चेंबूरमध्ये शेजाऱ्याकडून ७ वर्षांच्या चिमुरडीवर बलात्कार

मुंबई: घरात एकटीच असल्याची संधी साधत शेजारीच राहणाऱ्या आरोपीनं ७ वर्षांच्या चिमुरडीवर बलात्कार केल्याची धक्कादायक घटना चेंबूर इथं घडली आहे. याबाबत चेंबूर पोलिसांनी आरोपीवर गुन्हा दाखल करीत त्याला अटक केली आहे.

चेंबूरच्या सिद्धार्थ कॉलनी परिसरात ही चिमुरडी आईवडिलांसोबत राहते. मंगळवारी दुपारी ती शेजारीच राहणाऱ्या मैत्रिणीकडे खेळण्यासाठी गेली होती. याच दरम्यान या मुलीच्या घरात हा २० वर्षीय आरोपी टीव्ही पाहात होता. काही वेळानंतर या चिमुरडीची मैत्रीण काही सामान घेण्यासाठी दुकानात गेली होती. त्यामुळं घरात हा आरोपी आणि पीडित मुलगीच होती. हीच संधी साधत या नराधमानं मुलीवर बलात्कार आणि अनैसर्गिक अत्याचार केला.

काही वेळानंतर मुलगी घरी परतली. ती अस्वस्थ दिसत असल्यानं तिच्या आईनं तिच्याकडे विचारणा केली असता, तिनं घडलेला प्रकार आईला सांगितला. त्यानुसार पीडित मुलीच्या कुटुंबीयांनी तत्काळ चेंबूर पोलीस ठाण्यात धाव घेत आरोपीविरोधात तक्रार दाखल केली. गुन्हा दाखल झाल्यानंतर काल रात्रीच या आरोपीला चेंबूर पोलिसांनी अटक केली आहे. 

* इतर ताज्या बातम्या सदैव पाहण्यासाठी झी २४ तासला फेसबुकवर जॉइंन करा.