मासिक पाळीच्या दोन दिवस ऐच्छिक सुट्टी, 500 रुपयांत 6 सिलेंडर... वाचा मविआचा जाहीरनामा

महाराष्ट्रात विधानसभा निवडणुकीचा महासंग्राम सुरु आहे. अशावेळी प्रचाराला जोर आला असून प्रत्येक पक्षाकडून आपापला जाहीरनामा सादर केला जात आहे. आज महाविकास आघाडीने आपला जाहीरनामा जाहीर केला आहे. राज्यात 288 जागांसाठी 20 नोव्हेंबर रोजी मतदान होणार आहे. या निवडणुकांच्या अनुशंगाने हा जाहीरनामा सादर केला गेला. सकाळी भाजपकडून जाहीरनामा प्रकाशित झाला. त्या पाठोपाठ महाविकास आघाडीने जाहीरनामा प्रकाशित केला आहे. या जाहीरनाम्याला 'महाराष्ट्रनामा' असं नाव देण्यात आलं आहे. 

मुंबईत मविआतील प्रमुख नेत्यांनी पत्रकार परिषद घेतली. या परिषदेला काँग्रेसचे राष्ट्रीय अध्यक्ष मल्लिकार्जुन खरगे, काँग्रेसचे प्रदेशाध्यक्ष नाना पटोले आणि राष्ट्रवादी काँग्रेसच्या शरद पवार पक्षाच्या खासदरा सुप्रिया सुळे, संजय राऊत यावेळे उपस्थित होते. 

मल्लिकार्जुन खरगे यांनी पहिल्या 100 दिवसांचा अजेंडा या जाहीरनाम्यातून मांडला. यामध्ये महिलांना विशेष गोष्टी जाहीर करण्यात आला. त्यामध्ये महत्त्वाचा मुद्दा ठरला तो म्हणजे, महिलांना मासिक पाळीच्या दिवसांमध्ये 2 दिवसांची ऐश्चिक रजा मिळणार आहे. अनेक खासगी कंपन्यांमध्ये अशापद्धतीची सुट्टी देण्यात येते. पण मविआने या ऐश्चिक रजेबाबत जाहीर केले आहे. 

LIVE: Unveiling of Maha Vikas Aghadi (MVA) Manifesto

Mumbai, Maharashtra

https://t.co/oKpDfEnjlB

— Mallikarjun Kharge (@kharge) November 10, 2024

काय काय मांडलंय जाहीरनाम्यात? 

1. महालक्षी योजनानुसार महिलांना तीन हजार प्रतिमहिना देणार
2. महिलांसाठी बस प्रवास मोफत करणार
3. 6 गॅस सिलिंडर प्रत्येकी 500 रुपयांत उपलब्ध करून देणार
4. महिलांच्या सुरक्षेसाठी शक्ती कायद्याची अंमलबजावणी करणार
5.  महिला कर्मचाऱ्यांना मासिक पाळीच्या दिवसांमध्ये 2 दिवसांची ऐच्छिक रजा देणार
6. जन्मलेल्या प्रत्येत मुलीच्या नावे ठरावीक रक्कम बॅंकेत ठेवणार, 18 वर्षांनंतर लाख रुपये देणार
7. सुशिक्षित बेरोजगारांना दरमहिना 4 हजार रुपयांपर्यंत भत्ता देणार
8. शेतकऱ्यांना ३ लाखांपर्यंत कर्जमाफी देणार
9. नियामित कर्ज फेडणाऱ्या शेतकऱ्यांना 50 हजारांपर्यंत सूट देणार
10.  राज्य सरकारच्या अडीच लाख जागांची भरती प्रक्रिया सुरु कऱणार
11. एमपीएससीचे वेळापत्रक जाहीर करून 45 दिवसांत निकाल जाहीर करणार
12.  महाराष्ट्रात जातीनिहाय जनगणना करणार, आरक्षणाची मर्यादा 50 टक्क्यांच्या वर नेणार
13. संजय गांधी निराधार योजनेच्या लाभार्थ्यांना दीड हजारांऐवजी 2 हजार देणार
14.  ३०० युनिटपर्यंत वीज वापर असणाऱ्यांचे 100  युनिटपर्यंतचे वीजबील माफ करणार
15. सरकारी कर्मचाऱ्यांना जुनी पेन्शन योजना लागू करणार
16.  स्थानिक स्वराज्य संस्थांच्या निवडणुकांचे वेळापत्रक जाहीर करणार
17.  महायुती सरकारने पक्षपाती भूमिकेतून काढलेल्या अध्यादेशांचा फेरविचार करणार
18.  महात्मा फुले, अण्णाभाऊ साठे, कर्मवीर भाऊराव पाटील याना भारतरत्न देण्याची मागणी करणार
19.  शिवभोजन थाळी योजना केंद्राची संख्या वाढणार
20.  सरकारी रुग्णालयात मोफत औषध उपलब्ध करून देणार
21.  राज्यात सुक्ष्म व लघू उद्योगांसाठी स्वतंत्र मंत्रालय स्थापन करणार