સિવિલ હોસ્પિટલની બેદરકારી, 8 મેએ દર્દીનું મોત, પરિવારને ન મળી કોઈ જાણકારી

અમદાવાદઃ અમદાવાદમાં કોરોના વાયરસના કેસો સતત વધી રહ્યાં છે. શહેરમાં કોરોના વાયરસની સારવાર સિવિલ હોસ્પિટલ અને એસવીપી હોસ્પિટલમાં કરવામાં આવી રહી છે. આ વચ્ચે સિવિલ હોસ્પિટલમાં બનાવવામાં આવેલી કોવિડ હોસ્પિટલની ઘોર બેદરકારી સામે આવી છે. હોસ્પિટલમાં એક દર્દીનું ગત 8 મેના રોજ મૃત્યુ થયું હતું. પરંતુ તેનો પરિવાર આ બાબતથી અજાણ રહ્યો હતો.

શું છે સમગ્ર મામલો
4 મેના રોજ પોરબંદરના એક દર્દીને સિવિલમાં આવેલી કેન્સર હોસ્પિટલમાં સારવાર માટે લાવવામાં આવ્યો હતો. ત્યારબાદ 5 મેના રોજ આ દર્દીને કેન્સર હોસ્પિટલમાંથી 1200 બેડની હોસ્પિટલમાં કોરોના ટેસ્ટ માટે ખસેડવામાં આવ્યો હતો. સારવાર દરમિયાન આ વ્યક્તિનું 8 તારીખે મોત નિપજ્યું હતું. જો કે તેનો કોરોના રિપોર્ટ નેગેટિવ આવ્યો હતો. આ દર્દીના મોતથી તેનો પરિવાર અજાણ હતો. તેના સુધી કોઈ માહિતી પહોંચી શકી નથી. ત્યારબાદ પોરબંદરથી આવતા કોંગ્રેસના નેતા અર્જુન મોઢવાડિયા દ્વારા પણ આ દર્દી વિશે હોસ્પિટલમાંથી માહિતી માગવામાં આવી હતી. ત્યારે સિવિલના તંત્રએ 12 તારીખે તેમની પાસે કોઈ માહિતી ન હોવાનો જવાબ આપ્યો હતો. પરિવારજનોએ પણ સિવિલ હોસ્પિટલની કાર્યવાહી સામે ગંભીર સવાલ ઉઠાવ્યા છે. 

હોસ્પિટલની આ બેદરકારી બાદ હોસ્પિટલના ઓફિસર ઓ સ્પેશિયલ ડ્યુટી એમ. પ્રભાકરે નિવેદન આપ્યું છે. તેમણે કહ્યું કે, 4 મેના રોજ આ દર્દી પોરબંદરથી આવ્યો હતો. ત્યારબાદ પાંચ મેના રોજ તેને કોવિડ હોસ્પિટલમાં ખસેડવામાં આવ્યો અને તેનો કોરોના ટેસ્ટ કરાવ્યો જે નેટેગિટ આવ્યો હતો. સારવાર દરમિયાન આ દર્દીનું 8 મેના રોજ મોત થયું હતું. ત્યારબાદ તેના પરિવારનો સંપર્ક કરવાનો પ્રયાસ કરાયો હતો. પરિવારજનોના આપેલા ફોન નંબર અને હોસ્પિટલ કેમ્પસમાં પણ તેના સ્વજનોની શોધ કરવામાં આવી હતી. તેના પરિવારજનોનો સંપર્ક ન થઈ શકતા તેનો મૃતદેહ કોલ્ડરૂમમાં રાખવામાં આવ્યો હતો. હવે આજે તેના પરિવારજનો આવતા મૃતદેહની ખરાઇ કરીને સોંપી દેવામાં આવશે.