दाक्षिणात्य स्टार विशालकडे मागितली 6.5 लाखांची लाच, CM एकनाथ शिंदेंकडे तक्रार; सरकारने दिलं उत्तर...

दाक्षिणात्य अभिनेता आणि निर्माता विशाल याने सेन्सॉर बोर्डाच्या मुंबई कार्यालयावर भ्रष्टाचाराचा गंभीर आरोप केला आहे. आपल्या 'मार्क अँटनी' चित्रपटाच्या हिंदी सेन्सॉर हक्कांसाठी मुंबईतील कार्यालयातून माझ्याकडे 6.5 लाखांची लाच मागण्यात आली असा आरोप विशालने केला आहे. विशालने एक्सवर एक व्हिडीओ शेअर केला असून मुख्यमंत्री एकनाथ शिंदे आणि पंतप्रधान नरेंद्र मोदी यांच्याकडून मदत मागितली आहे. यानंतर माहिती आणि प्रसारण मंत्रालयाने (MIB) यावर प्रतिक्रिया दिली असून एक्सवर अधिकृत निवेदन जारी केलं आहे. 

माहिती आणि प्रसारण मंत्रालयाच्या समस्या सूचना

विशालने भ्रष्टाचाराचा आरोप केल्यानंतर माहिती आणि प्रसार मंत्रालयाने एक्सवर अधिकृत निवेदन जारी केलं असून, जर कोणी दोषी आढळलं तर कठोर कारवाई केली जाईल असं सांगितलं आहे. तसंच या आरोपाची दखल घेत चौकशी केली जाणार असल्याचं स्पष्ट केलं आहे. 

एक्सवर पोस्ट केलेल्या निवेदनात माहिती आणि प्रसारण मंत्रालयाने सांगितलं आहे की, "विशालने सेन्सॉर बोर्डात भ्रष्टाचार सुरु असल्याचा मुद्दा समोर आणला असून हे फार दुर्दैवी आहे. भ्रष्टाचाराबाबत सरकारची शून्य सहनशीलता असून यामध्ये कोणीही दोषी आढळल्यास त्यांच्यावर कठोर कारवाई केली जाईल. माहिती आणि प्रसारण मंत्रालयातील एका वरिष्ठ अधिकाऱ्याची चौकशी करण्यासाठी आजच मुंबईत नियुक्ती करण्यात आली आहे"

The issue of corruption in CBFC brought forth by actor @VishalKOfficial is extremely unfortunate.

The Government has zero tolerance for corruption and strictest action will be taken against anyone found involved. A senior officer from the Ministry of Information & Broadcasting…

— Ministry of Information and Broadcasting (@MIB_India) September 29, 2023

पुढे त्यांनी लिहिलं आहे की, "सीबीएफसीमध्ये सुरु असलेल्या कोणत्याही अशा गैरकारभाराची माहिती आम्हाला द्या अशी विनंती आम्ही प्रत्येकाला करत आहोत".

'मार्क अँटनी' हा तामिळ चित्रपट असून यामध्ये विशाल आणि एस जे सुयश हे मुख्य भूमिकेत आहेत. या चित्रपटाला प्रेक्षकांचा चांगला प्रतिसाद मिळत आहे. प्रेक्षक आणि समीक्षक दोघांनीही या चित्रपटाचं कौतुक केलं आहे. बॉक्स ऑफिसवरही चित्रपट चांगली कमाई करत आहे. याच पार्श्वभूमीवर चित्रपटाचे निर्माते हा चित्रपट हिंदी भाषेत डब करत प्रदर्शित करण्याचा विचार करत होते. 

#Corruption being shown on silver screen is fine. But not in real life. Cant digest. Especially in govt offices. And even worse happening in #CBFC Mumbai office. Had to pay 6.5 lacs for my film #MarkAntonyHindi version. 2 transactions. 3 Lakhs for screening and 3.5 Lakhs for… pic.twitter.com/3pc2RzKF6l

— Vishal (@VishalKOfficial) September 28, 2023

यादरम्यान विशालने एक्सवर एक व्हिडीओ पोस्ट करत खळबळ उडवून दिली. हिंदीत चित्रपट प्रदर्शित करण्यासाठी सेन्सॉर बोर्डाच्या मुंबईतील कार्यालयामधून आपल्याकडे 6.5 लाखांची लाच मागण्यात आली असा आरोप त्याने केला. 

एक्सवर पोस्ट केलेल्या व्हिडीओत त्याने सगळा घटनाक्रम उलगडला आहे. त्यासह कॅप्शनमध्येही लिहिलं आहे. "मोठ्या पडद्यावर भ्रष्टाचार दाखवणं ठीक आहे. पण खऱ्या आयुष्यात नाही. हे अजिबात पचवू शकत नाही. खासकरुन सरकारी कार्यालयांमध्ये. त्यातही सीबीएसीच्या मुंबई कार्यालयात होत असेल तर आणखी भयानक आहे. मार्क अँटनीच्या हिंदी व्हर्जनसाठी मला 6.5 लाख रुपये द्यावे लागले. 3 लाख स्क्रिनिंगसाठी आणि 3.5 लाख प्रमाणपत्रासाठी. माझ्या करिअरमध्ये आजपर्यंत मी अशा स्थितीला सामोरा गेलेलो नाही". 

मार्क अँटनी चित्रपट 15 सप्टेंबरला चित्रपट होणार आहे.