भाजपविरोधात विरोधकांची मोट बांधण्याचा प्रयत्न, ममता बॅनर्जी किती यशस्वी?

मुंबई : बिगर भाजपशासित राज्यांच्या मुख्यमंत्र्यांची लवकरच मुंबईत बैठक होण्याची शक्यता आहे. पश्चिम बंगालच्या मुख्यमंत्री ममता बॅनर्जी (CM Mamta Banerjee) यांनी या मुख्यमंत्र्यांना पत्र लिहिले आहे. ममता बॅनर्जी आणि तेलंगणाचे मुख्यमंत्री के चंद्रशेखर राव (K Chandrashekhar Rao) गेल्या काही दिवसांपासून विरोधकांना एकत्र करण्याचा प्रयत्न करत आहेत. हे दोन्ही प्रयत्न कितपत यशस्वी होतील हे येणारा काळच सांगेल, पण असा प्रयत्न पहिल्यांदाच होत आहे असे नाही.

भाजपच्या विरोधात यापूर्वीही काही वेळा अशा आघाड्यांचे प्रयत्न झाले आहेत. नरेंद्र मोदी (Narendra Modi) सत्तेत येण्यापूर्वीपासूनच काँग्रेस आणि भाजपच्या विरोधात अशा आघाड्या झाल्या आहेत. देशाच्या राजकारणात यापूर्वी असे प्रयत्न कितपत यशस्वी झाले आहेत ते जाणून घेऊया?

सध्या ममता बॅनर्जी आणि के. चंद्रशेखर राव यांच्या वतीने तसे प्रयत्न सुरू आहेत. चंद्रशेखर राव सातत्याने पंतप्रधान नरेंद्र मोदींवर हल्लाबोल करत आहेत. यासोबतच ते तेलंगणाबाहेरही आपल्या सरकारच्या कामगिरीचा प्रचार करत आहेत. १० मार्च रोजी पाच राज्यांचे निवडणूक निकाल येत असताना के चंद्रशेखर राव महाराष्ट्राचे मुख्यमंत्री उद्धव ठाकरे यांची भेट घेण्यासाठी आले होते.

त्याचवेळी ममता बॅनर्जी याही सातत्याने आपल्या पक्षाचे कॅडर वाढवण्यात गुंतल्या आहेत. बंगालबाहेरील विशेषत: ईशान्येकडील राज्यांतील अनेक बडे काँग्रेस नेते त्यांच्या पक्षात सामील झाले आहेत. पक्ष मजबूत करण्यासोबतच ममता विरोधकांना एकत्र करण्यात गुंतल्या आहेत. अखिलेश यादव (akhilesh yadav) यांच्यासाठी मत मागण्यासाठी उत्तर प्रदेशात जाणे असो किंवा तामिळनाडूचे मुख्यमंत्री स्टॅलिन (M K stalin) यांची भेट असो, ममता प्रत्येक विरोधी नेत्याला एका व्यासपीठावर आणण्यात व्यस्त आहेत.

हे पण वाचा : PM मोदींना पर्याय देण्याचा प्रयत्न फसला, CM के चंद्रशेखर राव यांना मोठा धक्का

2019 च्या लोकसभा निवडणुकीपूर्वीच विरोधकांची एकजूट करण्याचे प्रयत्न सुरू झाले होते. निवडणुकीपूर्वी विरोधी पक्षांचे नेतेही ममतांच्या निमंत्रणावरून कोलकात्यात एकत्र आले होते. सगळ्यांनी स्टेजही शेअर केला. अखिलेश यादव, तेजस्वी यादव, अरविंद केजरीवाल ते चंद्राबाबू नायडू या मंचावर दिसले.

लोकसभा निवडणुकीपूर्वी तेलंगणा विधानसभा निवडणुकीतील विजयाने उत्साही झालेले के चंद्रशेखर रावही अशा प्रयत्नांमध्ये सहभागी झाले होते. मात्र, निवडणुकीत औपचारिक युती होऊ शकली नाही. आता पुन्हा एकदा ममता आणि चंद्रशेखर राव 2024 च्या लोकसभा निवडणुकीपूर्वी विरोधकांना एकत्र करण्याचा प्रयत्न करत आहेत.

पंतप्रधानपदाच्या उमेदवाराबाबत तिसरी आघाडीच कधीच एकमत होऊ शकलं नाही. सगळेच इच्छूक असल्याने ऐन निवडणुकीच्या वेळी आघाडी होणं शक्य होत नाही. के चंद्रशेखर राव यांनी देखील स्वत:ला प्रोजेक्ट करण्याचा प्रयत्न केला. पण त्यांना धक्का बसला.