કુણાલ કામરા અને મુનાવર ફારુકી માટે ભોપાલમાં શો યોજશે કોંગ્રેસના આ દિગ્ગજ નેતા!, જાણો શું કહ્યું?

ભોપાલ: કોંગ્રેસ નેતા દિગ્વિજય સિંહે જાણે પોતાની જ મજાક ઉડાવી લેવાનું મન બનાવી લીધુ છે. આથી તેઓ એક એવી વિચિત્ર જાહેરાત કરી બેઠા છે. દિગ્વિજય સિંહે કોમેડિયન કુણાલ કામરા અને મુનાવર ફારુકી  (Munawar Faruqui) ને ભોપાલમાં આવીને શો કરવાનું આમંત્રણ આપ્યું છે. તેમણે કહ્યું કે તમામ જવાબદારી તેમની હશે અને કોમેડીનો સબ્જેક્ટ પણ દિગ્વિજય સિંહ હશે. એટલે કે તેઓ ઈચ્છે છે કે બંને કોમેડિયન ભોપાલ આવીને દિલ ખોલીને તેમની મજાક ઉડાવે. 

વિરોધના નામ પર કઈ પણ ચાલશે
મધ્ય પ્રદેશના પૂર્વ મુખ્યમંત્રી અને કોંગ્રેસના સાંસદ દિગ્વિજય સિંહે આ અંગે એક ટ્વીટ કરી છે. તેમણે લખ્યું કે હું કુણાલ અને મુનાવર માટે ભોપાલમાં શો આયોજિત કરીશ. તમામ જવાબદારી મારી રહેશે. શરત ફક્ત એ હશે કે કોમેડીનો સબ્જેક્ટ દિગ્વિજય સિંહ હશે. તેમાં તો સંઘીઓને કોઈ વાંધો ન હોવો જોઈએ. હકીકતમાં કોંગ્રેસ નેતા સંઘ પર નિશાન સાંધી રહ્યા છે  અને આ માટે તેઓ પોતાની મજાક ઉડાવવા માટે પણ તૈયાર છે. 

પોતાની સુવિધા મુજબ નક્કી કરે ડેટ
દિગ્વિજય સિંહે કુણાલ કામરા અને મુનાવર ફારુકીને એમ પણ કહ્યું કે પોતાની સુવિધા મુજબ તેઓ તારીખ અને સમય જણાવે. તેમણે કહ્યું કે તેમની તમામ શરતો મંજૂર રહેશે. પરંતુ શોનો સબ્જેક્ટ ફક્ત દિગ્વિજય સિંહ હોવો જોઈએ. અત્રે જણાવવાનું કે કુણાલ કામરા અને મુનાવર ફારુકીના અનેક શો કેન્સલ થયા છે. બંને ઉપર ભડકાઉ કોમેડી કરવાના આરોપ લાગતા રહ્યા છે. મુનાવર ફારુકીના તો માત્ર બે મહિનામાં 12 શો રદ થઈ ચૂક્યા છે. તેનાથી નારાજ થઈને તેણે સોશિયલ મીડિયા પર લખ્યું હતું કે હવે મારું કામ થઈ ગયું. નફરત જીતી ગઈ અને કલાકાર હારી ગયો. 

હું કોરોનાનો નવો વેરિએન્ટ
આ બાજુ કુણાલ કામરાનો પણ બેંગલુરુમાં થનારો શો રદ થઈ ગયો છે. તેને ધમકી અપાઈ હતી કે જો શો થશે તો વેન્યૂને બંધ કરી દેવાશે. તેનો આ શો આ મહિને જ થવાનો હતો. કામરાએ શો રદ થવાની જાણકારી આપતા કહ્યું હતું કે 45 લોકોના એક કાર્યક્રમ સ્થળ પર ભેગા થવાની મંજૂરી લેવાઈ નહતી અને કાર્યક્રમ સ્થળને બંધ કરવાની ધમકી મળી હતી. આથી શો કેન્સલ કરાઈ રહ્યો છે. કામરાએ કટાક્ષ કરતા કહ્યું હતું કે મને લાગે છે કે હું તેમને કોરોના વાયરસના નવા વેરિએન્ટ જેવો લાગુ છું.