પાકિસ્તાનનો ગજબનો VIDEO : સુરક્ષા વ્યવસ્થા પાર કરીને ફ્લાઇટમાં ચડી ગયો ભિખારી, પછી...

કરાચી : ભારત અથવા તો બીજા કોઈ પણ દેશમાં ભિખારીઓને લગતા કોઈને કોઈ સમાચાર તો આવતા રહેતા હોય છે. જોકે પાકિસ્તાનમાં તો ભિખારીએ હદ જ કરી દીધી. પાકિસ્તાનના કરાચીમાં એક ભિખારી ફ્લાઇટમાં ઘુસી ગયો હતો. ભિખારી ફ્લાઇટમાં ઘુસી જતા તમામ પ્રવાસીઓને ભારે આંચકો લાગ્યો હતો અને આ વીડિયો ઝડપથી સોશિયલ મીડિયામાં વાઇરલ થઈ ગયો છે. 

સોશિયલ નેટવર્કિંગ સાઇટ પર આ વીડિયોને લોકો ધડાધડ શેયર કરી રહ્યા છે. આ વીડિયોમાં સ્પષ્ટ રીતે જોઈ શકાય છે કે એક ભિખારી અચાનક ફ્લાઇટમાં ઘુસી જાય છે જેના પગલે ફ્લાઇટમાં પહેલાંથી હાજર લોકો મુંઝવણમાં મુકાઈ જાય છે. આ ફ્લાઇટમાં એક મહિલા ભિખારીને સમજાવાનો પ્રયાસ પણ કરે છે. આખરે એક સિક્યુરિટી ગાર્ડ ત્યાં આવે છે અને તેને બહાર કાઢી મુકે છે. 

પાકિસ્તાનના મીડિયા રિપોર્ટ પ્રમાણે આ ઘટના 19 જૂનની છે અને આ ફ્લાઇટ કરાચીથી બેન્ગકોક જઈ રહી હતી. પાકિસ્તાનના ઉડ્ડયન મંત્રાલયે આ વીડિયો મામલે સ્પષ્ટતા કહ્યું છે કે આ વ્યક્તિ પાકિસ્તાની નાગરિક નથી. ન્યૂઝ ચેનલના દાવા પ્રમાણે આ વ્યક્તિ મૂળ ઇરાનની છે પણ ભિખારી ભારે સુરક્ષા વ્યવસ્થા હોવા છતાં કઈ રીતે ફ્લાઇટમાં ચડી ગયો એ હજી ચર્ચાનો મુદ્દો છે.