गंगेचा प्रकोप, हजारोंचा जीव मुठीत

www.24taas.com, झी मीडिया, नवी दिल्ली
उत्तराखंडात पावसा तडाखा आणि गंगेचा प्रकोप अनेकांच्या जीवावर बेतलाय. अजून हजारो जण आपला जीव मुठीत घेऊन मिळेल त्या ठिकाणी आसरा घेतला.
एक कुटुंब केदारनाथच्या हॉटेलमध्ये थांबल होतं. रात्रीच्या गडद अंधारात गंगेच्या महापुरात हे हॉटेल वाहून गेलं. मात्र नशिबानं वाचवलेल्या या कुटंबानं तब्बल दोन दिवस आणि दोन रात्री टेकडीवर बसून काढल्या. अखेर लष्कारचं हेलिकॉप्टर त्यांच्यापर्यंत पोहचलं आणि त्यांचा जीव वाचला. आपल्या नातेवाईकांना भेटल्यानंतर त्यांना गहिवरून आलं.
उत्तराखंडमध्ये पुरानं थैमान घातलं असतानाच राजधानी दिल्लीलाही पुराचा धोका निर्माण झालाय. यमुना नदीचा प्रवाह पूरपातळीपेक्षा २ मीटर जास्त आहे. उत्तराखंडमध्ये चिखलाचे साम्राज्य दिसून येत आहे. त्यामुळे येथे रोगराई पसरण्याचा धोका आहे.
उत्तराखंडमध्ये अडकलेल्या पर्यटकांना वाचवण्यासाठी मदतकार्यात जोरात सुरू असल्याची माहिती पंतप्रधान डॉ. मनमोहन सिंग यांनी दिलीय. आतापर्यंत १० हजार जणांना सुरक्षित स्थळी हलवण्यात आल्याचं त्यांनी सांगितलंय. मात्र अजून ५२ हजार जणांच्या सुटकेचे आव्हान प्रशासनासमोर आहे. लष्कराच्या २२ हेलिकॉप्टर्सच्या मदतीनं नागरिकांना वाचवण्याचे प्रयत्न सुरू आहेत. कालपेक्षा आज हवामान चांगलं असल्यामुळं मदत कार्याला वेग येत असल्याचंही त्यांनी सांगितलंय. मात्र रस्ते खचल्यामुळं थोडा अडथळा निर्माण होत आहे.