મોરબીમાં પહેલા હીરોઇન આવી અને પછી હેરોઇન આવ્યું, શું કંઇક અલગ જ રંધાઇ રહ્યું છે?

મોરબી : ઝીંઝુડા ગામે રહેણાંક મકાનમાંથી ૧૧૮ કિલો જેટલા હેરોઇનના જથ્થા સાથે ત્રણ શખ્સોની ધરપકડ કરવામાં આવી હતી. એટીએસની ટીમ દ્વારા જે ત્રણ આરોપીઓને પકડવામાં આવ્યા હતા. તેને આજે મોરબીની પ્રિન્સિપાલ ડ્રીસ્ટકટ એન્ડ એડિશનલ સેશન્સ કોર્ટ અને એનડીપીએસની સ્પેશિયલ કોર્ટમાં રજૂ કરવામાં આવ્યા હતા. કોર્ટે બંને પક્ષના વકીલોની દલીલને ધ્યાનમાં રાખીને એટીએસની ટીમ દ્વારા ૧૪ દિવસના રિમાન્ડ માગવામાં આવ્યા હતા. તેની સામે ૧૨ દિવસના રિમાન્ડ મંજૂર કરવામાં આવેલ છે. જેથી કરીને આગામી ૨૮ તારીખ સુધી ૩ શખ્સો એટીએસના કબજામાં રહેશે અને તે દરમિયાન કેટલાક નવા ચોંકાવનારા ખુલાસાઓ પણ થાય તેવી શક્યતાઓ દેખાઈ રહી છે.

ગુજરાતના દરિયા કાંઠેથી ગુજરાતની અંદર મોટા પ્રમાણમાં જથ્થો ઉતારવામાં આવ્યો હોય તે રીતે છેલ્લા દિવસોમાં જુદી જુદી જગ્યા ઉપરથી ડ્રગ્સનો મોટો જથ્થો પકડાઇ રહ્યો છે, તેવામાં મોરબીની વાત કરીએ તો મોરબી તાલુકાના ઝીંઝુડા ગામેથી સમસુદિન પીરજાદા નામના શખ્સનાં ઘરમાઠી ૧૧૮ કિલો હેરોઇનના જથ્થા સાથે ત્રણ શખ્સો પકડાયા હતા. જેમાં ઝીંઝુડા ગામના સમસુદ્દીન હુસૈનમીયાં સૈયદ (ઉ.૩૭), મુખ્તાર હુશૈન ઉર્ફે જબ્બાર હાજી નૂરમોહમ્મદ રાવ (ઉ.૩૯) રહે. બસ સ્ટેન્ડ રોડ, મેઇન બજાર, જોડીયા અને ગુલામ હુસૈન ઉમર ભગાડ રહે. સલાયા જિલ્લો દેવભૂમી દ્વારકાનો સમાવેશ થાય છે. આ ત્રણ શખ્સોને મોરબી પ્રિન્સીપાલ ડિસ્ટ્રીકટ એન્ડ એડિશનલ સેશન્સ કોર્ટ અને  એનડીપીએસ સ્પેશિયલ કોર્ટમાં આજે રજૂ કર્યા હતા. ત્યારે જજ એ.ડી. ઓઝાએ  બંને પક્ષના વકીલની દલીલને ધ્યાનમાં રાખીને હાલમાં આરોપીના આગામી તારીખ ૨૮ સુધી એટલે કે બાર દિવસના રિમાન્ડ મંજુર કર્યા છે.

રવિવારે સાંજના સમયે મોરબી તાલુકાના ઝીંઝુડા ગામે સમસુદ્દીન હુસૈનમીયાં સૈયદ કે જે મૂળ બાબરા તાલુકાના મીયા ખીજડીયા ગામનો રહેવાસી છે. તેના ઘરની અંદર એટીએસની ટીમ દ્વારા રેડ કરવામાં આવી હતી. તેના ઘરની અંદરથી જામનગર જિલ્લાના જોડિયા મુખ્તાર હુશૈન ઉર્ફે જબ્બાર હાજી નૂરમોહમ્મદ રાવ અને તેની સાથે સલાયાનો રહેવાસી ગુલામ હુસૈન ઉમર ભગાડ મળી આવ્યા હતા. ત્રણેય શખ્સો પાસેથી કુલ મળીને ૧૧૮ કિલો હેરોઇનનો જથ્થો મળી આવ્યો હતો. જેથી કરીને પોલીસે ૫૯૩.૨૫ કરોડના ડ્રગ્સ સાથે આ ત્રણેય આરોપીઓની ધરપકડ કરી હતી. તેની પાસેથી જે માલ મળી આવ્યો છે. તે તેની પાસે ક્યાંથી આવ્યો હતો અને કઈ દિશામાં આગળ મોકલવાનો હતો તે તમામ પ્રકારની માહિતીઓ મેળવવાની હોય હાલમાં તેને રિમાન્ડ ઉપર લેવામાં આવેલ છે. આરોપીઓના રિમાન્ડ દરમ્યાન આ નેટવર્કનો પર્દાફાશ કરવામા એટીએસને મોટી સફળતા મળે તેવી શક્યતા છે. 

હાલમાં મોરબીની કોર્ટ દ્વારા આરોપીઓના રિમાન્ડ મંજૂર કરવામાં આવ્યા છે. જેથી કરીને મોરબીથી એટીએસની ટીમ ત્રણેય આરોપીઓને લઈને અમદાવાદ જવા માટે રવાના થયેલ છે. સૂત્રો પાસેથી જાણવા મળતી વિગતો પ્રમાણે પકડાયેલા ત્રણ આરોપી પૈકીના મુખ્તાર હુશૈન ઉર્ફે જબ્બાર અને ગુલામહુસેન ઉમર આ બંને ઈન્ટરનેશનલ ડ્રગ માફિયાઓ સાથે કોન્ટેકટમાં હોય તેવી પ્રાથમિક વિગતો સામે આવી છે. જેથી કરીને તે બન્નેને સાથે રાખીને આ તપાસ આગળ વધારવામાં આવશે. હજુ પણ કેટલાક આમાં મોટા માથાઓના નામ સામે આવે તેવી શક્યતાઓ દેખાઇ રહી છે જો કે, પોલીસ તપાસમાં શું વિગતો સામે આવશે તે તો સમય જ બાતવશે.