SSR case: पंतप्रधान मोदींच्या बायोपिकसाठी गुजरात सरकारने संदीप सिंहला पैसे दिले?

मुंबई: बॉलीवूड अभिनेता सुशांत सिंह राजपूत मृत्यूप्रकरणी संशयाच्या भोवऱ्यात असलेला संदीप सिंह याच्या भाजपसोबत असलेल्या संबंधांची आणखी काही माहिती समोर आली आहे. काँग्रेस नेते सचिन सावंत यांनी रविवारी ट्विट करून यासंदर्भात भाजपवर नवे आरोप केले. संदीप सिंह याच्या तोट्यात असलेल्या कंपनीसोबत २०१९ साली विजय रुपाणी यांच्या गुजरात सरकारने १७७ कोटींचा सामंजस्य करार केला होता. पंतप्रधान नरेंद्र मोदी यांच्यावर चित्रपट करण्यासाठी टोकन रक्कम म्हणून गुजरात सरकारने हे पैसे संदीप सिंहला दिले होते का, असा सवाल सचिन सावंत यांनी उपस्थित केला आहे. 

गुजरात सरकारशी करार होण्यापूर्वी २०१७ मध्ये संदीप सिंहच्या कंपनीला ६६ लाखांचा तोटा झाला होता. यानंतरच्या वर्षात त्याच्या कंपनीला ६१ लाखांचा फायदा झाला. तर २०१९ मध्ये संदीप सिंहच्या कंपनीला पुन्हा ४ लाखांचा तोटा झाला. तरीही गुजरात सरकारने त्याच्या कंपनीशी १७७ कोटी रुपयांचा करार केला. कशाच्या आधारावर विजय रुपाणी यांनी हा करार केला?, असे प्रश्न सचिन सावंत यांनी विचारले आहेत.

#BJP 's blue-eyed boy Sandeep Ssingh's company's financials reflect a sorry story:

In 2017 - loss of ₹ 66 lakhs
In 2018 - profit of ₹ 61 lakhs
In 2019 - loss of ₹ 4 lakhs

Gujarat CM Rupani signed MoU with Sandeep in 2019 for ₹ 177 crs.

Who was he getting this money from? pic.twitter.com/M9qo2BGlwt

— Sachin Sawant सचिन सावंत (@sachin_inc) August 30, 2020

यापूर्वी सचिन सावंत यांनी एका इंग्रजी वृत्तवाहिनीच्या हवाल्याने संदीप सिंह याने भाजप कार्यालयात ५३ वेळा फोन केल्याचा दावा केला होता. तसेच संदीप सिंह लंडनला पळून जाण्याच्या तयारीत होता. याशिवाय, सचिन सावंत यांनी संदीप सिंहचा विरोधी पक्षनेते देवेंद्र फडणवीस यांच्यासोबतचा त्यांचा फोटो ट्वीट केला होता. संदीप सिंह हा बॉलिवूडमधील एक निर्माता असून त्यांना पंतप्रधान नरेंद्र मोदी यांच्या आयुष्यावर चित्रपट बनवला होता. त्यामुळे भाजपशी असलेल्या त्याच्या संबंधांची चौकशी व्हावी, अशी मागणी सावंत यांनी केली होती.