IPL 2022: પ્લેઓફ અને ફાઈનલ મેચ અમદાવાદ અને કોલકાતામાં રમાશે, BCCIએ જાહેરાત કરી

IPL 2022 Playoffs To Be Played At Ahmedabad & Kolkata: IPLની 15મી સિઝનના પ્લેઓફ રાઉન્ડની મેચોની તારીખો અને સ્થળની મંગળવારે જાહેરાત કરવામાં આવી હતી. BCCI સેક્રેટરી જય શાહે જણાવ્યું કે ટૂર્નામેન્ટની આ છેલ્લી 4 મેચો અમદાવાદ અને કોલકાતામાં રમાશે. અગાઉ બોર્ડે લીગ મેચોનું શેડ્યૂલ જાહેર કર્યું હતું, જેના હેઠળ આ લીગ 26 માર્ચથી શરૂ થઈ હતી.

અગાઉ બીસીસીઆઈએ આ 4 મેચોનું શેડ્યૂલ જાહેર કર્યું ન હતું કારણ કે તે ભારતમાં કોરોના વાયરસની સ્થિતિનું મૂલ્યાંકન કરીને આ મેચોનું શેડ્યૂલ નક્કી કરવા માંગે છે. બોર્ડની પહેલેથી જ યોજના હતી કે આ વખતે મુંબઈ અને પૂણેમાં રમાઈ રહેલી આ લીગના છેલ્લા તબક્કાની આ મેચો દેશના અન્ય સ્થળોએ રમાશે. હવે જ્યારે દેશમાં આ વાયરસના કારણે સ્થિતિ નિયંત્રણમાં છે, ત્યારે બોર્ડે તેની યોજના લાગુ કરી છે.

મંગળવારે જાહેરાત કરતાં જય શાહે જણાવ્યું છે કે, “એ જણાવતાં ખૂબ જ આનંદ થાય છે કે IPL 2022નો પ્લેઓફ રાઉન્ડ અમદાવાદ અને કોલકાતામાં યોજાશે. મેગા ફાઇનલ 29 મેના રોજ નરેન્દ્ર મોદી સ્ટેડિયમમાં રમાશે, આ સિવાય 27 મેના રોજ ક્વોલિફાયર 2ની મેચ પણ આ સ્ટેડિયમમાં રમાશે.

BCCI સેક્રેટરીએ વધુમાં જણાવ્યું છે કે, "ક્વોલિફાયર 1 અને એલિમિનેટર મેચ કોલકાતાના ઈડન ગાર્ડન્સમાં 24 અને 25 મેના રોજ રમાશે." આ પ્રસંગે બોર્ડના સચિવ જય શાહે પણ માહિતી આપી હતી કે મહિલા ટી20 ચેલેન્જની ચોથી સિઝનનું આયોજન પુણેમાં થશે. મહિલા ટી20 ચેલેન્જની મેચોની તારીખો 23, 24 અને 26 મે હશે, જ્યારે તેની ફાઈનલ 28 મેના રોજ રમાશે.

તમને જણાવી દઈએ કે આ વખતે દેશમાં કોરોના વાયરસની નિયંત્રિત પરિસ્થિતિને ધ્યાનમાં રાખીને બોર્ડે આ મહત્વાકાંક્ષી ટી20 લીગની સમગ્ર ઈવેન્ટનું આયોજન મુંબઈ અને પૂણેમાં જ બાયો બબલમાં કરવાનો નિર્ણય લીધો હતો. અગાઉ આ લીગ 2020માં કોરોના વાયરસ અસ્તિત્વમાં આવ્યા પછી સતત બે સીઝન માટે દુબઈમાં આયોજિત કરવામાં આવી હતી. ગત સિઝનમાં આ લીગનો પ્રથમ હાફ ભારતમાં યોજાયો હતો. પરંતુ આ દરમિયાન કોવિડ -19 ના બીજી લહેરે દેશમાં તાંડવ મચાવ્યો હતો, ત્યારબાદ પછી દુબઈમાં પૂર્ણ કરવામાં આવી હતી.