मलाला `आवाजा`ची जगाला नवी ओळख

www.24taas.com, झी मीडिया,लंडन
मलाला यूसुफजई हे नाव गेल्या वर्षी जगभरात चर्चेत आलं. पाकिस्तानमध्ये मुलींना शिक्षणावर बंदी घालण्याच्या विरोधात उठलेला हा एक चिमुकला आवाज. तो आवाज दाबण्याचाही प्रयत्न झाला. पण आज त्या आवाजाला नवी ओळख मिळालीय.
यूएन अर्थात युनायटेड नेशन्स ऑर्गनायझेशनच्या व्यासपीठावरुन मलालानं आज जगाला उद्देशून भाषण दिलं..तिच्या नावावरुनच आज १२ जुलैला मलाला दिन असंही घोषीत करण्यात आलं. विशेष म्हणजे मलालाचं भाषण संपल्यानंतर तिला युएनमधल्या सर्व रथी-महारथींनी उभं राहून अभिवादन केलं.
अवघ्या १६ वर्षाच्या या पाकिस्तानी मुलीचा हा प्रवास एखाद्या दिव्यापेक्षा कमी नाही. ती आणि तिच्या सारख्या हजारो-लाखो मुलींना शिकता यावा यासाठी तिनं आवाज उठवला.. तिच्यावर तालिबानंन हल्ला केला. तिच्या डोक्यात गोळी झाडण्यात आली होती..पण त्यातून ती बचावली आणि आज ती जगासमोर एक पाकिस्तानी मुलींचा आवाज म्हणून उभी राहिलीय. आपल्या भाषाणात तीनं जगभरातील आपल्या हितचिंतकांचे आभार तर मानलेच शिवाय साक्षरतेसाठी सर्वांना एकत्र येण्याचंही आवाहन केलं.