शोएबसमोर थरथरायचे सचिनचे पाय - आफ्रिदी

झी २४ तास वेब टीम, कराची

सचिन तेंडुलकर माझ्या गोलंदाजीला घाबरतो, असं विधान करणा-या ‘ रावळपिंडी एक्स्प्रेस ’ शोएब अख्तरवर सर्वच दिग्गज क्रिकेटपटूंनी जोरदार हल्ला चढवला असला, तरी अख्तरचा माजी सहकारी शाहिद आफ्रिदी आता त्याच्या बचावासाठी धावून आलाय. शोएबचा चेंडू खेळताना सचिनचे पाय लटपटत असल्याचं मी पाहिलंय, असा दावा करत त्यानं आपल्या मित्रासाठी ‘ बॅटिंग ’ केलेय. पण, सचिनबद्दल काहीतरी बोलून प्रसिद्धी मिळवण्याचा हा आफ्रिदीचा केविलवाणा प्रयत्न असल्याची प्रतिक्रिया क्रिकेटवर्तुळात व्यक्त होतेय.

शोएब अख्तरचं 'काँट्रव्हर्शली युवर्स' हे आत्मचरित्र त्याच्या नावाप्रमाणेच वादग्रस्त ठरलं. विक्रमादित्य सचिन तेंडुलकर माझी बॉलिंग खेळताना घाबरायचा, सचिन आणि राहुल द्रविड हे मॅचविनर नाहीत, अशा खोचक टिप्पण्या शोएबनं त्यात केल्या होत्या. फैसलाबादच्या संथ खेळपट्टीवर मी वेगात टाकलेले चेंडू सचिननं सोडून दिले होते. माझ्या गोलंदाजीला सामोरे जाताना तो अस्वस्थ असायचा, अशी मुक्ताफळं त्यानं उधळली होती. अर्थातच, त्याचा ‘ वाईट्ट ’ परिणाम त्याला भोगावा लागला. सचिनवर शोएबनं केलेली आगपाखड पाहून जगभरातले दिग्गज क्रिकेटपटू भडकले आणि त्यानं शोएबची चांगलीच धुलाई केली होती. पाकिस्तानचा माजी कर्णधार वसीम अक्रमनंही अख्तरला फैलावर घेतलं होतं.

आता मात्र, शाहिद आफ्रिदीनं शोएबचं म्हणणं योग्य असल्याचं म्हटलंय. शोएब जे म्हणतोय, ते आपण आपल्या डोळ्यांनी प्रत्यक्ष पाहिल्याचं त्याचं म्हणणं आहे. शोएबची गोलंदाजी खेळताना सचिनचे पाय कापत असल्याचं मी फिल्डिंग करताना पाहिलंय, असा दावा आफ्रिदीनं केलाय. कुठल्याही फलंदाजाच्या बाबतीत दबावाखाली खेळताना असं होतंच असतं, अशी पुस्तीही त्यानं जोडलेय. पाकिस्तानचा ऑफ स्पिनर सईद अजमलचे चेंडू खेळतानाही हाच अनुभव आल्याचं त्यानं नमूद केलंय.

दरम्यान, याच आफ्रिदी आणि शोएबमध्ये वर्ल्ड कपनंतर चांगलीच जुंपली होती. आफ्रिदीमुळेच मला वर्ल्ड कप सेमी फायनलमधून वगळण्यात आलं होतं, असा आरोप शोएबनं केला होता. हे विधान आफ्रिदीनं खोडून काढलंय. शोएबच्या वतीनं मी अध्यक्ष आणि व्यवस्थापकांची माफी मागितल्यानंतरच त्याला टीम पाकिस्तानमध्ये परतण्याची संधी मिळाली होती, याची आठवण आफ्रिदीनं करून दिली आहे.