...तर ट्रॅव्हिस हेड होणार ऑस्ट्रेलियाचा कॅप्टन

मेलबर्न : ऑस्ट्रेलियाचे खेळाडू आणि ऑस्ट्रेलियन क्रिकेट बोर्डामधला वाद अजूनही सुरुच आहे. मानधनावरून सुरु झालेला वाद आणखी चिघळण्याची शक्यता आहे. सूत्रांनी दिलेल्या माहितीनुसार क्रिकेट ऑस्ट्रेलियानं पाच ऑस्ट्रेलियाच्या खेळाडूंना ऑस्ट्रेलियाच्या अ संघाकडून फुकट खेळण्याचा प्रस्ताव दिला आहे. 

उस्मान ख्वाजा, ग्लेन मॅक्सवेल, अॅश्टन ऍगर, जॅक्सन बर्ड आणि ट्रॅव्हिस हेड यांना पुढच्या महिन्यात होणाऱ्या दक्षिण आफ्रिका दौऱ्यासाठी ऑस्ट्रेलियाच्या अ संघाकडून फुकट खेळावं लागू शकतं.

सूत्रांनी दिलेल्या माहितीनुसार ऑस्ट्रेलियाचा दक्षिण आफ्रिका दौरा, बांग्लादेश दौरा आणि अॅशेस सीरिजसाठी ट्रॅव्हिस हेडला नेतृत्वाची धुरा दिली जाऊ शकते. चॅम्पियन्स ट्रॉफीनंतर ऑस्ट्रेलियाच्या अ संघाकडून खेळण्यासाठी मी उत्सुक असल्याचं हेडनं सांगितलं आहे.  

क्रिकेट ऑस्ट्रेलियानं मात्र या बातम्या फेटाळून लावल्या आहेत. ऑस्ट्रेलिया अ संघासाठीच्या करारावर अजून कोणताही निर्णय झाला नसल्याचं क्रिकेट ऑस्ट्रेलियाचं म्हणणं आहे. क्रिकेट ऑस्ट्रेलियाशी करार झाला नाही तर ऑस्ट्रेलियान खेळाडूंचा इतर देशांमध्ये होणाऱ्या टी-20 लीगमधल्या सहभागावरही प्रश्नचिन्ह निर्माण होऊ शकतं. ऑस्ट्रेलियन बोर्ड अशा पद्धतीनं खेळाडूंना दुसऱ्या देशांमधल्या टी-20 लीगमध्ये खेळण्यापासून अडवू शकत नाही, असं शेन वॉटसन म्हणाला आहे.