PHOTO : अजून 'खासदार' न झालेल्या सुजय विखेंच्या कार्यकर्त्यांची 'लगीनघाई' व्हायरल

अहमदनगर : दक्षिण मतदारसंघातील भाजपाचे उमेदवार डॉ. सुजय विखे-पाटील यांच्या समर्थकांना सुजय यांना खासदार म्हणून पाहण्याची भलतीच घाई झाली आहे. लोकसभा निवडणुकीचा निकाल लागण्याआधीच एका लग्नपत्रिकेत त्यांचा उल्लेख 'खासदार' असा करण्यात आला आहे. त्यामुळं आश्चर्य व्यक्त होत आहे. 

हीच ती लग्नपत्रिका

गावाकडच्या लग्न सोहळ्यांमध्ये स्थानिक आमदार, खासदार आणि नेते मंडळींची हजेरी ही प्रतिष्ठेची बाब समजली जाते. अनेक लोकप्रतिनिधी आपापल्या मतदारसंघांतील महत्त्वाच्या लग्न सोहळ्यांना आवर्जून उपस्थित राहत असतात. त्यामुळं लग्नपत्रिकेमध्येच 'प्रमुख पाहुणे' म्हणून त्यांची नावे छापली जातात. 

हीच ती लग्नपत्रिका

या प्रथेप्रमाणेच नगरमधील श्रीगोंदा तालुक्यातील एका लग्नपत्रिकेत सुजय विखे यांचं नाव छापण्यात आलं आहे. मात्र, ते छापताना त्यांचा उल्लेख 'संसद सदस्य भारत सरकार' असा करण्यात आला आहे. ही लग्नपत्रिका सोशल मीडियावर प्रचंड व्हायरल झाली आहे.