Afghanistan: આર્થિક રીતે પાયમાલ થઈ જશે તાલિબાન? US અને IMF બાદ હવે વર્લ્ડ બેંકે પણ ભર્યું મોટું પગલું

વોશિંગ્ટન: તાલિબાને ભલે અફઘાનિસ્તાન પર કબજો જમાવ્યો હોય પરંતુ તેના માટે સરકાર ચલાવવી સરળ નહીં રહે. કારણ કે અમેરિકા સહિત અનેક દેશો તેને આર્થિક રીતે કંગાળ કરવા માંગે છે. આ બધા વચ્ચે હવે વર્લ્ડ  બેંકે પણ મોટી કાર્યવાહી કરી છે. વર્લ્ડ બેંકે અફઘાનિસ્તાનને અપાતી આર્થિક મદદ પર રોક લગાવી છે. 

સ્થિતિ પર World Bank ની નજર
વર્લ્ડ બેંકના પ્રવક્તાએ જણાવ્યું કે અફઘાનિસ્તાનના હાલાત ખાસ કરીને મહિલા અધિકારોની સ્થિતિ જોતા આ પગલું ભરાયું છે. પ્રવક્તાએ કહ્યું કે હાલ વર્લ્ડ બેંકે તમામ પ્રકારની આર્થિક મદદ પર રોક લગાવી છે અને સ્થિતિ પર સતત નજર રાખવામાં આવી રહી છે. અત્રે જણાવવાનું કે અફઘાનિસ્તાન પર કબજા બાદ તાલિબાને સરકાર બનાવવાની પ્રક્રિયા શરૂ કરી દીધી છે.

અમેરિકા ફૂટી કોડી પણ નહીં આપે
આ અગાઉ અમરિકાએ ગત અઠવાડિયે જાહેરાત કરી હતી કે તે પોતાના દેશમાં રહેલા અફઘાનિસ્તાનના સોના અને મુદ્રા ભંડારને તાલિબાના કબજામાં જવા દેશે નહીં. મળતી માહિતી મુજબ એકલા અમેરિકામાં જ અફઘાનિસ્તાનની લગભગ 706 અબજ રૂપિયાની સંપત્તિ છે. આવામાં યુએસનું આ પગલું તાલિબાન માટે મોટો ઝટકો છે. જ્યારે આંતરરાષ્ટ્રીય મુદ્રા કોષ એટલે કે IMF પણ અફઘાનિસ્તાનની આર્થિક મદદ રોકી ચૂક્યું છે. આ સાથે જ આઈએમએફએ તાલિબાનના અફઘાનિસ્તાનમાં પોતાના સંસોધનોના ઉપયોગ ઉપર પણ રોક લગાવી છે. 

IMF એ પણ બ્લોક કર્યો એક્સેસ
IMF એ 460 મિલિયન અમેરિકી ડોલર એટલે કે 46 કરોડ ડોલર (3416.43 કરોડ રૂપિયા)ના ઈમરજન્સી રિઝર્વ સુધી  અફઘાનિસ્તાનની પહોંચને બ્લોક કરવાની જાહેરાત કરી હતી. કારણ કે દેશ પર તાલિબાનના નિયંત્રણે અફઘાનિસ્તાનના ભવિષ્ય માટે અનિશ્ચિતતા પેદા કરી હતી. નોંધનીય છે કે વિશ્વ બેંકના હાલના સમયમાં અફઘાનિસ્તાનની અંદર બે ડઝનથી વધુ પ્રોજેક્ટ ચાલે છે. બેંકની  વેબસાઈટ પર મૂકાયેલી જાણકારી મુજબ વર્ષ 2002થી લઈને અત્યાર સુધીમાં વિશ્વ બેંક તરફથી અફઘાનિસ્તાનને 5.3 અબજ ડોલરની આર્થિક મદદ અપાઈ ચૂકી છે.