శ్రీనగర్: జమ్ముకాశ్మీర్‌లో దారుణం చోటుచేసుకుంది. సెంట్రల్ రిజర్వ్ డ్ పోలీస్ ఫోర్స్ (సీఆర్పీఎఫ్) కాన్వాయ్‌పై జైషే మహమ్మద్ ఉగ్రవాది ఆత్మాహుతి దాడికి పాల్పడ్డాడు. తన కారుతో కాన్వాయ్‌పైకి దూసుకుపోయిన ఉగ్రవాది తనను తాను పేల్చుకున్నాడు. ఈ దాడిలో 18 మంది సైనికులు అమరులైనట్టు ప్రాథమిక సమాచారం అందగా ఆ తర్వాత అమరులైన సైనికుల సంఖ్య 30కి చేరినట్టు తెలుస్తోంది. ఇంకొంతమంది సైనికులు తీవ్రంగా గాయపడ్డారు. పుల్వామా జిల్లా అవంతిపురలోని లెత్‌పుర ప్రాంతంలో గురువారం మధ్యాహ్నం ఈ దాడి జరిగింది. 76వ సీఆర్పీఎఫ్ బెటాలియన్‌కి చెందిన సైనికులు 70 బస్సుల్లో జమ్ము నుంచి శ్రీనగర్‌కు తరలి వెళ్తుండగా మానవబాంబు ఈ దాడికి పాల్పడ్డాడు.
దాడికి పాల్పడిన సూసైడ్ బాంబర్‌ని ఆదిల్ అహ్మద్‌గా పోలీసులు గుర్తించినట్టు తెలుస్తోంది. జమ్ముకాశ్మీర్ పోలీసులు వెల్లడించిన వివరాల ప్రకారం అదే పుల్వామా జిల్లాలోని కాకపుర ప్రాంతానికి చెందిన ఆదిల్ 2018లోనే జైషే మహమ్మద్ ఉగ్రవాద సంస్థలో చేరినట్టు సమాచారం.
