బాహుబలి 2 చిత్రంలోని కట్టప్ప పాత్ర ద్వారా లెక్కలేనంతమంది అభిమానులను చేజిక్కించుకున్న నటుడు సత్యరాజ్. తొలుత తమిళ సినిమాల్లో హీరోగా తన కెరీర్‌ను ప్రారంభించిన సత్యరాజ్ ఆ తర్వాత క్యారెక్టరు ఆర్టిస్టుగా కూడా తన సత్తా చాటారు. హిందీ చిత్రం "చెన్నై ఎక్స్‌ప్రెస్" ద్వారా బాలీవుడ్ ప్రేక్షకులకీ పరిచయమయ్యారు. అయితే కట్టప్ప పాత్ర ద్వారా యావత్ భారతదేశానికి సత్యరాజ్ అంటే ఎవరో తెలిసి వచ్చింది. ఆ క్యారెక్టరును బేస్ చేసుకొని ఎన్నో స్ఫూఫ్స్ కూడా వచ్చేశాయి. ఈ రోజు సత్యరాజ్ పుట్టినరోజు సందర్భంగా ఆయన కుమారుడు శిబిరాజ్ తన తండ్రికి ట్విటర్ వేదికగా శుభాకాంక్షలు తెలుపుతూ, ఆయన చిన్నప్పటి ఫోటోను ట్వీట్ చేశారు. ‘తన నటనతోనే కాకుండా మంచి వ్యక్తిత్వంతో కూడా లక్షలాది మంది ప్రజల హృదయాల్ని గెలుచుకున్న ఈ బాలుడికి జన్మదిన శుభాకాంక్షలు.’ అని ట్వీట్ చేశారు. ఇప్పుడు ముద్దులొలికే కట్టప్ప ఫోటో సోషల్ మీడియాలో బాగా హల్ చల్ చేస్తోంది.
Happy bday to this kid who has won millons of hearts not only with his acting but also with his humanity! #HBDSathyaraj #Kattappa pic.twitter.com/6TR94e8tQ5
— Sibi (Sathya)raj (@Sibi_Sathyaraj) October 3, 2017
