વરસાદમાં કાર આખેઆખી ડૂબી જાય તો વીમા માટે મૂંઝવાતા નહિ, આટલું કરશો તો વળતર મળી જશે

how to get insurance if a car sinks in a rain : વર્તમાન સમયમાં ઘણા રાજ્યોમાં પૂર જેવી સ્થિતિ સર્જાઈ છે અને માત્ર જાન-માલ જ નહીં પરંતુ મોંઘા વાહનોને પણ નુકસાન થઈ રહ્યું છે. તો ચાલો આજે તમને જણાવીએ કે વરસાદી પુરીના કારણે વાહનને નુકસાન થાય તો વીમા કંપની પાસેથી વળતર કેવી રીતે મેળવવું. 

હાલ ગુજરાતમાં વરસેલા વરસાદે ગાડી માલિકોને આર્થીક નુકસાનમાં ઉતાર્યા છે. કાર, બાઈક પાણીમાં ગરકાવ થતાં એન્જિનના હેડ, એન્જિનના બ્લોક પર અસર થઈ છે. છેલ્લા ત્રણ દિવસથી અમદાવાદના મોટાભાગની ગેરેજની દુકાનો પર ગાડીઓનો ભરાવો થયો છે. લાંબા સમય વાહનો પાણીમાં પડ્યા રહેતા વાહનોના પાર્ટસ બગડી ગયા છે. ભારે વરસાદમાં લોકોના વાહનો આખેઆખા પાણીમાં ડૂબી ગયા હોય તેવા પણ કિસ્સા બન્યા છે. ત્યારે જો તમારે ઈન્સ્યોરન્સ કંપનીમાં ક્લેઈમ પાસ કરાવવો હોય તો સૌથી પહેલા કરો આ કામ...

આ વિશે ઓટોમોબાઇલ એક્સપર્ટ મનિષ દવેએ જણાવ્યું કે, કાર લાંબો સમય પાણીમાં પડ્યા રહે તો અને તેને ચાલુ કરવાનો પ્રયાસ કરીએ તો એન્જિન હાઇડ્રોસ્ટેટીક લોક થાય છે. એન્જિન હાઇડ્રોસ્ટેટીક લોક થતાં તેનો ઇન્સ્યોરન્સ પાસ થતો નથી. જે વાહન માલિકે એન્જિન કવર અને ઓઇલ ટેન્ક કવર વીમો લીધો હોય તેને વરસાદમાં ડુબેલી કારના રીપેરીંગમાં લાભ મળે અને તે પણ ત્યારે જ્યારે વાહન માલિકે ગાડી ચાલુ ન કરી હોય ત્યારે જ, નહિ તો તેનો ફાયદો મળતો નથી. 

પાણીમાં જળ સમાધિ લીધેલ કારમાં સરેરાશ 10 હજારથી માંડી ૧૫ લાખ સુધીનો ખર્ચ આવે છે. સ્મોલ સેગમેન્ટની ગાડી પાણીમાં ડુબી હોય અને તેને ચાલુ કર્યા સિવાય વર્કશોપ સુધી લઇ જવાય તો તે ૧૦ થી ૧૫ સુધીના ખર્ચામાં રીપેર થઈ જાય છે. પણ જો આ વાહન સેલ મારીને ચાલુ કરવામાં આવેતો તેનો ખર્ચે વધીને 50 હજાર થી 75 હજાર સુધી પહોંચે છે.   

હાઇ એન્ડ અને લક્ઝુરીયસ કાર્સ પાણીમાં ડુબી હોય અને તેને ટો કરી વર્કશોપ લઇ જવાય તો તે ૨૫ થી ૩૦ હજાર સુધીમાં રીપેર થાય છે. પરંતુ જો આ કાર સેલ મારી ચાલુ કરવામાં આવેતો તેનો ખર્ચ 15 લાખ સુધી પહોંચે છે. હાઇએન્ડ કારમાં ઇવીએમ, બીસીએમ અને ઇલેક્ટ્રોનિક મોડ્યુલના કારણે રીપેરીંગ ખર્ચ વધારે આવે છે.   

આ રીતે વીમા માટે કરવો ક્લેમ

• સૌથી પહેલા તમારા પોલિસી નંબરનો ઉપયોગ કરીને સંબંધિત વીમા કંપનીના ટોલ-ફ્રી નંબર પર ક્લેમ માટે રિજસ્ટર્ડ કરો.
• કંપનીની વેબસાઇટ પરથી ક્લેમ ફોર્મ ડાઉનલોડ કરો અને તેને ભરો. બધા ડોક્યુમેન્ટ ભેગા કરો અને ક્લેમ ફોર્મ સબમિટ કરો.
• ક્લેમની અરજી પછી કંપની સર્વેયર અથવા વિડિયો સર્વેક્ષણ દ્વારા તપાસ કરવા માટે આવશે. આ સમય દરમિયાન તમામ દસ્તાવેજો તમારી સાથે રાખો.
• વાહનનો સર્વે થયા પછી, સર્વેયર પોતાનો રિપોર્ટ ફાઇલ કરશે અને આમ કર્યા પછી, તમારો ક્લેમ આવી જશે.

વીમો લેતી વખતે આ વાત પર ધ્યાન આપો
આજે પણ ખૂબ ઓછા લોકો જાણે છે કે વીમા પણ અલગ અલગ પ્રકારના હોય છે. મોટર વીમો ખરીદતી વખતે કેટલીક મહત્વની બાબતોનું ધ્યાન રાખો તો વરસાદના કારણે થયેલા નુકસાન માટે પણ વીમા કંપની પાસેથી વળતર મેળવી શકો છો. વીમો લેતી વખતે ફક્ત તેની ચોરી અથવા કોઈપણ ભાગને નુક્સાનનો વીમો જ અગત્યનો નથી પણ તમે જે વીમો ખરીદો છો તે વરસાદને આવરી લેશે. આવા નુકસાનને ટાળવા માટે તમારે એવો કારનો વીમો ખરીદવો જોઈએ જેમાં હેવી એન્જિન કવરનો પણ સમાવેશ થાય છે. કુદરતી આપત્તિના કારણે એન્જિન બંધ થવાને હાઇડ્રોસ્ટેટિક લોક કહેવામાં આવે છે. આવા કિસ્સાઓમાં, વીમા કંપનીઓ દાવો મંજૂર કરતી નથી કારણ કે તેને અકસ્માત તરીકે વર્ગીકૃત કરવામાં આવે છે.

કોમ્પ્રીહેન્સિવ મોટર ઈન્સ્યોરન્સ શું છે?
મોટર વાહન અધિનિયમ-1988 મુજબ, પૂર, વરસાદ, તોફાન અથવા અન્ય કોઈપણ કુદરતી આફતને કારણે થતા નુકસાનને ડેમેજ કવર હેઠળ આવરી લેવામાં આવે છે. તેથી, વીમા પૉલિસી પસંદ કરો જેમાં એન્જિન પ્રોટેક્શન ઍડ-ઑનનો વિકલ્પ હોય. જો તમે તમારા વાહન માટે કોમ્પ્રિહેન્સિવ મોટર ઈન્સ્યોરન્સ લીધો  છે, તો તમે કોઈ પણ કુદરતી આફત જેમ કે તોફાન, ચક્રવાત, વાવાઝોડું અને અતિવૃષ્ટિ, વરસાદ કે પૂરને કારણે થયેલા નુકસાન માટે દાવો કરી શકો છો.

આ રીતે વીમાના બે કોમ્પોનેટ કામ કરે છે
આ પોલિસીમાં બે કોમ્પોનેટ હોય છે. એક નુકસાન પર અને બીજો થર્ડ પાર્ટી કવર પર. ઓન ડેમેજ આપત્તિઓ અથવા અન્ય કારણોને લીધે તમારી કારને થયેલા નુકસાનને આવરી લે છે અને વીમા કંપની તમારા નુકસાન માટે ચૂકવણી કરે છે. સામાન્ય રીતે એવું જોવા મળે છે કે વરસાદ કે પૂરના પાણીમાં ફસાયેલા વાહનોના એન્જિનથી તેની બોડીને પણ ભારે નુકસાન થાય છે. જો કે, બજારમાં આવી ઘણી વીમા પોલિસી  ઉપલબ્ધ છે જે આવા નુકસાનને આવરી લે છે. વીમો લેતી વખતે તમારે ફક્ત તમારી આંખો અને કાન ખુલ્લા રાખવાની જરૂર છે. પછી તમે સરળતાથી નુકસાનનો દાવો કરી શકો છો.

(Disclaimer: અહીં આપેલી માહિતી સામાન્ય માહિતી પર આધારિત છે. ZEE24kalak તેની પુષ્ટિ કરતું નથી.)