Motera Stadium નું નામ બદલાયું, હવે કહેવાશે ‘નરેન્દ્ર મોદી સ્ટેડિયમ’

• રાષ્ટ્રપતિ રામનાથ કોવિંદે મોટેરા સ્ટેડિયમનુ ઉદઘાટન કર્યું હતું. જેના માટે તેમણે સ્ટેડિયમની તકતીનું અનાવરણ કર્યું હતું. ત્યારે સૌ કોઈ આશ્ચર્યચકિત થઈ ગયા

ઝી મીડિયા/બ્યૂરો :નવનિર્મિત મોટેરા સ્ટેડિયમનું નામ બદલાયું છે. મોટેરા સ્ટેડિયમ હવે નરેન્દ્ર મોદી સ્ટેડિયમના નામે ઓળખાશે. રાષ્ટ્રપતિ રામનાથ કોવિંદે મોટેરા સ્ટેડિયમનુ ઉદઘાટન કર્યું હતું. જેના માટે તેમણે સ્ટેડિયમની તકતીનું અનાવરણ કર્યું હતું. ત્યારે સૌ કોઈ આશ્ચર્યચકિત થઈ ગયા હતા. મોટેરા સ્ટેડિયમને નરેન્દ્ર મોદી સ્ટેડિયમ નામ અપાયું છે. ત્યારે વિશ્વના સૌથી મોટા સ્ટેડિયમ સાથે હવે વડાપ્રધાન નરેન્દ્ર મોદીનું નામ જોડાયું છે. સ્ટેડિયમની આસપાસના 233 એકર વિસ્તારમાં સ્પોર્ટ્સ એન્ક્લેવનું પણ ભૂમિપૂજન રાષ્ટ્રપતિના હસ્તે કરવામાં આવ્યું છે. ત્યારે હવે આ એન્ક્લેવ સરદાર વલ્લભભાઈ પટેલ સ્પોટર્સ એન્ક્લેવ તરીકે ઓળખાશે. 

ગુજરાત ક્રિકેટ એસોસિયેશને તેનું નામ બદલીને નરેન્દ્ર મોદી સ્ટેડિયમ કરી દીધું છે. સાથે જ નરેન્દ્ર મોદી સ્ટેડિયમની જાહેરાત થતા જ સ્ટેડિયમ એન્ટ્રી પર નામ પાસે લાગેલો પડદો હટાવવામાં આવ્યો હતો. સરદાર વલ્લભભાઈ પટેલ સ્પોટર્સ એન્ક્લેવમાં બનાવવામાં આવેલ ભવ્ય સ્ટેડિયમને નરેન્દ્ર મોદી સ્ટેડિયમ નામ અપાયું છે. 

આ પણ વાંચો : ગુજરાતમાં કોંગ્રેસનું રમણભમણ થઈ ગયું, 175 માંથી 55 બેઠકો પર સમેટાઈ 

અમદાવાદ હવે સ્પોર્ટિસ સિટીના નામે ઓળખાશે 
સરદાર પટેલ સ્પોર્ટ્સ કોમ્પ્લેક્સ, નારણપુરામાં 18 એકરનું સ્પોર્ટ્સ કોમ્પ્લેક્ષ બનશે. આંતરરાષ્ટ્રીય રમતવીરો માટે તમામ સુવિધાઓ એક જ શહેરમાં હશે. 233 એકર જમીન પર બધુ તૈયાર થશે. ઓલિમ્પિક રમત માટે 6 મહિનામાં તૈયાર થઈ શકીએ એટલી ક્ષમતા આપણી છે. અમદાવાદ હવે સ્પોર્ટ્સ સિટીના નામે ઓળખાશે. મોદીજીનું સ્વપ્ન હતું. તેમના વિઝનની વાત નહીં કરું તો વાત અધૂરી રહેશે. મોદીજીએ કહ્યું હતું કે રમત અને સેનામાં ગુજરાતે આગળ વધવું જોઈએ. આજે સેનાની ભરતીમાં ક્વોટા ખાલી નથી જતો જે અગાઉ ખાલી જતો. 650 સ્કૂલને નરેન્દ્ર મોદી સ્ટેડિયમ સાથે જોડીશું. અહીં બાળકો આવશે રમશે અને જમીને અહીંથી જશે. 34 બસોથી જોડીશું. આજની મેચમાં શ્રીનાથ મેચના રેફરી છે, આ મેદાન તેમના માટે યાદગાર છે. 

આ પણ વાંચો : ‘દીકરીઓને તેના લૂકથી જજ કરવાનું બંધ કરો...’ યુવતીએ કેન્સર પીડિતો માટે વાળ દાન કરીને આપ્યો આ મેસેજ

કોંગ્રેસકાળમાં સરદારનું નામ ભૂલાયું 
અમિત શાહે વધુમાં કહ્યું કે, કોંગ્રેસે એમના શાસનમાં સરદારનું નામ ભૂલાય એવા કામ કર્યા. મોદીજીએ એવી વ્યસ્થા કરી કે સરદારનું નામ કોઈ ભૂંસી નહિ શકે. મોદીજીની પ્રેરણાથી સરદાર પટેલ સ્પોર્ટ્સ એન્કલેવ બની રહ્યું છે. જે યુવાનો સાથે વર્ષો સુધી જોડાયેલું રહેશે. 3200 કરોડ સરકારી અને 1400 કરોડના ખર્ચે PPE મોડલની મદદથી અહીં 4600 કરોડનું સ્પોર્ટ્સ કોમ્પ્લેક્ષ હશે. આ એન્ક્લેવમાં હોકી સ્ટેડિયમ ધ્યાનચંદજીના નામથી બનશે. 2003 થી હું મોદીજી સાથે કામ કરૂં છું. મોદીજીએ હંમેશા કહ્યું છે કે રમતમાં જ્યાં સુધી યુવાનો આગળ નહીં આવે દેશ માટે કઈ નહિ કરી શકે. 

આ પણ વાંચો : ક્રિકેટ પ્રેમીઓ ગેલમાં, રાષ્ટ્રપતિએ કર્યું વિશ્વના સૌથી મોટા મોટેરા સ્ટેડિયમનું ઉદઘાટન

મોટેરા સ્ટેડિયમની સફર વિશે...
ગુજરાત ક્રિકેટ એસોસીએશન (GCA) દ્વારા અમદાવાદના મોટેરામાં તૈયાર કરાયેલું વિશ્વનું સૌથી મોટું ક્રિકેટ સ્ટેડિયમ વડાપ્રધાન નરેન્દ્ર મોદીનો ડ્રીમ પ્રોજેક્ટ છે. વર્ષ 2014માં GCAના પ્રેસિડેન્ટ તરીકે અને મુખ્યમંત્રી તરીકે તેમણે વિચાર મૂક્યો હતો કે 25 વર્ષ જૂનું મોટેરા સ્ટેડિયમ સંપૂર્ણપણે તોડીને તેની જગ્યાએ નવું સ્ટેડિયમ બનાવીએ. જે શ્રેષ્ઠતમ સુવિધાઓ સાથે વિશ્વનું સૌથી મોટું સ્ટેડિયમ હોય. ત્યારબાદ, GCAના પ્રમુખ તરીકે તેમના અનુગામી અને હાલમાં ભારતના કેન્દ્રીય ગૃહમંત્રી અમિત શાહે આ વિશાળ પ્રોજેક્ટની ધૂરા સંભાળી અને GCAના ભૂતપૂર્વ સિનિયર વાઇસ પ્રેસિડેન્ટ પરિમલ નથવાણી અને BCCIના સેક્રેટરી, એશિયન ક્રિકેટ કાઉન્સિલના ચેરમેન તથા GCAના પૂર્વ જોઇન્ટ સેક્રેટરી જય શાહે સંપૂર્ણ સહયોગ સાંપડ્યો. સપ્ટેમ્બર 28, 2019ના રોજ GCAનું નેતૃત્વ સંભાળવા માટે ઉપાધ્યક્ષ તરીકે ધનરાજ નથવાણીની આગેવાનીમાં ટીમ ચુંટાઈ અને આ ટીમે મોટેરા સ્ટેડિયમને આખરી ઓપ આપ્યો.

મોટેરા ખાતે નવનિર્મિત સ્ટેડિયમના મહત્વનાં પાસાં:

• 1,10,000 બેઠક ક્ષમતા ધરાવતું વિશ્વનું સૌથી મોટું ક્રિકેટ સ્ટેડિયમ
• ઓસ્ટ્રેલિયન કંપની પોપ્યૂલસ કન્સેપ્ટ આર્કિટેક્ટ છે; L&T ડેવલપર (ડિઝાઇન અને નિર્માણ) છે તથા STUP કન્સલ્ટન્ટ પ્રોજેક્ટના પ્રોજેક્ટ મેનેજમેન્ટ કન્સલ્ટન્ટ (PMC) છે
• સ્ટેડિયમમાં 76 એર કન્ડિશન્ડ કોર્પોરેટ બોક્સ છે, જે દરેકમાં 25ની બેઠક ક્ષમતા છે
• 63 એકર જમીનમાં પથરાયેલું સ્ટેડિયમ 
• લાલ અને કાળી માટીની કુલ 11 પીચ તૈયાર કરવામાં આવી છે
• મુખ્ય અને પ્રેક્ટિસ પીચ બનાવવા માટે એક સરખી માટીનો ઉપયોગ થયો હોય તેવું પહેલું સ્ટેડિયમ છે. મુખ્ય ગ્રાઉન્ડમાં લાલ માટીની છ પીચ અને પાંચ કાળી માટીની પીચ છે, જ્યારે એવું જ પ્રેક્ટિસ પીચમાં છે, જ્યાં લાલ માટીની પાંચ અને કાળી માટીની ચાર પીચ છે
• ખેલાડીઓ માટે કુલ ચાર ડ્રેસિંગ રૂમ છે - વિશ્વના અન્ય કોઈ સ્ટેડિયમમાં ખેલાડીઓ માટે ચાર ડ્રેસિંગ રૂમ નથી
• ટીમ માટેના ડ્રેસિંગ રૂમમાં ખેલાડીઓ માટે સૌથી આધુનિક જિમ્નેશિયમ તૈયાર કરવામાં આવ્યું છે
• વરસાદ બંધ થયાની 30 જ મિનિટમાં મેદાનમાંથી પાણી વહીને બહાર નીકળી જાય તથા રમત ફરી શરૂ થઈ શકે તેવી ખાસ સબ સોઇલ ડ્રેનેજ સિસ્ટમ તૈયાર કરવામાં આવી છે.
• નવ મીટરની ઊંચાઈનું 360 ડિગ્રી પોડિયમ કોનકોર્સ પ્રેક્ષકોની અવર જવરને ખૂબ જ સરળ બનાવે છે અને તેમને સુવિધા તથા સેવાઓ પૂરી પાડવા માટે જરૂરી અનુકૂળતા ઊભી કરી આપે છે
• ભવિષ્યના પ્રતિભાશાળી ખેલાડીઓને તૈયાર કરવા માટે ક્રિકેટ એકેડમી - ઇનડોર પ્રેક્ટિસ પીચ
• પેવેલિયન્સ અને સૌથી અત્યાધુનિક મીડિયા બોક્સ
• ભારતમાં પહેલીવારની ફિલ્ડ ઓફ પ્લે LED લાઇટ્સ
• હજારો કાર અને ટુ વ્હિલર માટે પર્યાપ્ત પાર્કિંગ
• ભવ્ય હોલ ઓફ ફેમ
• દરેક સ્ટેન્ડમાં ફૂડ કોર્ટ અને હોસ્પિટાલિટી એરિયા
• અત્યાધુનિક ક્લબ હાઉસ, જેમાં છે 50 ડિલક્સ રૂમ અને પાંચ સ્યૂટ રૂમ, ઇનડોર અને આઉટડોર ગેમ્સ, રેસ્ટોરન્ટ, ઓલિમ્પિક સાઇઝનો સ્વીમિંગ પૂલ, જિમ્નેશિયમ, પાર્ટી એરિયા, 3D પ્રોજેક્ટર થિયેટર/ટીવી રૂમ
• BRTS અને નિર્માણાધીન મેટ્રો સ્ટેશન જેવી પબ્લિક ટ્રાન્સપોર્ટ કનેક્ટિવિટી
• નાના પેવેલિયન એરિયા સાથેના બે પ્રેક્ટિસ ગ્રાઉન્ડ
• ફૂટબોલ, હોકી, બાસ્કેટ બોલ, કબડ્ડી, બોક્સિંગ, લોન ટેનિસ, રનિંગ ટ્રેક, વિગેરે જેવી અન્ય રમતો માટે સ્પોર્ટ્સ એકેડેમી
• નોર્થ પેવેલિયનનું નામ રિલાયન્સ જિયો નોર્થ સ્ટેન્ડ છે અને સાઉથ પેવેલિયનનું નામ અદાણી સાઉથ સ્ટેન્ડ