VIDEO: Train-18 એ તોડ્યા સ્પીડના તમામ રેકોર્ડ, સ્પીડોમીટરે સ્પર્શ્યો 180KM/hનો આંકડો

નવી દિલ્હીઃ દેશની સૌથી ઝડપી અને પ્રથમ સેમીહાઈસ્પીડ એન્જિનલેસ Train-18  ટ્રેનને આધિકારિક રીતે ચલાવાની મંજૂરી મળી ગઈ છે. રેલવેમંત્રી પિયુષ ગોયલે પોતાના ટ્વીટર એકાઉન્ટ પર ચાલતી ટ્રેનનો એક વીડિયો શેર કર્યો છે. જેમાં આ ટ્રેન 180 કિમી પ્રતિ કલાકની ઝડપે દોડી રહી છે. 

આ ટ્રેન દેશની સૌથી ઝડપી ગતિએ ચાલનારી ટ્રેન છે. તેણે ઝડપની બાબતે રાજધાની અને શતાબ્દીને પણ પાછળ પાડી દીધી છે. સૂત્રો પાસેથી મળેલી માહિતી મુજબ આ ટ્રેનને વડા પ્રધાન નરેન્દ્ર મોદીના લોકસભા ક્ષેત્ર વારાણસીથી નવી દિલ્હી વચ્ચે ચલાવાની યોજના છે. વડા પ્રધાન મોદી ખુદ આ ટ્રેનને લીલી ઝંડી બતાવશે. 

Need for Speed: Train 18 seen cruising at a sustained 180Km/h, officially becoming the fastest train in India pic.twitter.com/2VNF1U3qrl

— Piyush Goyal (@PiyushGoyal) December 26, 2018

આ ટ્રેનથી દિલ્હી અને વારાણસી વચ્ચેની મુસાફરી માત્ર 8 કલાકની થઈ જશે, જે અત્યારે 12થી 17 કલાકની છે. આ ટ્રેનને સ્ટોપેજ પણ ઓછા આપવામાં આવશે. એટલે કે, નવી દિલ્હીથી શરૂ થયા બાદ આ ટ્રેન ગાઝિયાબાદ, કાનપુર અને અલાહાબાદ સ્ટેશને જ રોકાશે અને પછી સીધી વારાણસી છેલ્લું સ્ટોપ આવશે. 

T-18 નામથી જાણીતી આ ટ્રેનમાં યુરોપમાં ચાલતી આધુનિક રેલગાડીની તમામ સુવિધાઓ આપવામાં આવી છે. આ ટ્રેનની એરોડાયનેમિક ડિઝાઈન તેની સ્પીડ વધારવામાં મદદ કરે છે. ટ્રેનમાં કુલ 16 કોચ હશે, જેમાં બે એક્ઝીક્યુટિવ ક્લાસના રહેશે. 

આ ટ્રેનને શરૂઆતમાં 130 કિમી પ્રતિ કલાકની ઝડપે જ દોડાવાશે. કેમ કે અત્યારે જે રેલવેના ટ્રેક બનેલા છે તે તેના કરતાં વધારે સ્પીડને અનુકૂળ નથી. આ ટ્રેક ઉપર ફેન્સિંગનું કામ કરવું પડશે, કેમ કે તેના કારણે વચ્ચે કોઈ પ્રાણી એક અડચણ ન આવી જાય. ત્યાર બાદ ટ્રેનની સ્પીડ વધારવામાં આવશે.