२ वर्षानंतरही भारताचं ३ टी-२० मॅचच्या सीरिजचं 'अजय' रेकॉर्ड कायम

सिडनी : ऑस्ट्रेलियाविरुद्धच्या तिसऱ्या टी-२०मध्ये भारताचा ६ विकेटनं विजय झाला. याचबरोबर ३ टी-२० मॅचची ही सीरिज बरोबरीत सोडवण्यात भारताला यश आलं. पहिल्या टी-२० मॅचमध्ये भारताचा पराभव झाल्यानंतर दुसऱ्या टी-२०मध्ये पावसामुळे सामना रद्द झाला. त्यामुळे भारताला तिसरी टी-२० जिंकणं आवश्यक होतं. ही मॅच जिंकत भारतानं २०१६ पासून ३ टी-२० मॅचची सीरिज एकदाही न गमावण्याचं रेकॉर्ड कायम ठेवलं आहे. २०१६ पासून भारतानं आत्तापर्यंत ११ वेळा ३ टी-२० मॅचच्या सीरिज खेळल्या. यातल्या ९ सीरिजमध्ये भारताचा विजय झाला तर २ टी-२० सीरिज बरोबरीत सुटल्या. भारत आत्तापर्यंत फक्त एकदाच ३ टी-२० मॅचच्या सीरिजमध्ये हरला आहे.

भारतानं आत्तापर्यंत ३ टी-२० मॅचच्या १२ सीरिज खेळल्या आहेत. पहिल्यांदा २०१५ साली भारत आणि दक्षिण आफ्रिकेमध्ये ३ टी-२० मॅचची सीरिज झाली होती. या सीरिजमध्ये भारताचा २-०नं पराभव झाला होता. पण यानंतर जानेवारी २०१६ पासून ऑक्टोबर २०१८ पर्यंत भारतानं १० वेळा ३ टी-२० मॅचची सीरिज खेळली. यातल्या प्रत्येक सीरिजमध्ये भारताचा विजय झाला. पण ऑस्ट्रेलियानं भारताचं लागोपाठ ११वी सीरिज जिंकण्याचं स्वप्न धुळीस मिळवलं.

भारतानं पहिली टी-२० मॅच २००६ साली खेळली. पण ३ टी-२० मॅचची पहिली सीरिज भारत १० वर्षांनी म्हणजेच २०१६ साली खेळला. ऑस्ट्रेलियाविरुद्ध खेळलेली ही पहिलीच सीरिज भारत ३-०नं जिंकला.

भारत ऑस्ट्रेलियामध्ये तिसऱ्यांदा ३ मॅचची सीरिज

भारत आणि ऑस्ट्रेलियामध्ये तिसऱ्यांदा ३ टी-२० मॅचची सीरिज झाली. यातल्या पहिल्या दोन सीरिजमध्ये भारताचा विजय झाला तर तिसरी सीरिज बरोबरीत सुटली. 

भारताच्या ३ टी-२० मॅचच्या सीरिज 

विरुद्ध	विजयी टीम	विजयाचं अंतर	वर्ष
ऑस्ट्रेलिया	ड्रॉ	१-१(३)	२०१८
वेस्ट इंडिज	भारत	३-०(३)	२०१८
इंग्लंड	भारत	२-१(३)	२०१८
दक्षिण आफ्रिका	भारत	२-१(३)	२०१८
श्रीलंका	भारत	३-०(३)	२०१७
न्यूझीलंड	भारत	२-१(३)	२०१७
ऑस्ट्रेलिया	ड्रॉ	१-१(३)	२०१७
इंग्लंड	भारत	२-१(३)	२०१७
झिम्बाब्वे	भारत	२-१(३)	२०१६
श्रीलंका	भारत	२-१(३)	२०१६
ऑस्ट्रेलिया	भारत	३-०(३)	२०१६
दक्षिण आफ्रिका	दक्षिण आफ्रिका	२-०(३)	२०१५