Pitru paksha 2024 date: ప్రతి సంవత్సరం ఒక 15 రోజులపాటు పితృపక్షం ఏర్పడుతుందన్న విషయం తెలిసిందే. పక్షం అంటే 15 రోజులు.. ఈ పితృపక్షం అంటే పితురులకు ప్రత్యేకం.. ఈ సమయంలో చనిపోయిన పెద్దలకు శ్రాద్ధం , తర్పణం చేస్తారు. ప్రతి ఏడాది వచ్చే ఈ పితృపక్షం ఈ కార్యక్రమాలకు అంకితం చేయబడింది. ఈ ఏడాది పితృపక్షం అంటే రేపు సెప్టెంబర్ 18వ తేదీ బుధవారం నుంచి ప్రారంభం కానుంది. ఈ సమయంలో ప్రత్యేకించి మగవారు కొన్ని పొరపాట్లను అస్సలు చేయకూడదని పండితులు చెబుతున్నారు.
ఈ ఏడాది సెప్టెంబర్ 18వ తేదీ నుంచి పితృపక్షం మొదలవుతుంది. కాబట్టి ఈ 15 రోజులపాటు పితృదేవులకు పిండ ప్రధానం చేయవచ్చు. అక్టోబర్ రెండవ తేదీ మహాలయ అమావాస్యతో ఈ పితృపక్షం ముగుస్తుంది.
పితృదేవతల ఆశీర్వాదం ఉంటే వంశాభివృద్ధి , జీవితంలో ఇతర ఆటంకాలు ఎదురవకుండా ఉంటాయని పెద్దలు విశ్వసిస్తారు . అందుకే వారిని శాంతింప చేయడానికి ఈ పితృపక్ష సమయంలో కాకులకు పిండం , బ్రాహ్మణులకు భోజనాలు, వస్త్రదానం, శ్రాద్ధ కర్మలు లాంటివి నిర్వహిస్తారు.
ప్రతి ఏడాది భాద్రపద శుక్లపక్ష పౌర్ణమి రోజు ప్రారంభమై.. ఆశ్వీయుజ మాసం కృష్ణ పక్షం అమావాస్యతో పితృపక్షం పూర్తవుతుంది. అయితే ఈ పితృపక్షంలో ప్రత్యేకించి మగవారు కొన్ని పనులు చేయకూడదని పండితులు హెచ్చరిస్తున్నారు.
ముఖ్యంగా పితృపక్షంలో మగవారు ఆహారంలో ఉల్లి, వెల్లుల్లిని అసలు తినకూడదు. ఈ సమయంలో ఎటువంటి దానాలు చేసినా సరే పితృదేవుల ఆశీర్వాదం లభిస్తుంది. ఈ సమయంలో ఉదయాన్నే లేచి స్నానాలు నిర్వహించి, పూజలు నిర్వహించాలి. ముఖ్యంగా మహిళలు రుతుక్రమంలో ఉంటే పితృపక్షంలో పితృదేవుళ్ళ కోసం ఆహారం వండకూడదు. ఈ పనులన్నీ కూడా మగవారే చేసుకోవాలి.
మద్యం, మాంసానికి దూరంగా ఉండాలి. అలాగే బ్రహ్మచర్యం పాటించాలి. పితృపక్షం అంటే పీడ దినాలుగా పరిగణిస్తారు. కాబట్టి కొత్త పనులు ఏవి కూడా ప్రారంభించకూడదు. కారు , ఇల్లు వంటివి కొనుగోలు చేయరాదు. అలాగే గృహోపకరణాలు, శుభకార్యాలు వంటివి చేపట్టరాదు.
మగవారి విషయానికి వస్తే జుట్టు కత్తిరించుకోవడం, షేవింగ్, గోళ్ళు కత్తిరించుకోవడం లాంటివి చేయరాదు. కొత్త దుస్తులు కూడా కొనుగోలు చేయరాదు. ఇలాంటి జాగ్రత్తలు పాటిస్తే పితృదేవుల ఆశీర్వాదం లభిస్తుందని సమాచారం.
