રિશી કપૂરે પોતાના સ્વાસ્થ્ય વિશે કરી મોટી જાહેરાત

મુંબઈ : બોલિવૂડ એક્ટર રિશી કપૂર છેલ્લા 4 મહિનાથી અમેરિકામાં સારવાર કરાવી રહ્યા છે. જો કે અત્યાર સુધી રિશી કપૂર બીમારી અંગે ચૂપ રહ્યા પણ હવે પહેલીવાર આ વિશે ટિપ્પણી કરી છે. અહેવાલ હતા કે રિશીને કેન્સર થયું છે પરંતુ પરિવારે આ અટકળોને નકારી છે. હવે રિશી કપૂરે પોતે બીમારી અંગે ખુલાસો કર્યો છે. રિશીના આ ખુલાસા પછી તેના ચાહકોએ રાહતનો શ્વાસ લીધો છે. 

એક ઈન્ટરવ્યૂમાં એક્ટરે જણાવ્યું કે પોતો જલ્દી સાજા થઈ જશે. રિશી કપૂરને આશા છે કે તેઓ ટૂંક સમયમાં જ પરત ફરશે. રિશીએ કહ્યું, “સારવારની પ્રક્રિયા લાંબી અને થકવી નાખી દે તેવી છે. કોઈપણ વ્યક્તિને આના માટે ધૈર્યની જરૂર હોય છે. આ મારા માટે પણ મુશ્કેલ છે. મને ખાતરી છે કે આ બ્રેક એક્ટર તરીકે ભવિષ્યમાં મને મદદ કરશે.” 

થોડા સમય પહેલા જ નીતૂ કપૂરે ઈન્સ્ટાગ્રામ પર ન્યૂ યર સેલિબ્રેશનની એક તસવીર શેર કરી હતી જેમાં લખ્યું હતું કે, “હેપી 2019! કોઈ સંકલ્પ નહીં, આ વર્ષે માત્ર વિશ છે. ઓછું પ્રદૂષણ, ટ્રાફિક!! આશા છે કે ભવિષ્યમાં કેન્સર માત્ર રાશિ (કર્ક)નું ચિહ્ન બનીને રહેશે.” આ પોસ્ટ બાદથી રિશીને કેન્સર હોવાની અટકળોએ જોર પકડ્યું હતું. અહેવાલો તો એવા પણ હતા કે ન્યૂ યોર્કની જે હોસ્પિટલમાં સોનાલી બેન્દ્રેએ સારવાર લીધી તેમાં જ રિશી કપૂર પણ કેન્સરની સારવાર લઈ રહ્યા છે. જો કે બાદમાં કપૂર પરિવારે આ ખબરને અફવા ગણાવી હતી.