स्टेथोस्कोप आणि तुळशीमाळ वरुन अशोक सराफ आणि माधव अभ्यंकर यांच्यात मतभेद!

(Photo Credit : Social Media)

Ashok Saraf-Madhav Abhyankar : विधात्याने तळहातावर रेखाटलेली आयुष्यरेखा आपण वाढवू शकतो का? या प्रश्नाचे उत्तर देणारा 'लाईफ लाईन' चित्रपट येत्या 2 ऑगस्ट रोजी चित्रपटगृहात प्रेक्षकांच्या भेटीला येणार आहे. आधुनिक विज्ञान आणि जुन्या रितीरिवाजांमधील संघर्ष यावर आधारित या चित्रपटाचे नवीन पोस्टर नुकतेच प्रदर्शित झाले आहे. पोस्टरमध्ये महाराष्ट्रभूषण पुरस्कार प्राप्त महानायक अशोक सराफ आणि आपल्या सर्वोत्कृष्ट अभिनयाने घराघरांत पोहोचलेले लोकप्रिय अभिनेते माधव अभ्यंकर दिसत असून अशोक सराफ यांच्या गळ्यातील स्टेथोस्कोप आणि माधव अभ्यंकर यांच्या गळ्यातील तुळशीमाळ यावरून या दोघांमधील मतभेदाचा अंदाज प्रेक्षकांना येऊ शकतो. मात्र, हा मतभेद कोणत्या कारणावरून आहे, याचे उत्तर प्रेक्षकांना चित्रपट पाहिल्यावरच मिळणार आहे. 

क्रिसेंडो एंटरटेनमेंट प्रस्तुत, या चित्रपटात हेमांगी कवी, भरत दाभोळकर, जयवंत वाडकर, शर्मिला शिंदे, संध्या कुटे आणि समीरा गुजर यांच्याही महत्वपूर्ण भूमिका आहेत. साहिल शिरवईकर दिग्दर्शित या चित्रपटाचे निर्माते आहेत लालजी जोशी, कविता शिरवईकर, अमी भुता, मिलिंद प्रभुदेसाई, उदय पंडित, संचिता शिरवईकर, संध्या कुलकर्णी, शिल्पा मुडबिद्री आणि क्रिसेंडो एंटरटेनमेंट. राजेश शिरवईकर यांची कथा, पटकथा, संवाद आणि गीत लाभलेल्या या चित्रपटातील गाणी अशोक पत्की यांनी संगीतबद्ध केली असून या भावपूर्ण गाण्यांना अवधूत गुप्ते आणि माधुरी करमरकर यांचा आवाज लाभला आहे. 'लाईफ लाईन' हा चित्रपट 11 आंतरराष्ट्रीय पुरस्कारांचा मानकरी आहे. 

 'लाईफ लाईन' चे तरुण दिग्दर्शक साहिल शिरवईकर म्हणतात, "अतिशय नाजूक विषय असल्यामुळे अतिशय संवेदनशीलरित्या आम्ही तो मांडला आहे. विज्ञान आणि जुन्या परंपरा यात नेहमीच तफावत राहिलेली आहे. प्रत्येकाची विचारसरणी बदलणारा 'लाईफ लाईन' आहे. कथानक, कलाकार या सगळ्याच जमेच्या बाजू असल्याने मला खात्री आहे, हा चित्रपट नक्कीच प्रेक्षकांच्या पसंतीस उतरेल.''

हेही वाचा : सानियाशी लग्नाच्या चर्चेतनंतर मोहम्मद शमीनं चाहत्यांना दिली गूड न्यूज! Video पोस्ट करत म्हणाला...

अशोक सराफ यांनी हिंदी आणि मराठी सिनेसृष्टीत स्वतःची एक वेगळी ओळख निर्माण केली आहे.  तर माधव अभ्यंकर यांनीही मराठी इंडस्ट्रीमध्ये आपल्या भारदस्त व्यक्तिमत्वाने आणि अभिनयाने प्रेक्षकांना आपलेसे केले आहे. असे दोन दिग्गज कलाकार एकत्र समोर येणार असल्याने हा चित्रपट पाहाणे, म्हणजे प्रेक्षकांसाठी पर्वणीच ठरणार आहे. त्यात दोघांचे क्षेत्र, त्याबद्दलचे विचार हे दोन्ही परस्परविरोधी असल्याने आता हा चित्रपट पाहाणे निश्चितच औत्सुक्याचे ठरणार असून या संघर्षामध्ये कोण जिंकणार, याचे उत्तर प्रेक्षकांना चित्रपट पाहूनच मिळणार आहे.