बालेकिल्ल्यातचं मनसेचं डिपॉझिट जप्त

www.24taas.com, झी मीडिया, नाशिक
ज्या शहरात मनसेची महापालिकेत सत्ता आहे, जे शहर मनसेचा बालेकिल्ला म्हणून ओळखलं जातं, या नाशिक शहरात मनसेचे लोकसभेचे उमेदवार डॉ.प्रदीप पवार यांचं डिपॉझिट जप्त झालं आहे.
राष्ट्रवादीचे छगन भुजबळ यांचा नाशिकमधून 1 लाख 87 हजार मतांनी पराभव झालाय, तर शिवसेनेचे हेमंत गोडसे नाशिक लोकसभा मतदारसंघातून निवडून आले आहेत.
मोदी लाटेने भक्त काँग्रेस, राष्ट्रवादीलाच नाही तर मनसेलाही धुवून टाकलंय, यात आता शंका घेण्यास जागा नसल्याचं यावरून स्पष्ट झालं आहे.
महाराष्ट्र नवनिर्माण सेनेचे अध्यक्ष राज ठाकरे यांनी पुणे आणि नाशिकमध्ये भरगच्च सभा घेतल्या. एका शहरात दोन-दोन, चार-चार सभा राज ठाकरेंनी घेतल्या, मात्र लोकसभा निवडणुकीत राज ठाकरेंना आज एकही जागा मिळतांना दिसत नाहीय.
राज ठाकरे यांनी आपल्या सभांमधून अनेकांवर टीकेचा भडीमार केलाय. मात्र राज ठाकरेंना अपेक्षित यश हाती लागतांना दिसत नाहीय. राज ठाकरे यांच्या सभांना सुरूवातीला चांगला प्रतिसाद होता, मात्र राज यांच्या शेवटच्या सभांना गर्दी ओसरतांना दिसत होती.
उद्धव ठाकरे यांचा करिष्मा मात्र राज्यात चालला आहे, असं म्हणावं लागेल कारण शिवसेना 19 जागांवर विजय मिळेल असं चित्र आहे.
मनसेला पुणे, नाशिक आणि मुंबईत एक तरी जागा मिळेल, असं म्हटलं जात होतं, पण मोदी नावाच्या वादळात ही स्वप्नही हरवून गेली आहेत.