Maharashtra Breaking News LIVE: दिवसभरातील महत्त्वाच्या घडामोडींचे अपडेट्स
27 Aug 2024, 12:49 वाजता
मुंबईत 15 गोविंदा जखमी
मुंबईमध्ये दहीहंडीच्या सेलिब्रेशनदरम्यान दुपारी 12 वाजेपर्यंतच्या आकेडवारीनुसार 15 गोविंदा जखमी झाल्याची माहिती समोर आली आहे. सरकारी, महानगरपालिकेच्या आणि खासगी रुग्णालयातील रुग्णांची ही संख्या आहे. सर्वाधिक जखमी गोविंदा पोतदार रुग्णालय आणि नायर रुग्णालयामध्ये आहेत. या ठिकाणी प्रत्येकी 4 गोविंदा दाखल आहेत. तसेच सायन रुग्णालयात दोन आणि सेंट जॉर्ज, केईएम, राजावाडी, एमटी अग्रवाल आणि कुर्ला भाभा रुग्णालयामध्ये प्रत्येकी एक जखमी गोविंदा आहे.
27 Aug 2024, 11:04 वाजता
नॅशनल टास्क फोर्सची आज पहिली बैठक
सर्वोच्च न्यायालयाच्या आदेशानंतर नॅशनल टास्क फोर्सची स्थापना करण्यात आली असून त्यात कॅबिनेट सचिवांसह सर्व बड्या डॉक्टरांचा समावेश करण्यात आला आहे. यामध्ये वैद्यकीय संस्थांच्या लोकांनाही विनंती करण्यात आली होती की, हे असे व्यासपीठ आहे की ते येऊन त्यांचे मत मांडू शकतात. डॉक्टरांच्या संपानंतर सुप्रीम कोर्टाने रुग्णालयातील डॉक्टरांच्या सुरक्षेसाठी आणि कल्याणासाठी एक समिती स्थापन केली असून त्यामध्ये कॅबिनेट सचिव, गृह सचिव, आरोग्य सचिवांसह 14 सदस्यांचा समावेश करण्यात आला आहे. या टास्क फोर्सची आज पहिली बैठक होत आहे.
27 Aug 2024, 09:55 वाजता
नेहरुंनी उभारलेला शिवरायांचा पुतळा अजूनही सुस्थितीत: राऊत
शिवरायांचा सिंधुदुर्गमधील पुतळा कोसळल्याच्या मुद्द्यावरुन बोलताना उद्धव ठाकरेंच्या शिवसेनेचे प्रवक्ते संजय राऊत यांनी, "1933 मधील टिळकांचा पुतळा अजूनही शाबूत आहे. नेहरुंनी बनवलेला शिवरायांचा पुतळाही सुस्थितीत आहे," असं सांगितलं. तसेच सार्वजनिक बांधकाम मंत्री असलेल्या रवींद्र चव्हाणांचा राजीनामा घेतला पाहिजे, असंही राऊत म्हणाले.
27 Aug 2024, 09:51 वाजता
शिवरायांचा असा अपमान मुघलांनीही केला नाही; पुतळा पडल्याच्या मुद्दावरुन राऊत सरकारवर बरसले
सिंधुदुर्गमध्ये छत्रपती शिवरायांचा पुतळा पडल्याच्या मुद्द्यावरुन उद्धव ठाकरेंच्या शिवसेनेचे प्रवक्ते संजय राऊत यांनी सत्ताधाऱ्यांवर कठोर शब्दांमध्ये टीका केली आहे. शिवरायांचा असा अपमान मुघलांनीही केला नाही, असं म्हणत राऊत यांनी सत्ताधाऱ्यांना धारेवर धरलं आहे. सत्ताधाऱ्यांच्या डोक्यात हवा गेली आहे. शिंदेंच्या मर्जीजल्या ठेकेदारांना काम देण्यात आल्याचंही राऊत म्हणाले. ठेकेदार, शिल्पकार सगळेच ठाण्याचे आहेत, असंही राऊत म्हणाले. सरकारच्या चेहऱ्यावर एकही वेदना मला दिसत नाही. समुद्रावर वारा असणारच, वाऱ्याची कारणं कसली देता? असा प्रश्न राऊतांनी उपस्थित केला आहे. मर्जीतल्या ठेकेदारांना कंत्राट देऊन घाईघाईत मोदींच्या हस्ते पुतळ्याचं उद्घाटन करण्यात आलं, असा आरोप राऊतांनी केला आहे.
27 Aug 2024, 09:35 वाजता
कोयना काठच्या गावांना सतर्कतेचा इशारा
कोयना धरणाच्या पाणलोट क्षेत्रात पावसाचा जोर वाढल्याने धरणामध्ये पाण्याची आवक देखील वाढली आहे. त्यामुळे आज सकाळी 11:00 वाजल्या पासून कोयना धरणाच्या पायथा विद्युतगृहाचे दोन्ही युनिट सुरू करून 2100 क्युसेक विसर्ग नदीपात्रात करण्यात येणार आहे. त्यामुळे नदीकाठच्या गावांना सतर्कतेचा इशारा देण्यात आला आहे.सध्या धरणात 98.89 टीएमसी एवढा पाणीसाठा आहे.
27 Aug 2024, 08:12 वाजता
शिवरायांचा पुतळा कोसळल्याचं प्रकरण: दोघांविरुद्ध गुन्हा दाखल
सिंधुदुर्गमधील किल्ल्यावरील शिवरायांचा पुतळा कोसळल्याच्या घटनेप्रकरणी मालवण पोलीस स्टेशनमध्ये दोन व्यक्तींविरुद्ध गुन्हा दाखल करण्यात आला आहे. मेसर्स आर्टिस्टरी कंपनीचे मालक जयदीप आपटे आणि स्ट्रक्चरल कन्सलटंट चेतन पाटील यांच्याविरुद्ध गुन्हा दाखल करण्यात आला आहे. महाराष्ट्र सरकारच्या सार्वजनिक बांधकाम विभागातील सहाय्यक इंजिनिअरने ही तक्रार दाखल केली आहे. कलम 109।110, 125, 318 अंतर्गत गुन्हा दाखल करण्यात आला आहे.
27 Aug 2024, 08:09 वाजता
विमानाची तिकीटं महागली; 15 ते 30 टक्के दरवाढ
सणासुदीचे दिवस, तसेच देशात विमानांची घटलेली संख्या आणि वाढत्या प्रवासी संख्येमुळे विमान तिकिटांचे दर गगनास भिडण्यास सुरुवात झाली आहे. दिवाळीला अजून वेळ असला तरी आताच देशातील विविध पर्यटनस्थळांच्या विमान तिकिटांच्या दरात किमान 15 ते कमाल 30 टक्के वाढ होण्यास सुरुवात झाली आहे.
27 Aug 2024, 08:06 वाजता
मुसळधार पावसात गोविंदाचे थर
आज दहीहंडीच्या दिवशीही मुंबई, ठाणे आणि नवी मुंबईत पाऊस कोसळण्याची शक्यता आहे. मुंबई प्रादेशिक हवामान खात्याने वर्तविली आहे. त्यामुळे आता गोविंदांना दहीहंडीचा थरार भरपावसात भिजत दाखवावा लागणार.
27 Aug 2024, 08:03 वाजता
पश्चिम रेल्वेवर आजपासून 35 दिवसांचा मेगा ब्लॉक
पश्चिम रेल्वेवरील गोरेगाव-कांदिवलीदरम्यान सहाव्या मार्गिकेचे काम हाती घेण्यात येणार आहे. या कामासाठी सुमारे 35 दिवसांचा मोठा वाहतूक ब्लॉक घेतला जाणार आहे. 27-28 ऑगस्टच्या मध्यरात्रीपासून 5-6 ऑक्टोबरपर्यंत हा ब्लॉक सुरू राहील. त्यामुळे पश्चिम रेल्वे प्रवाशांना काही प्रमाणात विस्कळीत झालेल्या वेळापत्रकाला सामोरे जावे लागणार आहे.
27 Aug 2024, 08:01 वाजता
वसंत चव्हाण यांच्यावर सकाळी 11 वाजता सरकारी इतमामात होणार अंत्यसंस्कार
खासदार वसंतराव चव्हाण यांच्या पार्थिवावर सकाळी 11 वाजता नायगाव येथे अंत्यसंस्कार करण्यात येणार आहेत. विरोधी पक्षनेते विजय वडेट्टीवार, काँग्रेस प्रदेशाध्यक्ष नाना पटोले, बाळासाहेब थोरात यांच्यासह आदी काँग्रेस नेते उपस्थित असणार आहेत.
