कोविड-१९। मुंबई पोलिसांना सेवा निवासस्थान ठेवण्याची राज्य सरकारची मुभा
मुंबईत कोरोना नियंत्रणात येत आहे. मात्र, अद्याप धोका संपलेला नाही.
)
मुंबई : राज्यात कोरोना विषाणूचा प्रादुर्भाव कायम आहे. मुंबईत कोरोना नियंत्रणात येत आहे. मात्र, अद्याप धोका संपलेला नाही. त्यामुळे मुंबई पोलीस आयुक्तालयाअंतर्गत पोलीस अधिकारी आणि कर्मचाऱ्यांना जोपर्यंत कोविड-१९ प्रादुर्भाव संपत नाही, तोपर्यंत त्यांची सेवा निवासस्थाने त्यांच्याकडे ठेवण्याची मुभा देण्यात आली आहे, अशी माहिती राज्याचे गृहमंत्री अनिल देशमुख यांनी दिली.
दरम्यान, या निर्णयाचा लाभ बदली, सेवानिवृत्ती, वैद्यकीय अपात्रता झालेल्या, अधिकारी, कर्मचाऱ्यांना तसेच सेवेत असताना अकाली मृत्यू अशा प्रकरणांमध्ये संबंधित पोलिस अधिकारी, कर्मचारी यांच्या कुटुंबियांना होणार आहे.
मुंबईतील पोलिसांना #COVID_19 चा प्रादुर्भाव संपेपर्यंत त्यांची सेवा निवासस्थाने त्यांच्याकडेच ठेवण्याची मुभा. याचा लाभ बदली,सेवानिवृत्ती, वैद्यकीय अपात्र अधिकारी-कर्मचाऱ्यांना तसेच सेवेत असताना मृत्यू झाल्याच्या प्रकरणामध्ये त्यांच्या कुटुंबियांना होणार-गृहमंत्री @AnilDeshmukhNCP pic.twitter.com/eWPcmOWcce
— MAHARASHTRA DGIPR (@MahaDGIPR) July 29, 2020
ज्या प्रकरणांमध्ये, तीन महिन्याची भाडेमाफ सवलत लॉकडाऊन अंमलात आल्यानंतर म्हणजे २३ मार्चनंतर संपली किंवा संपणार असेल, त्या प्रकरणांमध्ये अर्जदाराने विनंती केलेली तारीख किंवा कोरोना संसर्गातील निर्बंध असेपर्यंत यापैकी जे अगोदर घडेल तोपर्यंत सेवा निवासस्थाने ताब्यात ठेवण्यात मुदतवाढ देण्यात आली आहे.
तसेच ज्या प्रकरणांमध्ये सेवा निवासस्थान ताब्यात ठेवण्यास सक्षम प्राधिकारी यापूर्वी दिलेली मुदतवाढ ही लॉकडाऊन अंमलात आल्यानंतर म्हणजे २३ मार्च किंवा त्यानंतर संपली किंवा संपणार असेल त्या प्रकरणांमध्ये अर्जदाराने विनंती केलेली तारीख किंवा कोरोना संसर्गातील निर्बंध असेपर्यंत यापैकी जे अगोदर घडेल तोपर्यंत त्यास मुदतवाढ देण्यात आली आहे, असे गृहमंत्री देशमुख यांनी स्पष्ट केले. दरम्यान, या दोन्ही प्रकरणांमध्ये संबंधित पोलीस अधिकारी किंवा कर्मचारी यांना केवळ अनुज्ञप्ती शुल्क भरावे लागणार आहे.