आदित्य ठाकरेंनी मैदानांची मागणी फेटाळल्यावर संजय राऊतांची सारवासारव

मुंबई : वानखेडे स्टेडियमप्रमाणेच ब्रेबॉर्न स्टेडियममध्येही कोरोना केयर सेंटर उभारण्यात यावं अशी मागणी शिवसेना खासदार संजय राऊत यांनी केली होती. आदित्य ठाकरेंनी या मागणीला नकार दिल्यानंतर आता संजय राऊत यांनी सारवासारव करण्याचा प्रयत्न केला.

'वानखेडे तसंच ब्रेबॉर्न सारख्या क्रिकेट मैदानावर कोरोना रुग्णांसाठी इस्पितळे उभारली जाणार नाहीत, ही उद्धव ठाकरेंची भूमिका योग्यच आहे. वानखेडे कोरोना रुग्णांसाठी घेणार, असं वृत्त प्रसिद्ध झालं होतं. वानखेडे वापरात आहे, ब्रेबॉर्न रिकामे आहे इतकेच. मैदाने वाचवायलाच हवीत,' असं ट्विट संजय राऊत यांनी केलं.

वानखेडे तसेच ब्रेबाॅन सारख्या क्रिकेट मैदानावर करोना रूग्णांसाठी इस्पितळे उभारली जाणार नाहीत ही @AUThackeray यांची भुमिका योग्यच आहे. वानखेडे करोना रूग्णांसाठी घेणार असे वृत्त प्रसिद्ध झाले होते.वानखेडे वापरात आहे. ब्रेबाॅन रिकामे आहे इतकेच. मैदाने वाचवायलाच हवीत..@PawarSpeaks

— Sanjay Raut (@rautsanjay61) May 17, 2020

काय म्हणाले होते आदित्य ठाकरे?

'संजयजी आपण खेळाची मैदाने कोरोना केअर सेंटरसाठी वापरू शकत नाही. कारण, याठिकाणी माती आहे. त्यामुळे पावसाळ्यात याठिकाणी मोठ्याप्रमाणावर चिखल होऊन अडचणी वाढतील. त्यामुळे आपण कोरोना सेंटरसाठी काँक्रिट बेस किंवा ठोस पाय असलेल्या मोकळ्या जागांच्या शोधात आहोत', असे आदित्य यांनी सांगितले.

Sanjay ji, we can’t take the grounds of the stadiums or playgrounds because they have a mud base and they won’t be usable during monsoons. An open space with a solid/ concrete base is usable and it’s being done already.

— Aaditya Thackeray (@AUThackeray) May 17, 2020

दुसरीकडे नारायण राणे यांचे पूत्र निलेश राणे यांनी या मुद्द्यावरून शिवसेनेवर निशाणा साधला आहे. 'आई शप्पथ यांना वेड लागलंय. संजय राऊत म्हणतात ग्राऊंड ताब्यात घ्या, आदित्य ठाकरे म्हणतात पाऊस येतोय बेड भिजतील. हे असले राज्यकर्ते आपलं काय भलं करणार?' असा प्रश्न निलेश राणेंनी उपस्थित केला आहे. 

आईशप्पथ ह्यांना वेड लागलय... संज्या म्हणतो ग्राउंड ताब्यात घ्या त्याला प्रदूषण मंत्री आदित्य उत्तर देतो पाऊस येतोय बेड भिजतील.. हे असले राज्यकर्ते आपले तर काय भलं होणार आपलं??? https://t.co/3FDGOtBM6J

— Nilesh N Rane (@meNeeleshNRane) May 17, 2020

दरम्यान, वानखेडे स्टेडियमच्या परिसरातील नागरिकांनीही पालिकेच्या या संभाव्य निर्णयाला विरोध केला होता. वानखेडेच्या परिसरात मोठ्याप्रमाणावर ज्येष्ठ नागरिक राहतात. कोरोना सेंटरमुळे त्यांच्या जीवाला धोका उत्पन्न होऊ शकतो. त्याऐवजी सरकारने या परिसरातील खाली असलेल्या इमारतींमध्ये कोरोनाग्रस्तांच्या उपचाराची सोय करावी, असे या रहिवाशांचे म्हणणे होते. मात्र, आता पालिकेनेही वानखेडेवर कोरोना सेंटर न उभारण्याचा निर्णय घेतला आहे. त्यामुळे हा प्रश्न निकाली निघाला आहे.