અમદાવાદ શ્રીકાર વર્ષા: મેઘરાજાની તોફાની બેટિંગના પગલે સર્વત્ર જળબંબાકાર

અર્પણ કાયદાવાલા/અમદાવાદ: બીજી તરફ અમદાવાદમાં પણ સાર્વત્રિક વરસાદ નોંધાયો હતો. ચાંદખેડા, એસપીરિંગ રોડ, વૈષ્ણોદેવી, એસ.જી હાઇવે, જગતપુર, ગોતા તરફ મધ્યમ વરસાદ નોંધાયો હતો. નરોડા, કઠવાડાયા, નારોલ, કોટ વિસ્તારમાં પણ વરસાદ નોંધાયો હતો. ઘાટલોડિયામાં પણ ભારે વરસાદ નોંધાયો હતો. આ ઉપરાંત શાહીબાગ, વટવા, મણિનગર, ઇસનપુર અને ઘોડાસર તરફ પણ ભારે વરસાદ નોંધાયો હતો.  જેના પગલે શહેરના મોટા ભાગના અંડરપાસ બંધ કરવાની કોર્પોરેશન તંત્રને ફરજ પડી હતી. 

શહેરના શાહીબાગ, મીઠાખળી, અખબારનગર અંડરપાસને બંધ કરવામાં આવ્યો હતો. તમામ અંડરપાસ સુરક્ષાના કારણોથી બંધ કરવામાં આવ્યા હતા. શહેરમાં માત્ર 9થી 10 વાગ્યા દરમિયાન સરેરાશ ડોઢ ઇંચ વરસાદ નોધાયો હતો. દુધેશ્વર, નરોડા, મેમ્કો, કોતરપુર ઓઢવ, વટવા, મ્યુનિસિપલ કોઠા, ઉસ્માનપુરા, ચાંદખેડા, સહિતનાં વિસ્તારોમાં 2થી અઢી ઇંચ તો કેટલાક વિસ્તારમાં 3 ઇંચ વરસાદ નોંધાયો હતો. વાસણા બેરેજમાં 23 અને 24 નંબરના ગેટને 3 ફુટ જેટલો ખોલવામાં આવ્યો હતો. 

ભારે વરસાદના પગલે શહેરનાં મોટા ભાગનાં વિસ્તારોમાં ઘુંટણસમા પાણી ભરાયા હતા. છેલ્લા બે કલાકમાં મેઘરાજાએ તોફાની બેટિંગ કરી હતી. દક્ષિણ ઝોનમાં 3 ઇંચ, ઉત્તર ઝોનમાં અઢી ઇંચ, પશ્ચિમ ઝોનમાં પોણા બે ઇંચ વરસાદ નોંધાયો હતો. પૂર્વ અમદાવાદમાં સાડાત્રણ ઇંચ વરાદ નોંધાયો હતો. 

વરસાદના પાણી ભરાવાના કારણે કુખ્યાત હાટકેશ્વર સર્કલ બેટમાં ફેરવાયું છે. હાટકેશ્વર રિંગરોડ, અમરાઇવાડીથી સેવન ડે સુધી વરસાદી પાણી ભરાતા આગળ વધી રહ્યા છે. મણિનગર ગોર કુવા માર્ગ પર વરસાદી પાણી ભરાવાની શરૂઆત થઇ છે. કેનાલમાં પાણી વધારે માત્રામાં જઇ રહ્યું છે. સીટીએમની અનેક સોસાયટી નીચાણવાળા પાણી હોવાથી પાણી ભરાયા હતા. ખોખરા ગુજરાત હાઉસિંગ બોર્ડના વિસ્તારોમાં પાણી ભરાયા હતા. હાટકેશ્વર અને આસપાસની સોસાયટીઓમાં પાણી ભરાતા ઘર અને દુકાનો પાણી પાણી થયા.