વિવાદથી ઘેરાયેલો રહ્યો રાષ્ટ્રીય ફિલ્મ પુરસ્કાર, અનેક વિજેતાઓએ ન આપી હાજરી

નવી દિલ્હી : દિલ્હીના વિજ્ઞાન ભવનમાં ગુરુવારે 65માં નેશનલ ફિલ્મ એવોર્ડ પ્રોગ્રામનું આયોજન કરાયું હતું. આ દરમિયાન બોલિવૂડની તે તમામ હસ્તીઓને યાદ કરાઈ હતી જે હવે આ દુનિયામાં નથી. શ્રીદેવીને તેમના મરણોપરાંત રાષ્ટ્રીય પુરષ્કાર આપવામાં આવ્યો. આ એવોર્ડને લેવા માટે તેમના પતિ બોની કપૂર બંને દીકરીઓ સાથે સ્ટેજ પર પહોંચ્યા હતા.

65માં રાષ્ટ્રીય ફિલ્મ એવોર્ડ સમારોહની સાથે આ વર્ષે વિવાદ જોડાયો છે. આ વર્ષે 131 વિજેતાઓમાંથી 65 વિજેતાઓના વિરોધ વ્યક્ત કરતા આ સમારોહમાં ભાગ જ લીધો નહીં. રાષ્ટ્રપતિના હસ્તે એવોર્ડ નહીં મળવાને લીધે આ વિજેતાઓએ નારાજગી વ્યક્ત કરી હતી. બુધવારે વિજ્ઞાન ભવનમાં રિહર્સલ દરમિયાન એવોર્ડ સ્વીકારનારા વિજેતાઓને જ્યારે ખ્યાલ આવ્યો કે કેટલાક સિલેક્ટેડ લોકોને જ રાષ્ટ્રપતિ રામનાથ કોવિંદ સમ્માનિત કરશે તો આ વાત અન્ય કેટલાક વિજેતાઓને પસંદ ના પડી. 

નારાજ વિજેતાઓએ જણાવ્યું કે 64 વર્ષથી આ પુરસ્કાર રાષ્ટ્રપતિ દ્વારા અપાય છે, છેલ્લી ઘડીએ રાષ્ટ્રપતિના હસ્તે એવોર્ડ નહીં મળવાની જાણ કરવી તે અપમાનજનક છે. કેટલાક વિજેતાઓ્ને આ વાત ગમી નહીં કે રાષ્ટ્રપતિના હાથે ફક્ત 11 સિલેક્ટેડ લોકોનું સન્માન કરાયું. જેથી નારાજ થઈને 65 જેટલા એવોર્ડ વિજેતાઓએ બોયકોટ કર્યું અને કાર્યક્રમમાં સામેલ થયા નહોતા.