറ്റില്ലെങ്കിൽ സെർബിയയെ സമനിലയിൽ പിടിച്ചാലും സ്വിറ്റ്സർലണ്ട് മുന്നേറും.
ഗ്രൂപ്പ് H
പോർച്ചുഗൽ vs ദക്ഷിണ കൊറിയ
ഘാന vs ഉറുഗ്വേ
പോയിന്റിലും ഗോൾ ശരാശരിയിലും പിന്നിലാണെങ്കിലും ഉറുഗ്വേക്ക് ഇനിയും സാധ്യതയുണ്ട്.പക്ഷേ മൂന്ന് പോയിന്റുമായി രണ്ടാമതുള്ള ഘാനയെ തോൽപ്പിക്കണം . അത് മാത്രമല്ല പോർച്ചുഗൽ ദക്ഷിണകൊറിയയോട് തോൽക്കരുത് .പോർച്ചുഗൽ തോറ്റാൽ ഗോൾ ശരാശരി ഉറുഗ്വേക്ക് എതിരാകും . രണ്ട് മത്സരവും സമനില ആയാൽ പോർച്ചുഗലിനൊപ്പം ഘാന മുന്നേറും.
ഏറ്റവും പുതിയ വാർത്തകൾ ഇനി നിങ്ങളുടെ കൈകളിലേക്ക്... മലയാളത്തിന് പുറമെ ഹിന്ദി, തമിഴ്, തെലുങ്ക്, കന്നഡ ഭാഷകളില്‍ വാര്‍ത്തകള്‍ ലഭ്യമാണ്. ZEEHindustanApp ഡൗൺലോഡ് ചെയ്യുന്നതിന് താഴെ കാണുന്ന ലിങ്കിൽ ക്ലിക്കു ചെയ്യൂ...
