कॅप्टन म्हणून 20 वर्षांपूर्वी द्रविडने न्यूझीलंडला चारलेली धूळ; आज कोच असलेल्या द्रविडची छाप सामन्यावर पडणार का?
Captain to Coach Rahul Dravid: आयसीसीच्या इव्हेंटमध्ये भारत आणि न्यूझीलंड 13 वेळा आमनेसामने आले आहेत. यामध्ये 10 वेळा न्यूझीलंड जिंकले आहे तर अवघ्या 3 वेळा टिम इंडियाला जिंकता आले आहे.
 "कॅप्टन म्हणून 20 वर्षांपूर्वी द्रविडने न्यूझीलंडला चारलेली धूळ; आज कोच असलेल्या द्रविडची छाप सामन्यावर पडणार का?")
Captain to Coach Rahul Dravid: सध्या सुरू असलेल्या ICC पुरुष एकदिवसीय विश्वचषक 2023 च्या २१व्या सामन्यात भारत आणि न्यूझीलंड हे दोन फॉर्मात असलेले संघ एकमेकांविरुद्ध भिडणार आहेत. थोड्याच वेळात हा सामना सुरु होईल. दोन्ही संघ स्पर्धेमध्ये आतापर्यंत अपराजित राहिल्या आहेत. भारत आणि न्यूझीलंड दोन्ही टीम्सनी आधीचे चार सामने अगदी सहज जिंकले आहेत. दरम्यान टीम इंडियाला मागच्या 20 वर्षात वर्ल्डकपमध्ये न्यूझीलंडला हरवता आले नाही. 20 वर्षांपुर्वी म्हणजेच 2003 च्या वर्ल्डकपमध्ये राहुल द्रविडच्या नेतृत्वाखाली टिम इंडियाने ही कामगिरी केली होती. त्यानंतर वर्ल्डकपमध्ये न्यूझीलंडवर मात करता आली नाही. टिम इंडियाचा तेव्हाचा कॅप्टन ते आताचा कोच असा प्रवास करणारा द्रविड काय रणनीती आखणार याकडे साऱ्यांचे लक्ष लागले आहे.
आयसीसीच्या इव्हेंटमध्ये भारत आणि न्यूझीलंड 13 वेळा आमनेसामने आले आहेत. यामध्ये 10 वेळा न्यूझीलंड जिंकले आहे तर अवघ्या 3 वेळा टिम इंडियाला जिंकता आले आहे. ICC सामन्यात किवी युनिटवर भारताचा शेवटचा विजय दक्षिण आफ्रिकेतील सेंच्युरियन येथे 2003 एकदिवसीय विश्वचषकात मिळाला.
राहुल द्रविड आणि मोहम्मद कैफ यांच्या मॅच-सेव्हिंग पार्टनरशिपमुळे भारताला सुपर सिक्स स्टेजच्या लढतीत ब्लॅक कॅप्सचा पराभव करता आला होता. पण त्यालाही आता 20 वर्षे झाली.
न्यूझीलंडने गोलंदाजीचे शानदार प्रदर्शन करून भारताला मोठा धक्का दिला होता. पहिल्या हाफमध्ये झहीर खानच्या 4/42 च्या शानदार स्पेलमुळे किवीजचा संघ 45.1 षटकात अवघ्या 146 धावांत गुंडाळला गेला. भारताने लक्ष्याचा पाठलाग सहजतेने करेल अशी अपेक्षा होती. पण प्रत्यक्षात सारं गडगडलं.
वेगवान गोलंदाज शेन बाँडच्या डॉक्यात वेगळ्या कल्पना सुरु होत्या. त्याने वीरेंद्र सेहवागला एका धावेवर माघारी पाठवले. तर सौरव गांगुलीला (३) शानदार यॉर्कर टाकून आऊट केले. त्यावेळी जबरदस्त फॉर्मात असलेला सचिन तेंडुलकरही अवघ्या 15 धावांवर झेलबाद झाला होता. दरम्यान बाँडच्या चौथ्या षटकात टर्निंग पॉईंट आला. राहुल द्रविडचा सोपा झेल ब्रेंडन मॅक्युलमला सोडला आणि न्यूझीलंडला हा झेल खूप महागात पडला. हा तो क्षण होता जेव्हा न्यूझीलंडचा पराभव पत्करावा लागला होता.
द्रविड आणि कैफ यांनी 129* धावांची भक्कम भागीदारी केली. यानंतर भारताने सामना सात विकेट्स आणि 54 चेंडू राखून जिंकला.
राहुल द्रविडचा इतक्या वर्षाचा भक्कम अनुभव टिम इंडियाच्या मागे आहे. त्यामुळे टीम इंडिया आज चमत्कार करणार का? याकडे साऱ्यांचे लक्ष लागले आहे.
Pravin Dabholkar
"प्रवीण सुरेश दाभोळकर हे 'झी 24 तास' डिजिटलमध्ये चीफ सब एडीटर पदावर कार्यरत आहेत त्यांना मीडिया क्षेत्राचा 14 वर्षांचा अनुभव आहे. वयाच्या 21 व्या वर्षी त्यांनी प्रिंट मीडियातून आपल्या कारकिर्दीची सुरुवात केली. तिथे त्यांना लेखन आणि रिपोर्टिंगचा मौल्यवान अनुभव मिळाला. तेव्हापासून त्यांनी प्रिंट, टीव्ही आणि डिजिटल मीडियासह विविध माध्यमांमध्ये काम केले आहे. संशोधनात्मक अहवाल आणि फिचर रायटिंगकडे त्यांचा कल आहे. वाचकांना माहिती नसलेल्या कथा लोकांसमोर आणण्याची त्यांना आवड आहे. हे करीत असताना सविस्तर तपशील आणि अचूकतेकडे त्यांची कटाक्षाने नजर असते. फावल्या वेळात प्रविण आपल्या आनंदासाठी फिरणे, नवीन गोष्टी आत्मसात करणे आणि सामाजिक कार्यात गुंतलेले असतात. त्यांचे लेखन अनेकदा सामाजिक न्यायाच्या समस्यांबद्दलची त्यांची उत्कटता दर्शवते. तसेच आपल्या लेखणीच्या माध्यमातून समाजात सकारात्मक प्रभाव पाडण्यासाठी ते नेहमी प्रयत्नशील असतात."
...Read More