શું આ છે વિકાસ મોડેલ? GUJARAT નો આ વીડિયો જોઇને મંત્રીથી લઇને સંત્રી સુધી તમામના માથા શરમથી ઝુકી જશે

આણંદ : ગુજરાતમાં હાલ એક ખુબ જ ચોંકાવનારો વીડિયો વાયરલ થઇ રહ્યો છે. સામાન્ય રીતે આવા વીડિયો ઉત્તરપ્રદેશ કે બિહારમાં જોવા મળતા હોય છે પરંતુ આ વીડિયો ત્યાંનો નહી પરંતુ ગુજરાતનો અને તેમાં પણ ખુબ જ વિકસિત ગણાતા આણંદ જિલ્લાના વાસદ ગામનો છે. જ્યાં એવું કહેવાય છે કે, દરેક ઘરમાંથી એક વ્યક્તિ NRI છે અને જે ગામના વિકાસની વાતો અનેક વખત છાપે ચડી ચુકી છે. આ ગામમાં શબવાહિની નહી મળી શકવાનાં કારણે એક પરિવારે મૃતદેહને સાયકલમાં લઇ જવો પડ્યો હતો. 

ચોંકાવનારી બાબત તો એ છે કે, આ ગામમાં CNG સ્મશાનગૃહ છે પરંતુ મૃતદેહને લઇ જવા માટેની શબવાહીની નથી. એક અઠવાડીયા જુનો આ વીડિયો હાલ સોશિયલ મીડિયા પર ખુબ જ વાયરલ થઇ રહ્યો છે. આ વીડિયો વાયરલ થયા બાદ હાલ અનેક સવાલો ઉઠી રહ્યા છે. જે ગુજરાત મોડેલનાં નામે સરકાર ફેફસા ફુલાવતી ફરે છે શું આ જ તે ગુજરાત મોડલ છે. બીજી મહત્વની વાત છે કે, સાંસદ મિતેશ પટેલનું ગામ વાસદ છે અને ત્યાં નાગરિકે રઝળવાની ફરજ પડી હતી. 

સમગ્ર ગુજરાતને શરમજનક સ્થિતિમાં મુકે તેવો વીડિયો વાયરલ થતા તંત્રમાં પણ દોડધામ મચી ગઇ છે. ગુજરાતમાં અમીરોના તો બધા છે પરંતુ ગરીબોનું કોઇ નથી. ગરીબ પરિવારનાં મોભીનું નિધન થતા જીવતા તો જેની લાજ કોઇએ નહી રાખી હોય તેવા વ્યક્તિને મોત પછી પણ ઇજ્જત મળી નહોતી. હાઇસ્કુલ નજીક પાંચ કલાક મૃતદેહ રઝળતો રહ્યો હતો. આખરે પરિવારને લાગ્યું કે આપણી વ્હારે કોઇ નહી આવે ત્યારે તેમણે પોતાની પાસે હતા તે પૈસામાંથી પેડલરિક્ષા કરીને મૃતદેહને સ્મશાને પહોંચાડ્યો હતો.