GUJARAT: થર્ડ વેવ માટે તૈયાર થઇ જાવ, સૌરાષ્ટ્રમાં ફરી કોરોના ફાટી નિકળ્યો, તંત્ર દોડતું થયું

રાજકોટ : શહેરમાં દિવાળીના તહેવાર બાદ ફરી એકવાર કોરોનાનો વેવ આવે તેવું લાગી રહ્યું છે. જે પ્રકારે કોરોનાના આંકડા અને ખાસ કરીને એવા જિલ્લાઓમાં કે જ્યાં કોઇ જ કેસ નહોતા આવતા ત્યાંથી કેસ આવવા લાગતા તંત્રની પણ ઉંઘ હરામ થઇ છે. બીજી સૌથી મહત્વની વાત છે કે, પોઝિટિવ ચારેય વ્યક્તિઓએ વેક્સિનના બંન્ને ડોઝ લઇ લીધા હતા. આ ઉપરાંત તેમની કોઇ પણ ટ્રાવેલ હિસ્ટ્રી નહોતી. આ લોકલ ટ્રાન્સમિશન હોય તેવી શક્યતાઓ જોવાઇ રહી છે. દિવાળીના તહેવારમાં જે પ્રકારે ભીડને ખુલ્લી છુટ આપી દેવાઇ હતી તે હવે ભીડ હવે ભારે પડી શકે છે. 

સૌરાષ્ટ્ર સહિત સમગ્ર ગુજરાતને આ દિવાળી ફરી એકવાર મોંઘી પડે તેવી શક્યતાઓ જોવાઇ રહી છે. દિવાળીનો તહેવાર પુર્ણ થતાની સાથે જ સૌરાષ્ટ્રમાં ફરી એકવાર કોરોનાના કેસમાં ઉછાળો જોવા મળ્યો હતો. સૌરાષ્ટ્રમાં એક સાથે 11 કેસ સામે આવ્યા હતા. રાજકોટ શહેર માં 4 કેસ સામે આવ્યા હતા. આ ઉપરાંત જૂનાગઢ શહેરમાં 3 અને ગ્રામ્યમાં 2 જ્યારે ભાવનગરમાં 2 કેસ સામે આવતા તંત્રને પણ પરસેવો મળી ગયો હતો. અત્રે નોંધનીય છે કે,  રાજકોટ શહેરમાં 5, ગીર સોમનાથમાં 2 દર્દીને ડિસ્ચાર્જ કરવામાં આવ્યા છે.

ગુજરાતમાં હાલ જે પ્રકારે કોરોનાના કેસમાં વધારો થઇ રહ્યો છે તે એક જ પ્રકારની પેટર્ન જોવા મળી રહી છે. અગાઉ જ્યારે કોરોનાનો સેકન્ડ વેવ આવ્યો તે અગાઉ પણ દિવાળીના તહેવાર દરમિયાન ભારે ભીડ જોવા મળી હતી. આ ભીડને સરકાર દ્વારા પણ છુપી છુટ આપવામાં આવી હતી. જેના પગલે કોરોનાને કેસમાં દિવાળી બાદ અચાનક ઉછાળો આવ્યો હતો અને ત્યાર બાદ સેકન્ડ વેવમાં ગુજરાતની જે સ્થિતિ થઇ તે ખુબ જ ભયજનક હતી. અનેક ગુજરાતીઓએ પોતાના સ્વજનો ગુમાવવા પડ્યાં હતા.