WC मध्ये न्यूझीलंडच्या फलंदाजाने केला अशक्य असा विक्रम; शेवटच्या एका चेंडूवर लगावले 2 षटकार
एकदिवसीय वर्ल्डकप स्पर्धेत न्यूझीलंडचा फलंदाज मिचेल सँटनरने जबरदस्त रेकॉर्ड आपल्या नावे केला आहे. नेदरलँडविरोधात झालेल्या सामन्यात शेवटच्या चेंडूवर त्याने ही कामगिरी केली.
 "WC मध्ये न्यूझीलंडच्या फलंदाजाने केला अशक्य असा विक्रम; शेवटच्या एका चेंडूवर लगावले 2 षटकार")
एकदिवसीय वर्ल्डकप स्पर्धेत प्रत्येक सामन्याला नवे रेकॉर्ड्स रचले जात असून, जुने रेकॉर्ड मोडीत काढले जात आहेत. न्यूझीलंड आणि नेदरलँडविरोधात झालेल्या सामन्यातही असाच एक रेकॉर्ड करण्यात आला आहे. न्यूझीलंडचा खेळाडू मिचेल सँटनर याने शेवटच्या ओव्हरच्या अखेरच्या चेंडूवर 13 धावा ठोकत वर्ल्डकपमध्ये अशक्य अशा रेकॉर्डची नोंद केली आहे. सोमवारी झालेल्या या सामन्यात मिचेलने एका चेंडूत 13 धावा ठोकत एक नवा रेकॉर्ड प्रस्थापित केला आहे.
नेमकं काय झालं?
सोमवारी न्यूझीलंड विरुद्ध नेदरलँड असा सामना पार पडला. न्यूझीलंडने प्रथम फलंदाजी करताना 300 चा टप्पा ओलांडला होता. नेदरलँडरचा बास डी लीडे शेवटची ओव्हर टाकत होता. यावेळी समोर मिचेल सँटनर फलंदाजी करत होता. अखेरचा चेंडू शिल्लक असताना न्यूझीलंडची धावसंख्या 309 वर 7 विकेट होती. यावेळी बास डी लीडेने फुलटॉस टाकला असताना मिचेल सँटनरने लाँग ऑनला षटकार ठोकला. बॉल जास्त उंच असल्याने अम्पायरने नो-बॉल दिला आणि न्यूझीलंडला फ्री हिट मिळाला. दरम्यान मिचेल सँटनरने फ्री हिटमध्ये पुन्हा फुल टॉस मिळालेल्या चेंडूवरही तीच कामगिरी केली आणि षटकार ठोकला.
यामुळे शेवटच्या एका चेंडूत लगावलेले दोन षटकार आणि नो-बॉलवर मिळालेली एक धाव अशाप्रकारे मिचेल सँटनरने एकूण 13 धावा ठोकत एक नवा रेकॉर्ड केला.
— Cricket Videos Only (@cricketvideos23) October 9, 2023
मिचेल सँटनरने फक्त फलंदाजीच नाही, तर गोलंदाजीतही कमाल केली. अष्टपैलू कामगिरी करत मिचेल सँटनरने नेदरलँडचे पाच विकेट्स घेतले. यामुळे न्यूझीलंडने हैदराबादला झालेल्या सामन्यात 99 धावांनी विजय मिळवला.
31 वर्षीय मिचेल सँटनरने 17 चेंडूत 36 धावा ठोकत संघाला 322 धावसंख्या उभारण्यास मदत केली. तसंच 59 धावांवर 5 विकेट्स मिळवत गोलंदाजीतही कमाल केली. नेदरलँड संघ 322 धावांचा पाठलाग करताना 223 धावांवर सर्वबाद झाला. या विजयासह न्यूझीलंड संघाने सलग दोन सामने जिंकले आहेत. याआधी न्यूझीलंडने गतवर्षीचे विजेते इंग्लंड संघाचा अहमदाबादमधील सामन्यात पराभव केला होता.
"आम्ही प्रथम फलंदाजी करताना फार चांगली कामगिरी केली. आघाडीच्या फलंदाजांनी मोठी भागीदारी केली. तसंच गोलंदाजांनी चमकदार कामगिरी केली," असं न्यूझीलंडच्या कर्णधाराने सांगितलं.
Shivraj Yadav
शिवराज यादव, झी 24 तासमध्ये डेप्युटी न्यूज एडिटर पदावर कार्यरत आहेत. 2009 मध्ये न्यूज फोटोकॉर्प या न्यूज फोटो एजन्सीतून त्यांनी आपल्या पत्रकारितेला सुरुवात केली. 16 वर्षांच्या दीर्घ काराकिर्दीत त्यांनी टीव्ही 9, जय महाराष्ट्र, मी मराठी या टीव्ही चॅनेल्समध्ये इनपुट विभागात काम केलं. याशिवाय त्यांनी अनेक प्रसंगी रिपोर्टिंगही केलं आहे. इलेक्ट्रॉनिक मीडियानंतर त्यांनी ऑनलाइन मीडियामध्ये काम करण्यास सुरुवात केली. लोकमत, लोकसत्ता या आघाडीच्या वृत्तपत्रांच्या डिजिटल विभागात केल्यानंतर सध्या झी 24 तासमध्ये कार्यरत आहेत. चालू घडामोडी, राजकारण, क्राइम, स्पोर्ट्स आणि तंत्रज्ञान विषयांवर वाचण्याची आणि लिहिण्याची आवड आहे. याशिवाय सिनेमा, वेब सीरिज यांच्याकडे विश्लेषणात्मक दृष्टीकोनाकडे पाहत त्यावर चर्चेची आणि लिखाणाची आवड आहे.
...Read More