19 Nov 2024, 08:26 वाजता
गडकरी, फडणवीसांचा राज्यभर प्रचाराचा झंझावात; सभांचा आकडा पाहून व्हाल थक्क
केंद्रीय मंत्री नितीन गडकरी यांनी राज्यात 13 दिवसात 72 सभा घेतल्या. तर उपमुख्यमंत्री देवेंद्र फडणवीस यांनीही प्रचाराच्या झंझावातामध्ये राज्यभरात 64 सभा घेतल्या.
19 Nov 2024, 08:26 वाजता
विदर्भातील मोठ्या नेत्यांनी नेमक्या किती सभा घेतल्या?
पंतप्रधान नरेंद्र मोदी - 2 सभा (चंद्रपूर, अकोला )
केंद्रीय गृहमंत्री अमित शहा - 4 (चंद्रपूर, अमरावती, यवतमाळ, बुलडाणा)
विरोधी पक्षनेते राहुल गांधी - 4 (चंद्रपूर, अमरावती, गोंदिया, नागपूर)
प्रियंका गांधी - 2 (गडचिरोली, नागपूर -2 रॊड शो )
शरद पवार - 4 (वर्धा, गोंदिया, नागपूर -2)
उद्धव ठाकरे - 8 (अमरावती -3, यवतमाळ -2, अकोला -1, वाशिम -1, बुलढाणा -1)
19 Nov 2024, 08:21 वाजता
मुंबईत मतदारांची संख्या किती
विधानसभेच्या निवडणुकांसाठीचा राज्यात प्रचार थंडावला असून आता मतदानाची तयारी सुरू झाली आहे. मुंबईत विधानसभेचे 36 मतदारसंघ आहेत. प्रत्यक्ष मतदान सुरू होण्यापूर्वी मुंबईतील 85 वर्षावरील सहा हजार 272 ज्येष्ठ मतदारांनी गृहमतदानाचा हक्क बजावला आहे. मतदान केंद्रांवर जवळपास 46 हजार 816 कर्मचारी नियुक्त करण्यात आले असून बंदोबस्तासाठी 25 हजार 696 पोलिस अधिकारी, कर्मचारी तैनात करण्यात आले आहेत. जवळपास एक कोटींपेक्षा जास्त मतदार मुंबईत आहेत.
19 Nov 2024, 08:19 वाजता
आज-उद्या पुण्यातील वाहतुकीत बदल
उद्या होणाऱ्या मतदान साहित्याचे वाटप आज पासून सुरू होत आहे त्यामुळे पुण्यातील स्वारगेट भागात आज आणि उद्या वाहतुकीत बदल करण्यात आलेला आहे. गणेश कला क्रीडा रंगमंच येथे उभारण्यात आलेल्या निवडणूक केंद्रातून मोठ्या संख्येने मतदान साहित्य वाटप हे पीएमपीएल बसने करण्यात येणार आहे. त्यामुळे जेधे चौक, सारसबाग, स्वारगेट भागतील वाहतूक उद्या सायंकाळपर्यंत बंद असणार आहे. नागरिकांनी पर्याय रस्त्याचा वापर करण्याचे आव्हान ही वाहतूक शाखेकडून करण्यात आले आहे.
19 Nov 2024, 08:19 वाजता
राहुल गांधींना 2 डिसेंबरला पुणे न्यायालयात हजर राहण्याचे आदेश
स्वातंत्र्यवीर सावरकर यांच्याविषयी अवमानकारक वक्तव्य केल्याप्रकरणी काँग्रेसचे नेते राहुल गांधी यांना पुण्यातील विशेष न्यायालयात हजर राहण्याचे समन्स बजाविण्यात आले आहे. गांधी यांना सोमवारी न्यायालयात हजर राहण्याचे आदेश देण्यात आले होते. मात्र, ते प्रचारात व्यस्त असल्याने न्यायालयात हजर राहू शकले नाहीत, असे त्यांच्या वकिलांनी न्यायालयात सांगितले. त्यानंतर गांधी यांना 2 डिसेंबर रोजी न्यायालयात हजर राहण्याचे आदेश प्रथमवर्ग न्यायदंडाधिकारी यांनी दिले. स्वातंत्र्यवीर सावरकर यांचे नातू सात्यकी सावरकर यांनी पुण्यातील न्यायालयात अवमानकारक वक्तव्य केल्याप्रकरणी गांधी यांच्याविरुद्ध दावा दाखल केला आहे.
19 Nov 2024, 08:15 वाजता
अनिल देशमुखांवरील हल्ल्यानंतर शरद पवारांच्या पक्षाची पहिली प्रतिक्रिया
राज्यात कायदा सुव्यवस्थेचे तीन तेरा वाजले आहेत. लोकशाहीचे धिंडवडे उडवले जात आहेत. याचे उदाहरण आज निवडणुकीच्या सांगता सभेवरून घरी परतताना राज्याचे माजी गृहमंत्री तसेच राष्ट्रवादी काँग्रेस पक्ष शरदचंद्र पवार पक्षाचे नेते अनिल देशमुख यांच्यावर झालेल्या भ्याड हल्ल्यातून समोर आले. या घटनेचा राष्ट्रवादी काँग्रेस पक्ष- शरदचंद्र पवार पक्षाच्यावतीने जाहीर निषेध करण्यात येत आहे.
19 Nov 2024, 08:15 वाजता
मुंबईत 76 क्रिटिकल मतदान केंद्रे; पण क्रिटिकल मतदान केंद्र म्हणजे काय?
मुंबई व उपनगरातील ज्या मतदान केंद्रांवर मागील निवडणुकांमध्ये 10 टक्क्यांपेक्षा कमी मतदान झाले आहे, अशा 76 केंद्रांना आता क्रिटिकल मतदान केंद्रे म्हणून घोषित करण्यात आले आहे. यातील 13 केंद्रे शहर विभागात, तर 63 केंद्रे उपनगरात असल्याची माहिती पालिका आयुक्त तथा मुख्य निवडणूक अधिकारी भूषण गगराणी यांनी दिली. निवडणूक आयोगाच्या 6 निकषांप्रमाणे या केंद्रांची निश्चिती करण्यात आली असून, यंदा येथील मत टक्का वाढविण्यासाठी प्राधान्याने प्रयत्न केले जाणार आहेत, अशी माहिती गगराणी यांनी दिली.
19 Nov 2024, 08:10 वाजता
उद्या मुंबई मेट्रो उशीरापर्यंत धावणार
निवडणूक कर्तव्यावरील कर्मचाऱ्यांना त्यांच्या वेळेत कामावर पोहोचता यावे, तसेच मतदान प्रक्रिया पार पडल्यानंतर घरी जाता यावे यासाठी मेट्रो अंधेरी पश्चिम ते दहिसर पूर्व मेट्रो 2 अ आणि गुंदवली ते दहिसर पूर्व मेट्रो 7 मार्गिकेवर 20 नोव्हेंबरला मेट्रो गाड्या पहाटे लवकर आणि रात्री उशिरापर्यंत चालविण्याचा निर्णय घेतला आहे. मतदानादिवशी पहिली मेट्रो गाडी पहाटे 4 वाजता स्थानकातून सुटेल. तर, शेवटची गाडी मध्यरात्री 1 वाजता स्थानकातून सुटणार आहे, अशी माहिती महा मुंबई मेट्रोकडून देण्यात आली. तसेच या वाढीव कालावधीत दर 20 मिनिटांनी गाडी धावेल.
19 Nov 2024, 08:10 वाजता
मतदान केंद्रावर मोबाईल नेता येणार की नाही? मुंबई उच्च न्यायालयाने दिला महत्त्वाचा निर्णय
विधानसभा निवडणुकीच्या पार्श्वभूमीवर मतदान केंद्रावर मोबाईल घेऊन जाण्यास बंदी घालण्याचा निवडणूक आयोगाचा निर्णय कोणत्याही दृष्टीने बेकायदेशीर नाही, असे मुंबई उच्च न्यायालयाने सोमवारी स्पष्ट केले. तसेच, निवडणूक आयोगाच्या निर्णयात हस्तक्षेपास नकार देताना या निर्णयाला आव्हान देणारी महाराष्ट्र नवनिर्माण सेनेनं केलेली जनहित याचिका न्यायालयाने फेटाळली.
19 Nov 2024, 08:07 वाजता
महाराष्ट्रातील 'या' भागात पारा 12.6 अंश सेल्सिअसवर
उत्तरेकडून येणाऱ्या वाऱ्यामुळे राज्याच्या बहुतेक भागात किमान तापमानात घट झाली आहे. सोमवारी (18 नोव्हेंबर) नगर येथे राज्यात सर्वांत कमी 12.6 अंश सेल्सिअसची नोंद झाली आहे. पुढील काही दिवस थंडी कायम राहण्याचा अंदाज असून, राज्यात किमान तापमान 13 ते 15 अंश सेल्सिअस दरम्यान राहण्याचा अंदाज आहे.
